1Job runaca cashnatapashmi nijurca:
2“Chashna canataca, ñucaca yachanipachami.
¿Imashnata runaca, Taita Diospaj ñaupajpica, alita rurashcashna ricuringa?
3Paihuan chimbapura rimangapa munaimanmi,
shina cajpipash, huaranga shimicunamandaca shujllatapash na rimai ushaimanllu.
4Paica tucuita yachajmi, tucui ushaitapash charijmi.
¿Pita, Paita na cazushpapash na llaquichi tucushcayari?
5Pai ninandapacha fiñarishpaca, urcucunatapash tucuchinllami.
Chashna rurashcataca, pipash na yachai ushanllu.
6Paimi alpa mamatapash, ninanda cuyuchinlla.
Alpata vichai charijuj pilarcunatapashmi cuyuchin.
7Indi ama llujshichun Pai mandajpica, na llujshingachu.
Luzero michacunatapash anchuchingallami.
8Paillami, jahua pachataca, telata chutanshna churarca.
Paica, caiman chaiman cuyujuj, mama cucha jahuatami purijun.
9Osa, Orión, Pléyades shuti luzerocunatapash, Paimi tandachishpa shujpi, shujpi churarca.
Shinallata uraiman tiyanajuj lucerocunatapash, Paillatami churarca.
10Paica, pipash na yachai ushanallacunatami, ninan ushaihuan tucuita churashca.
Chaicunataca pipash na yupai ushanallami.
11Ñuca ñaupajta yalijujpipash, Paitaca napacha ricui ushaimanllu.
Pai imashna cajtapash, napacha yachai ushaimanllu.
12Pai imata quichujpipash, ¿pita jarcai ushangayari?
¿Pita, Paitaca: ‘Imatata rurajungui’ ningayari?
13Taita Diosca, Pai fiñarishpa llaquichinataca napacha saquingachu.
Jariyashpa jatun tucushcacunapashmi, Paipaj ñaupajpica urai cumuringa.
14¿Ñucacarin, imatata tigrachishpa rimai ushashayari?
¿Paihuanga, shuj shimitallapash rimai ushashachu?
15Ñucaca, alitalla ruraj cashpapash, imatapash na rimai ushaimanllu.
Ashtahuangarin, llaquihuayari nishpallami Diosta mañai ushaiman.
16Ñuca mañajujta uyashpami, Paica tigrachinga.
Shina cajpipash, ñuca mañajujta uyashcataca, na cri ushaimanllu.
17Paica, tamiatashnami llaquicunata cachamuhuarca.
Yangamandami ñucataca chugrichishpa catihuarca.
18Paica, ashagutallapash na samachun saquihuarcachu.
Ashtahuangarin, jatun llaquicunatallami cachamuhuarca.
19Paipaj ninan ushaita parlajpica, tucui ushaitami charin.
Paita tapuchingapaca, ¿pita cayai ushangayari?
20Alitalla rurajmi cani nijushpaca, ñuca shimillahuanllatami llaquipi urmajuiman.
Ima pandatapash na ruranichu nijushpaca, na alita ruraj runami caiman.
21Alitalla ruraj cashpaca, na ñuca munaita ruraimanllu.
Ñuca causaitaca yangapimi churaiman.
22Ñucaca, caitallami ningapa munani:
‘Diosca, alita rurajtapash, na alita rurajtapash, Paillatami ricushpa llaquichin’.
23Dios astishpaca, huañuchinllami.
Ima na alitapash na ruraj runa llaquihuan cajpipash, asinllami.
24Cai pachaca, Diosta na manllajcunapaj maquipimi churai tucushca.
Paica, paipaj juezcunapaj ñavitapash quilpanllami.
Na pai cajpica, ¿pita canga? ¿Maipita canga?
25Ñuca causana punllacunaca, cartacunata apaj runatapash yali uchamari calpashca.
Ima alitapash nara ricushpallatami tucurishca.
26Ñapash rij jupa barcocunashnami rishca.
Aichata micungapa ñapash uriajuj jatun angashnami yalishca.
27Ñucaca, tucuitami cungasha.
Llaquilla ñavi canata saquishpa, shinlli tucushpa catisha.
28Cai tucui nanaicunaca, ashtahuanmi llaquichijuhuan.
Diospaj ñaupajpica, llaquichi tucunapachami cani.
29Ñucaca, na alita ruraj runami cani.
¿Imapata yangaca, imatapash rurashayari?
30Lejia yacuhuan armashca cajpipash,
maqui yurajyajta maillashca cajpipash,
31ñucataca utujupimi shitahuanguiman.
Chaipica, ñuca churajunallatami, ñucataca millanayachihuanga.
32Diosca, na ñucashna runa cajpimi, imata tigrachitapash na ushani.
Imata rurashcata tapuchitapash, na ushanichu.
33Dioshuan, ñucahuan, ishcandita tapuchijca pipash illanmi.
Ñucanchi ishcandita mandajca, pipash na tiyanllu.
34Paipaj varata, ñuca jahuamanda anchuchishpami ali canman.
Pai cachamushca llaquicunahuan, ama ashtahuan llaquichishpami ali canman.
35Shina cajpica, na manllashpami rimaiman.
Cunanga, chashna rimangapaca na ushaipami capani.
Who We AreWhat We EelieveWhat We Do
2025 by iamachristian.org,Inc All rights reserved.
