ROMANOS 3 - Quichua Imbabura 2016

1Judío runapajca, ¿ima alita ashtahuanga tiyanga? Circuncisionda rurashcapash, ¿imapata ali canga?

2Chaicunaca, tucui imapapash alipachami cashca. Taita Diosca, paicunamanmi, Paipaj shimitaca punda cushca.

3Paipuramandapash huaquingunaca na crircachu. Paicuna na crijllapi, ¿Taita Dios imatalla rurasha nishcatapash na pactachishpa saquingallachu?

4Napacha shinachu. Ashtahuangarin, tucui gentecuna llulla cajpipash, Taita Diosca Pai ima nishcata pactachij cashpami, cashna nishpa quilcachishca tiyajun:

“Canga imatapash alitalla ruraj cashcamandami:

Canda llaquichingapa tapuchijpipash tucuita mishashpa llujshingui” nijunmi.

5(Gentecuna rimanshnallatami rimajuni). Na ruranalla na alicunata rurajpimi, Taita Diosca alitalla ashtahuan rurashpa ricuchijun. Shina cashpaca: “Diosca, yangamandami llaquichijun” ¿ninachu canchi?

6Napacha shinachu. Taita Diospash na ali cashpaca, ¿imashnata cai pachapi causajcunata tapuchishpa llaquichinga?

7Ashtahuangarin, ñuca llullashcacuna, Taita Dios ninan ushaita charishcataca ashtahuan ricuchijujpica ¿imashpata juchayujtashna llaquichigrihuan?

8“Ima aliguta japingapapash, na alitamari rurana canchi ninajunmi” nishpami ñucanchitaca yangamanda juchachinajun. (Paicuna chashna ninajuj ali cajpica, ¿nachu chashna causanalla canchi?).

Alitalla rurajca shujllapash na tiyanllu

9Shina cajpica ¿Ima ninata canchi? ¿Judiocunaca, na judiocunata yali ashtahuan alichu canchi? Napacha shinachu. “Judiocunatapash, na judiocunatapash juchamari mandajun” nishpa ñami villarcanchi.

10Dios quilcachishcapipash cashnami nijun:

“Alitalla ruraj runaca, shujllapash na tiyanllu.

11Ali yuyaita charijpash, illanmi.

Taita Diosta mascangapa munajcunaca shujllapash na tiyanllu.

12Tucuicuna pandarishpami, na alitalla ruranajun.

Tucuillami na alicunapacha tucushca.

Aliguta rurashpa causajpash, shujllapash na tiyanllu.

13Paicunapaj shimipash,

huañushcata pambana utujuta pascashcashnami tucushca.

Paicunapaj jalluhuanmi umachinajun.

Paicunapaj shimi ucupica, millai culebrapaj venenoshnami tiyajun.

14Paicunapaj shimipica,

na alicachishpa rimashpa ninanda llaquichina jundami.

15Paicunacapaj chaquicunaca, huañuchishpa yahuarta jichangapami rinajun.

16Paicunapaj causaipipash, llaquichishpa tucuchina yuyaillami causanajun.

17Imashna ali causanatapash, napacha yachanllu.

18Paicunaca, Taita Diostaca napacha manllanachu cani” nijunmi.

19Mandashca shimita cazushpa causajcunamanmi, chai mandashca shimipi nijushcashna causachun yachachijun. Cai pachapi causajcunata, Taita Dios tapuchishpa llaquichijui punllapi upalla cachunmi shinaca yachachijun. Chaitaca yachanchimi.

20Mandashcacunata pactachijpilla,Taita Diosca, Paipaj ñaupajpi “alimi pactachishcangui” nishpa chasquingataca napacha yanachu canguichi. Mandashca shimicunaca, juchata rurajcuna cajtallami yarichijun.

Crishpallami, alitalla rurai ushan

21Ashtahuangarin, Taita Diosca ali cashcatalla ruraj cashpami, mandashca shimicuna tiyashca jahuapash, Paipaj juyaitaca ricuchimushca. Chaicunataca, mandashca shimicunapash, profetacunapashmi villanajushca.

22Taita Diosca Jesucristota crijpillami pita cashpapash chasquijun. Paipaj ñaupajpica, tucuicunami chashnallata canchi.

23Tucuicuna juchata rurashcamandami, jucha illaj Taita Diospaj ñaupajpi causagritaca napacha ushana tucushca.

24Shina cajpipash, Diosca juyashpallami, Cristo Jesusta crijcunataca, alitalla rurajcunatashna chasquijun.

25Taita Diosca, Jesucristo yahuarta jichashpa huañushcata crichunmi, Paitaca cachamurca. Diosca, Pai alitalla ruraj cashcata ricuchingapami, chashna rurarca. Diosca, ñaupaj punllacunapica, na fiñarishpami saquishca carca.

26Shina cashpapash, cunan punllacunapica, Pai alitalla ruraj cashcata ricuchingapami, Jesusta cachamushca. Shina cashpami, Taita Diosca alitalla ruraj cashpa, Jesusta crijcunapaj juchacunataca anchuchijun.

27Shina cajpica, ¿jariyanachu canchi? Chaicunaca ñamari anchuchi tucushca. ¿Maijan mandashca shimita anchuchishcanga? ¿Mandashca shimicunata pactachishcachu tucuchishcanga? Na chashnachu. Ashtahuangarin, Jesusta crishcamandallami ñucanchica chasqui tucushca canchi.

28Shina cashpami, cashnataca aliguta yachanchi: Chai mandashcata na pactachijpipash Jesusta crijpillami Diosca chasquijun.

29Taita Diosca, ¿judiocunapajllachu Dios canga? ¿Nachu na judiocunapajpash Dios canga? Ari, na judiocunapajpash Taita Diosmi.

30Taita Diosca, shujllami. Shina cashpami, circuncisionda rurashcacunatapash, chaita na rurashcacunatapash, crishcamandalla, alitalla rurashcatashna chasquinga.

31Shina cashpaca, Jesusta crishcamandaca, mandashca shimicunataca ¿yangapichu churana canchi? Napacha shinachu. Ashtahuangarin chai mandashca shimicunataca, alipacha cashcatamari ricuchinajunchi.