1 JUAN 5 - Quichua Imbabura 2016

Jesusta crishpami ima na alitapash mishai ushanchi

1Jesustaca, Quishpichij cajta crishpa tucui catijcunaca, Taita Diosmanda mushujta huacharishca huahuacunami. Maijan cashpapash, taitata juyajushpaca, taitapaj huahuacunatapash juyangami.

2Taita Diostapash juyashpa, Pai mandashca shimicunatapash pactachishpami, Taita Diospaj huahuapura juyarishpa causashcataca ricuchinajunchi.

3Taita Dios mandashca shimicunata pactachishpa causanajushpallami, Paita juyanajushcataca yachanchi. Pai mandashca shimicunataca pactachi ushanallami.

4Taita Diosmanda mushujta huacharishca huahuacunaca, cai pachapi ima na alitapash mishai ushanchillami. Jesusta crishpami, cai pachapi ima na alitapash mishai ushanchi.

5Cai pachapi imapash na alicunataca, ¿pita mishai ushangayari? Maijambash: “Jesusca, Taita Diospaj Churimi” nishpa crijllami mishai ushanga.

Diospaj Espiritumi, Cristomanda villashca

6Jesucristo shamushpaca, yacupimi bautizarirca. Shinallata, yahuarta jichashpami huañurca. Pai shamushcataca, na yaculla ricuchircachu. Ashtahuangarin yacupash, yahuarpashmi ricuchirca. Chaitaca, Diospaj Espiritupash villajunmi. Diospaj Espirituca napacha llullashpa villanllu.

7Chaita ricushpa villajcunaca, (quimsandimi jahua pachapi tiyan: Taitapash, Rimashca Shimipash, jucha illaj Espiritupashmi tiyan. Paicunaca quimsa cashpapash, shujllami.

8Cai pachapipash, shinallata quimsa villajcunami tiyan) Paicunaca: Diospaj Espiritupash, yacupash, yahuarpashmi. Chai quimsandimi, chaimandallata villanajun.

9Runacuna ricushpa villashcata crishpaca, Taita Dios villashcatacarin ashtahuanmi crina canchi. Taita Diosca, Paipaj Churimandami cashna nirca:

10Taita Diospaj Churita pipash crishpaca, paipaj shungupimi crishpa chasquijun. Ashtahuangarin, Taita Diosta na crishpaca, Paipaj Churimanda Taita Dios villashcatapash, na crinllu. Shina cashpami Taita Diostaca llullapi churan.

11Taita Diosca: Causaita causanataca, Ñucami cangunaman caramuni. Chai causaitaca, Ñuca Churita crishpallami charinguichi, nishcami.

12Diospaj Churita crishpallami, causaita causagrinataca chari ushanchi. Taita Diospaj Churita na crishpaca, causaita causagrinataca pipash napacha chari ushangachu.

Causaita causagrinamanda yachanami

13Taita Diospaj Churita crishcamanda, causaita causanata charishcata aliguta yachachunmi, caicunataca quilcani. Shinallata, Taita Diospaj Churipaj shutita crishpa catichunmi quilcani.

14Pai munashcashna ñucanchi imaguta mañajujtapash, Diosca uyanllami. Chaita yachashpami, pactachingapacha yashpa, chaitaca crishpa shuyanajunchi.

15Ñucanchi imaguta mañajpipash, Dios uyajuj cashcataca yachanchimi. Chaimandami, imaguta mañashpapash, Dios caramujpi japinatapacha yachanchi.

16Maijan crij cashpapash, na huañuiman apajuj juchata rurajujta ricushpaca, paimanda Diosta mañachun ninimi. Shina mañajpimi Taita Diosca, paiman causaita caranga. Huañuiman na apajuj juchata rurajcunamandami, shina mañachun nini. Huañuiman apajuj juchapash tiyanmi. Chai juchata rurajcunamandaca, na mañanachu canguichi ninimi.

17Na huañuiman apajuj juchapash tiyanmi, shina cashpapash, tucui na alita ruranaca juchami.

18Maijambash Taita Diosmanda huacharishca huahua cashpaca, na ashtahuan juchata rurashpa causajtami yachanchi. Paitaca, Taita Diospaj Churi ricujujpimi, diabloca napacha tacari ushan.

19Ñucanchica, Taita Diospajllami causanajunchi. Shinallata, cai pachapajtalla rurashpa causajcunataca, diablo mandajujtami yachanchi.

20Shinallata, Taita Diospaj Churi shamushcatapash yachanchimi. Paimi, na llullaj Diosta ñucanchi rijsichun yachachirca. Shinamandami, na llullaj Dioshuambash, Paipaj Churi Jesucristohuambash, shujlla tucushpa causanajunchi. Paica, na llullaj Dios cashpami, causaita causagrinatapash caramujun.

21Juyashca huahuacuna, rurashcalla dioscunamandapash anchurinami canguichi nipanimi. Chashna cachun.