1 SAMUEL 12 - Quichua Imbabura 2016

Israelcunaman, Samuel villajushcamanda

1Tucui Israelcunatami Samuelca, cashna nirca: “Canguna tucui imatalla mañashcata uyashpami, cangunaman jatun mandajta churarcani.

2Cunanga cai jatun mandajmi, cangunataca mandajunga. Ñucaca, yura ajchapash junda, ña rucumi cani. Shina cajpipash, ñuca churicunaca cangunahuanmi. Cangunataca huambramandapacha cunan punllacamanmi ricushpa pushamushcani.

3Cunanga, Mandaj Diospaj ñaupajpi, paillata churashca jatun mandajpaj ñaupajpi, imata nina cashpapash nihuaichilla. Pipajtapash, huagrata, burruta quichushca cajpica, ñavi ñavi nihuaichilla. Shinallata, yangamanda juchachishpa, llaquichishca cajpipash, na cashpaca imatapash pacalla cujpi japishpa, na imatapash nishpa saquishca cajpipash, nihuaichilla. Imata tigrachina cajpipash tigrachishallami” nijurcami.

4Shina nijpimi, cashna ninajurca: “Napacha pitapash yangamanda juchachircanguichu. Pitapash na yangamanda llaquichircanguichu. Pipaj maquimandapash, imatallapash na japircanguichu” ninajurcami.

5Shina ninajujpimi Samuelca, cashna nirca: “Ñucata, ima juchachinatapash canguna na charijtaca, Mandaj Diospash, Paillata churashca jatun mandajpash ricujunmi” nijpimi: “Ari, chashnami capan” ninajurca.

6Shina ninajujpimi Samuelca, Israelcunataca cashna nijurca: “Cangunapaj ñaupa taitacunata, Egipto llactamanda llujchimuchun Moisesta, Aaronda agllashpa cachaj Mandaj Diosmi ricujun.

7Cunanga, aliguta uyahuaichi. Cangunatapash, cangunapaj ñaupa taitacunatapash, tucui llaquicunamanda, Mandaj Dios imashna quishpichishcataca, Mandaj Diospaj ñaupajpimi, cangunaman tucuita rimarigrini.

8Egipto llactaman Jacob rishca jipa, cangunapaj ñaupa taitacunata ninanda llaquichinajujpimi, Mandaj Diosta caparishpa mañanajurca. Chaimandami cangunapaj ñaupa taitacunata, Egiptomanda llujchimuchunga, Moisesta, Aaronda, Mandaj Diosca cacharca. Paicuna llujchimushpami, cai llactapi causanajuchun churarca.

9Ashtahuangarin paicunaca, paicunata Mandaj Diosta na cazurca. Chaimandami Hazor shuti pueblomanda runacuna mandaj Sísara shuti runapaj maquipi, filisteocunapaj maquipi, Moab llactata jatun mandajpaj maquipi churarca. Chai mandajcunami, macanajushpa llaquichingapa shamurca.

10Chaimandami, Mandaj Diostaca caparishpa cashna mañanajurca: ‘Mandaj Diosta na cazushpami, Baal shuti, Astarot shuti rurashcalla dioscunatara alicachishpami, juchata rurashcanchi. Cunanga, ñucanchita fiñajcunapaj maquimanda quishpichijpica, Can mandashcata rurashpami causapashun’ ninajurcami.

11Chaimandami Mandaj Diosca, cangunapaj muyundipi causajcuna, fiñashpa llaquichinajujmanda quishpichinajuchunmi, Jerobaal, Barac, Jefté, Samuel shuti runacunata cachamurca. Shinamandami, ima llaquipash na japijpi causarcanguichi.

12Ashtahuangarin, amonitacunata jatun mandaj Nahas shuti runa cangunahuan macanajungapa shamujta ricushpami: ‘Ima cachumbash, shuj jatun mandaj ñucanchita mandachunmi munanchi’ nishpa mañahuarcanguichi. Cangunata Mandaj Diosllata, cangunapaj jatun mandaj cajta na chasquishpami, chashna ninajurcanguichi.

13Ashtahuangarin, canguna mañashpa agllashca jatun mandajca caipimi. Mandaj Diosllata, cai jatun mandajta churashcataca ñami ricunguichi.

14Mandaj Diosta manllashpa, cazushpa, Paipaj Shimicunata uyashpami Mandaj Dios mandashcataca pactachina canguichi. Cangunapash, cangunata jatun mandajpash, Mandaj Diosta, cazushpa causashpaca, alitami ruranguichi.

15Ashtahuangarin Mandaj Dios rimashca Shimicunatapash na uyashpa, Mandaj Dios mandashcacunata na pactachijpica, Mandaj Diosllatami cangunataca, cangunapaj ñaupa taitacunata llaquichishcashnallata, Paipaj maquihuan llaquichinga.

16Cunanga, Mandaj Diosllata canguna ricujta, ninan manllarinata rurajta ricungapami shuyana canguichi.

17Cunanga na tamia punllacunachu. Ashtahuangarin trigota tandachina punllacunami chayamushca. Shina cajpipash, ninanda tamiachimuchunmi, Mandaj Diostaca mañagrini. Chaita ricushpami, jatun mandajta tiyachun mañashpa, Mandaj Diospaj ñaupajpi na alita rurashcataca yachanguichi” nijurcami.

18Shina nishca jipa, Mandaj Diosta caparishpa Samuel mañajpimi, Mandaj Diosca ninan rayucunahuan chai punllata ninanda tamiachimurca. Chaimandami Mandaj Diostapash, Samueltapash, gentecunaca ninanda manllarirca.

19Chaimandami Samueltaca, cashna ninajurca: “Ñucanchita ama huañuchijuchunga, cambajta rurajcunamandaca, canda Mandaj Taita Diosta mañapailla. Ñucanchica, tucui juchacunata rurashpa causashca jahuami, jatun mandajta churai nishpaca, ashtahuan na alita rurapashcanchi” ninajurcami.

20Shina nijpimi Samuelca, tucuicunata cashna nijurca: “Na manllanachu canguichi. Ari, cangunaca cai tucui juchatami rurashcanguichi. Shina cashpapash, Mandaj Diosta catinataca, na saquinachu canguichi. Ashtahuangarin tucui shunguhuanmi Paitalla alicachishpa causana canguichi.

21Rurashcalla dioscunataca, na catinachu canguichi. Paicunaca, imata ruraitapash na ushaj cashpami, quishpichitapash na ushanga.

22Ashtahuangarin, Jatun Mandaj Dios cashpami, Pai agllashcacunataca na jichunga. Mandaj Diosca, Paipajlla cachun munashpami, cangunataca agllarca.

23Shina cashcamandami, cangunamanda mañanata saquishpa, Mandaj Diospaj ñaupajpica napacha juchata rurana cani. Ashtahuangarin, canguna aliguta cazushpa causanajuchunga yachachijushallami.

24Mandaj Diostallami manllashpa, tucui shunguhuan Paipajta rurashpa causana canguichi. Cangunaman ashtaca alicunata rurashcataca, napacha cungashpami causana canguichi.

25Ashtahuangarin, na alitalla rurashpa catishpaca, cangunapash, cangunata jatun mandajpashmi huañunguichi” nijurcami.