1Jatun mandaj Davidca, Absalón runata tucui shungu llaquinayachijujtami, Sarvia shuti huarmipaj churi Joab runaca yacharca.
2Chaimandami Joab runaca, Tecoa shuti pueblopi causaj, ali yachashca huarmita cayachun cachashpa cashna nirca: “Canga, huañui tiyajpi churajunata churajushpa, llaquilla tucushpa, mishquilla ashnajujtapash na jabirishpa, jatun mandajpajman ripai nini.
3Chaiman, chayashpaca, mandajman ñuca ima nishcata, nipangui” nircami.
Joab runaca, imatalla nichumbash ali yachachishpami cacharca.
4Tecoa pueblomanda huarmica, jatun mandajpajman yaicushpami, paipaj ñaupajpi cungurishpa alpaman chayajta cumurirca. Chaipimi:
“¡Jatun mandajlla, ñucata yanapahuai!” nirca.
5Shina nijpimi, jatun mandajca:
“¿Imatata ningui?” nishpa tapujpi, cashna nirca:
“Na llullashpami nipani. Ñuca cusa huañujpimi ñucalla causajupani.
6Cambajta ruraj ñucaca, ishcai churicunatami charircani. Paicunaca, pambapi fiñanajushpami, pipash na mitsaj tiyajpi shujca, paipaj huauquita huañuchishca.
7Cunanga, tucuilla ñuca ayllucunami, cambajta ruraj ñucataca fiñai callarishca. Paicunaca cashnami ninajun: ‘Paipaj huauquita huañuchishcamandaca, paitapash chashnallata huañuchingapa, ñucanchiman saquilla. Shinami cambaj shujlla churitapash tucuchishun’ ninajunmi. Chashna rurashpaca, ñuca cusapaj shutitapash, paipaj miraitapash na saquishpa, cai pachamandaca chingachingami” nircami.
8Shina nijpimi jatun mandajca, chai huarmitaca cashna nirca:
“Cambaj huasiman rilla, can imata nishcatapash ricushpa ñucami mandasha” nirca.
9Shina nijpimi Tecoa shuti pueblomanda huarmica, jatun mandajtaca cashna nirca:
“Jatun mandajlla. Ima llaqui japina cashpapash ñucata, ñuca taitapaj huasi ucupurata japichun. Ashtahuangarin jatun mandajpash, mandangapa can tiyarinapash, jucha illaj capachun” nircami.
10Shina nijpimi jatun mandajca, cashna nirca:
“Maijambash fiñashpa canda rimajpica, ñucapajman pushamunguilla. Chashna pushamujpica, cutinga na rimangachu” nircami.
11Shina nijpimi chai huarmica, cashna nirca:
“Jatun mandajlla, ñucapaj caishuj churita huañuchishcamanda, randi huañuchishami nishpa purijuj runa ama ashtahuan llaquichihuachun, canda Mandaj Diosta mañapangui” nirca.
Shina nijpimi jatun mandajca, cashna nirca:
“Mandaj Diosca ricujunmi. Cambaj churipaj umamandaca, shuj ajchallapash na alpaman urmangachu” nirca.
12Shina nijpimi chai huarmica, cashna nirca:
“Cambajta ruraj ñucataca, can jatun mandajhuan shuj shimiguta rimachun saquihuai” nijpi, jatun mandajca:
“Rimailla” nirca.
13Shina nijpimi chai huarmica, cashna nijurca:
“¿Imashpata Taita Dios agllashcacunataca, chashnallata llaquichingapa yarijungui? Can jatun mandaj nishcashnaca, cambaj churita shuj llactamanda shamuchun na saquishpaca, canllatami na alita rurajungui.
14Ñucanchica huañunapachami canchi. Alpapi yacu jicharijpi, na cutin tandachi ushanashnami canchi. Shina cajpipash Taita Diosca, na pitapash causaita quichunllu. Ashtahuangarin, paipaj ñaupajmanda ama ashtahuan caruyachunmi, imashna ali cana ñandapash ricuchijun.
15Cunanga, gentecuna ñucata llaquichinajujpimi, can jatun mandajman caicunata ningapa shamuparcani. Cambajta ruraj ñucaca: ‘Can jatun mandajhuan parlarijpica, ñuca mañashcata rurangapashchari’ yashpami shamuparcani.
16Jatun mandajlla, ñuca mañashcata uyashpaca, cambajta ruraj ñucatapash, ñuca churitapash, Taita Dios cushca llactamanda ishcandita chingachisha nijuj runapaj maquimandaca cacharichihuanguimi yanimi.
17Cambajta ruraj ñucaca, can jatun mandaj imaguta cashpapash aliguta nishpa cushichijuchunmi shuyajupani. Can jatun mandajca, Taita Diospaj angelshna alitapash, na alitapash tucuitami yachangui. Shina cashcamanda, canda Mandaj Taita Diosca canhuan cachun” nijurcami.
18Shina nijpimi Davidca, chai huarmitaca cashna nirca:
“Ñuca imata tapujpipash, ama pacashpa tucuilla villahuai” nirca.
Shina nijpimi, chai huarmica:
“Jatun mandajlla, imata tapuna cashpapash tapuhuailla” nirca.
19Shina nijpimi jatun mandajca, cashna nirca:
“Caicunata nichunga, ¿nachu Joab runa yachachishpa cachamurca?” nirca.
Shina nijpimi chai huarmica, cashna nirca:
“Jatun mandajlla, candaca pipash na umachi ushangachu. Canga tucuitapachami yachapangui. Can tapushcashna shinapachami capan. Cambajta ruraj Joab runami ñucataca cachamuhuarca. Paillatami, cambajta ruraj ñucataca, tucui cai shimicunata yachachishpa cachamuhuarca.
20Cai llaquicuna ña tucurichunmi, cambajta ruraj Joab runaca cachamuhuarca. Ashtahuangarin, ñucata mandajca, Diospaj angelshna alipacha yachajushca cashpami, cai pachapi ima tucujujtapash yachangui” nirca.
21Shinamandami jatun mandajca, Joabta cayashpa cashna nirca:
“Cunanga cashnami ruragrini. Canga, Absalón huambraguta tigrachimugrilla” nirca.
22Shina nijpimi Joab runaca, paita cazushcata ricuchingapa alpaman chayajta cumurishpa, jatun mandajta bendiciashca jipaca, cashna nirca:
“Jatun mandajlla. Cambaj ñaupajpi cambajta ruraj ñuca ali ricurishcataca, cunanmi yachapani. Shina cajpimi can jatun mandajca, ñuca mañashcata rurapashcangui” nirca.
23Chai jipami, Joab runa jatarishpaca, Gesur shuti puebloman rishpa Absalón runataca, Jerusalenman pushamurca.
24Ashtahuangarin jatun mandajca, Absalondaca cashnami nirca:
“Ñuca ñavipica ama ricurishpa, paipaj huasiman richunlla” nirca.
Shina nijpimi Absalonga, jatun mandajpaj ñavitaca na ricushpallata paipaj huasiman rirca.
25Tucui Israelpuramandaca, Absalón runashna juyaillagu cashcamanda, ninandapacha alicachi tucun runaca, shujllapash na tiyarcachu. Chaquimanda callarishpa, uma pundacaman, juyaillapachami carca.
26(Absalonga, paipaj ajcha yapa jundashpa fiñachijpimi, huata tucuripica rutuchin carca). Chai ajchata jatun mandajpaj pezanapi pezajpica, ishcai kilo chaupitashnami pezarca.
27Absalonga, quimsa churita, shuj ushitami charirca. Chai ushica Tamar shuti, juyailla cuitsagumi carca.
28Absalonga, ishcai huatatami Jerusalenbi causajurca. Shina cashpapash, jatun mandajpaj ñavitaca na ricurcachu.
29Chaimandami Absalonga, jatun mandajpajman cachangapa, Joab runata cayachun cacharca. Ashtahuangarin Joab runaca, na shamungapa munarcachu. Cutin cayachun cachajpipash, na shamungapa munarcachu.
30Chaimandami Absalonga, paipajta rurajcunataca cashna nirca:
“Ricuichi, Joab runapaj pambaca ñuca pamba quimiriajpimi tiyan. Chaipimi, cebadata tarpushca charin. Chaiman rishpa ninata japichigrichi” nirca.
Chashna nijpimi Absalón runapajta rurajcunaca, Joab runapaj pambapi ninata japichigrirca.
31Chaita ricushpami Joab runaca, Absalonbaj huasiman shamushpa:
“¿Imashpata cambajta rurajcunaca, ñuca cebada pambata rupachirca?” nirca.
32Shina nijpimi Absalonga, Joab runataca cashna nirca:
“Ñucami candaca, caiman shamui nishpa cayachun cacharcani. Candaca, jatun mandajpajman cashna nichun cachangapami, cayachun cacharcani: ‘¿Imapata ñucataca, Gesur shuti pueblomanda cayachun cachamurcangui? Chaipi causajushparajpash, alichari caiman carcani. Cunanga, can jatun mandajpaj ñavita ricungapami munani. Ima juchata ñuca rurashca cajpipash, huañuchihuailla’ nichunmi, cachangapa munarcani” nircami.
33Shina nijpimi Joab runaca, jatun mandaj yachachun villaj shamurca. Shinamandami, Absalonga, cayachun cachajpi, jatun mandajpajman shamurca. Paica, jatun mandajpaj ñaupajpi alpaman chayajta cumurijpimi, jatun mandajpash Absalondaca mucharca.
Who We AreWhat We EelieveWhat We Do
2025 by iamachristian.org,Inc All rights reserved.
