1 REYES 9 - Quichua Imbabura 2016

Taita Diosca, tucuita pactachingapa Salomonhuan ari nijushcamanda(2 Crón. 7:11-22)

1Salomonga, Mandaj Diospaj huasitapash, pai mandashpa tiyajuna huasitapash, tucui imatalla rurangapa yarijushcatapashmi rurashpa tucuchirca.

2Chai jipami Mandaj Diosca, Gabaón pueblopi ricurishcashnallata, Salomonman cutin ricurirca.

3Paitami, Mandaj Diosca cashna nirca: “Ñucata, can ninanda mañajujtaca uyarcanimi. Causaita causaicaman ñuca chaipi causajuchun, can rurashca cai huasitapash, ñucapajlla cachun chasquircanimi. Cai huasitaca, punllandi yariashpa ricuriajushallami.

4Shinallata, cambaj taita Davidshnallatami, Ñuca ñaupajpi tucuita aliguta rurashpa, Ñuca mandashca shimicunata cazushpa pactachina cangui.

5Shina causajpica, Israel llactata mandanataca, cambaj taita Davidman villashcashnami, causaita causaicaman churasha. Paimanmi: ‘Cambaj miraicunamandaca, Israelcunata mandangapa tiyarinapi tiyarij runaca na illangachu’ nircani.

6Ashtahuangarin cangunapash, cangunapaj churicunapash shinlli shungu tucushpa, tucui ñuca mandashcacunata na cazushpa, shuj dioscunatara catishpa, chaicunatara ninanda alicachishpa causajpica,

7Ñucallatami, Israelcunataca, paicuna causachun carashca llactamanda llujchishpa cachasha. Shinallata, Ñuca shutipi mañana, Ñucapajlla cachun shicanyachishca cai huasitapashmi tucuchisha. Chashna rurajpimi Israelcunataca, tucui gentecuna na alicachishpa asinajunga.

8Ninanda alicachishca cai huasita maijambash yalijushpami, manllarishpa na alicachijunga. Chaimandami asishpa: ‘¿Mandaj Diosca, imashpata cai llactatapash, cai huasitapash chashna llaquichishcayari?’ nijunga.

9Shina nijpimi: ‘Paicunapaj ñaupa taitacunata Egipto llactamanda llujchimuj, Mandaj Taita Diosta saquishpami, shuj dioscunatara alicachishpa, chai dioscunapajta rurashpa causanajurca. Chaimandami Mandaj Diosca,cashna llaquicunahuan ninanda llaquichishca’ ninajungami” nijurcami.

Salomonga, shuj ruranacunatapashmi rurashca(2 Crón. 8:1-18)

10Ishcai chunga huata yalishca jipami, Salomonga ishcai huasitapash, Mandaj Diospaj huasitapash, mandashpa tiyajuna huasitapash, rurashpa tucuchishca carca.

11Chai huasicunapaca, Tiro shuti llactata jatun mandaj Hiram shuti runami, cedro caspicunata, ciprés caspicunata cachamurca. Curitapash, mashnata munashcatami curca. Chaimandami jatun mandaj Salomonga, Galilea llactapi tiyaj ishcai chunga pueblocunata, Hiram runaman curca.

12Tiro shuti llactamanda, Hiram shuti runaca, Salomón cushca pueblocunata ricungapa rishpaca, chai pueblocunataca, na alicachircachu.

13Shina cashpami: “Ñuca huauquilla, ¿can cushca cai pueblocunaca, imapata ali canga?” nirca. Shina nishpami, chai pueblocuna tiyanajuj alpacunataca, Cabul shutita shutichijpi, cunangamanmi chai shutihuan tiyanajun.

14Hiram runaca, pusaj chunga shuj quintal chaupi yali curitami, Salomonman cachamushca carca.

15Jatun mandaj Salomonga, Mandaj Diospaj huasitapash, paipaj huasitapash, Milo shuti pushtutapash, Jerusalén muyundi jatun pircatapash, Hazor, Meguido, Gezer shuti pueblocunatapash rurachingapami, runacunata tandachishpa chai ruranacunapi churashpa mandarca.

16Egipto llactata jatun mandaj Faraón shamushpa, Gezer pueblota quichushpa, rupachishpami, chaipi causanajushca cananeocunatapash huañuchishca carca. Chai pueblotaca, paipaj ushi, Salomonbaj huarmimanmi cararca.

17Chaimandami Salomonga, Gezer shuti pueblotapash, uraman tiyaj Bet-horón shuti pueblotapash,

18jichushca pambapi Baalat shuti, Tadmor shuti pueblocunatapash, cutin shayachirca.

19Shinallata, imacunatalla Salomón charishcacunata alichina tucui pueblocunatapash, macanajuna carretacunata alichina pueblocunatapash, caballocunata charina pueblocunatapashmi, cutin shayachirca. Jerusalenbi, Líbano llactapi, pai mandajuj tucui llactacunapi shayachingapa munashcataca, tucuitami rurarca.

20Amorreo, heteo, ferezeo, heveo, jebuseo gentecunamanda puchushca chai tucui gentecunahuanmi, chashna rurarca. Paicunaca, na Israelcunachu carca.

21Chai gentecunapaj jipa miraicunata, Israelcuna na tucuchi ushajpi saquirishcacunami chaipi causanajurca. Chai gentecunatami Salomonga, cunan punllacaman gañangunashnalla tucuita rurashpa causanajuchun mandashca.

22Ashtahuangarin Israelcunataca Salomonga, shujllatapash na gañanguna cachun churarcachu. Paicunataca: Macanajuj runacuna, paipajta rurajcuna, cati mandajcuna, macanajuj runacunata mandajcuna, carretacunapi purij runacunata, caballopi tiyarij runacunata mandajcuna cachunmi churarca.

23Chai runacunata ricushpa mandachun, Salomón churashca mandajcunaca, picha patsaj picha chungami carca. Paicunami, chaipi imatalla ruraj gentecunataca mandanajurca.

24Faraonbaj ushica, Davidpaj pueblomanda vichai rishpami, Salomón rurachishca paipaj huasipi causagrirca. Chaipimi Salomonga, Milo shuti pushtutapash rurachirca.

25Salomonga, chai huasita rurachishpa tucuchishca jipaca, Mandaj Diosman paillata rurashca altarpimi, huatapi quimsacaman animalcunata cushpa tucuilla rupachijurca. Shinallata Dioshuan ali cangapapash, animalcunata cushpami huañuchijurca. Inciensotapashmi, Mandaj Diosman cushpa cushnichijurca.

26Jatun mandaj Salomonga, Elot shuti puebloman chayanallapi tiyaj Ezión-geber shuti pueblopimi barcocunatapash rurachirca. Chai puebloca, Edom llactapi, Puca Cucha manñapimi saquirin.

27Hiram shuti runaca, chai barcocunapimi, barcota purichinata ali yachaj runacunata, Salomonbajta ruraj runacunahuan cacharca.

28Paicunami, Ofir shuti llactaman rishpa, chai llactamandaca ishcai patsaj pusaj chunga picha quintal curita apamushpa, jatun mandaj Salomonman cunajurca.