1Jatun mandaj Uzías shuti runa huañushca huatapimi, Jatun Diostaca mandashpa tiyarinapi tiyajujta ricurcani. Chaipimi, Pai jahualla churajunapash, Diospaj huasi ucupi mandarishca carca.
2Paipaj jahuataca, sucta alasyu serafín angelcunami ricurirca. Chai angelcunaca, ishcai alascunahuanga, paicunapaj ñavitami quilparinajurca. Caishuj ishcai alascunahuanga, paicunapaj chaquitami quilparinajurca. Shinallata, caishuj ishcai alascunahuanga, angashpami rinajurca.
3Chai angelcunaca, caishuj chaishujmi cashna ninajurca:
“Jucha illaj, jucha illaj, jucha illaj, tucui ushaita charij Jatun Diosmi.
Tucui cai pachaca, Paipaj ninan ushaihuan jundami” ninajurcami.
4Chashna caparinajujpica, Diospaj huasipi pungucunapash ninandami cuyunajurca. Shinallata, chai huasipica, cushnimi jundarca.
5Chaita ricushpami, cashna nijurcani: “¡Aij ñucalla, huañugrinimari! Ñucaca, mapa shimicunata rimaj runami cani. Mapa shimicunata rimaj runacunapaj chaupipimi causani. ¿Chashna runa cashpatachu, tucuita Jatun Mandaj Diostaca, ñuca ñavihuan ricujuni?” nijurcanimi.
6Shina nijujpimi, serafinpuramanda shuj angelca, ñucapajman jahuata shamurca. Paica, altar jahuapi rupajuj ninata shuj tenazahuan japishpami, apashpa shamurca.
7Shina shamushpa, chai ninata ñuca shimipi quimichishpami, cashna nihuarca:
“Cai ninahuanmi cambaj shimita tacarircani.
Chaimandami, can ima na alita rurashcapash ña anchurishca.
Cambaj juchacunapash ña illajmi cangui” nihuarcami.
8Chai jipami, Jatun Diosca:
“¿Pitata cachashayari, maijanshi ñucanchi imatalla nishcataca villagringa?” nijujta uyarcani.
Chaita uyashpami: “Ñucami caipi capani, ñucata cachahuailla” nircani.
9Shina nijpimi, Paica cashna nihuarca:
“Shina cashpaca rilla.
Chai gentecunaman, cashna nigri:
‘Ali uyashpapash, na yuyaita japishpami causanguichi.
Ali ricushpapash, ima cajta na yachashpami causanguichi’ nigri.
10Chashna rurashpami, cai gentecunapaj shungutaca, ashtahuan shinlliyachingui.
Paicunaca, uyashpapash, ricushpapash, ima cajtapash na yachashpa,
ñucapajman tigrarinatapash na yarishpami purinajunga.
Shinamandami paicunapaca, ali tucunapash napacha tiyanga” nihuarcami.
11Shina nijpimi ñucaca, cashna nircani:
“Jatun Dioslla, ¿ima punllacamanda chashna cangayari?” nircani.
Shina nijpimi Paica, cashna nihuarca: “Tucui pueblocunapash, chaipi causajcunapash tucuilla tucuringacaman,
alpacunapash shitashca saquiringacamanmi, chashna canga.
12Shinallata, caipi causajcunataca, Mandaj Dios tucuillata calpachijpi,
jichushca pambacuna mirangacamanmi, chashna canga.
13Patsajmanda, chungapuralla cai llactapi puchushca cashpapash, paicunapash tucuchi tucungami.
Shina cashpapash, roble shuti, encina shuti quirucunata urmachijpica, sapica saquirinrami.
Chai sapishnami, paicunapuramanda puchushcacunaca, Diospajlla causashpa miranga” nihuarcami.
Who We AreWhat We EelieveWhat We Do
2025 by iamachristian.org,Inc All rights reserved.
