DEUTERONOMIO 5 - Quichua Imbabura 2016

Chunga Mandashca Shimicunamanda(Éx. 20:1-17)

1Moisesca, tucuilla Israelcunata cayashpami cashna nijurca:

“Uyahuaichi tucuilla Israelcuna: Mandashca shimicuna imatalla nijujta, ali uyashpa pactachishpa causachunmi tucuicunaman villajuni.

2Mandaj Diosca, imatalla rurashpa pactachingapami, Horeb shuti urcupi ñucanchihuan ari nijurca.

3Mandaj Diosca, ñucanchi ñaupa taitacunahuanga, na chashna ari nijurcachu. Ashtahuangarin, cunanbi causanajuj tucui ñucanchihuammi chashna ari nijun.

4Mandaj Diosca, ñavi ñavimi cangunahuanga, urcupi nina rupajuj chaupimanda rimarca.

5Chai punllacunapica, Mandaj Dios imatalla nishcatami cangunaman villajurcani. Nina rupajujta manllashpami cangunaca na vichai rircanguichi. Chaipica cashnami nirca:

6‘Ñucami, Egipto llactapi gañan causanajushcamanda llujchimuj, canda Mandaj Taita Dios cani.

7Ñuca ñaupajpica, shuj rurashcalla dioscunata ama charinguichu.

8Imatapash llagllashpa rurashca dioscunata, imamambash rijchaj dioscunatapash ama ruranguichu. Jahua pachapi, cai pachapi, alpa ucupi, alpa ucu yacupi tiyajcunaman rijchajcunatapash napacha ruranachu cangui.

9Paicunataca ama cunguringuichu, ama alicachinguichu. Ñucami, canda Mandaj Taita Dios cani. Ñucaca ninan ushaita charij, ñucapajlla cachun munaj Diosmi cani. Ñucata fiñashpa, na cazuj taitacunapaj juchamandaca, paicunapaj huahuacunataca, quimsa miraicaman, chuscu miraicamambash llaquichij Diosmi cani.

10Ashtahuangarin Ñucata juyashpa, Ñuca mandashcacunata pactachijcunataca, huaranga huaranga miraicunacaman llaquishpa juyaj Diosmi cani.

11Canda Mandaj Taita Diospaj shutitaca, ama yangata rimanguillachu. Mandaj Diosca, Paipaj shutita yangata rimajtaca llaquichingapachami.

12Samana punllataca, Diospajlla cachun shicanyachinami cangui. Mandaj Dios mandashcashnami chashna pactachina cangui.

13Tucui imata ruranatapash, sucta punllacamanllami rurana cangui.

14Ashtahuangarin canchis punllapica, canda Mandaj Taita Diosman shicanyachishca samana punllami canga. Chai punllapica, ima ruranatapash ama ruranguichu. Cambash, cambaj churipash, cambaj ushipash, cambajta ruraj jaripash, huarmipash, cambaj huagrapash, cambaj burrupash, maijan animalpash, shuj llactamanda shamushpa cambaj huasipi causajuj runapash, chai punllapica, ima ruranatapash na ruranachu. Chaitaca, canshnallata, cambajta rurajcunapash samachunmi chashna pactachina cangui.

15Egipto llactapi gañan tucushpa causanajujta, Ñucapaj ninan ushaihuan, cangunata Mandaj Dios llujchimushcataca yarinami cangui. Chaimandami, samana punllata pactachinajuchun cangunata Mandaj Diosca mandashca.

16Cambaj taitata, cambaj mamataca, alicachishpa cazuchunmi, canda Mandaj Taita Diosca mandashca. Mandaj Taita Dios canman carashca llactapi unai punllacaman ali causanata ashtahuan mirachijuchunmi, chashna cazuna cangui.

17Ama huañuchinguichu.

18Cazarashca jahua, ama shujhuan causanguichu.

19Ama shuhuanguichu.

20Ama pitapash, chashnapachami nishpa juchachinguichu.

21Ama shujpaj huarmita, ñucapaj cashcanman yashpa ricunguichu. Ama pipaj huasitapash ñucapaj cashcanman yashpa ricunguichu. Shinallata, alpata, gañan jaritapash, huarmitapash, shujpaj huagratapash, burrutapash, ashtahuan imatalla charishcatapash, napacha ñucapaj cashcanman yashpa ricunachu cangui’ nijurcami.

Israelcunaca ninandami manllarinajushca(Éx. 20:18-26)

22Cai mandashca shimicunataca, canguna urcupi tandanajushca cajpimi, Mandaj Diosca nina rupajuj yana fuyu ucumanda, tucuicuna manllarijta ninandapacha rimarca. Chai jipaca, ashtahuanga na rimashpami, ishcai tabla rumicunapi quilcashpa ñucaman cuhuarca.

23Shinallata, yana fuyu chaupimanda rimajtapash uyashpami, urcupi nina rupajujtapash ricurcanguichi. Shina cajpimi, Israel ayllucunata mandajcunapash, rucu taitacunapash, ñucapajman shamurcanguichi.

24Shina shamushpami cashna nircanguichi: ‘Ñucanchita Mandaj Taita Diosmi, Pai ninan ushaita charishcatapash, Pai ninan jatun cashcatapash ñucanchiman ricuchirca. Shinallata, nina chaupimanda rimajtapash uyarcanchimi. Cunanga, shuj runaman, Mandaj Dios rimajpipash, chai runaca na huañushpa causajujtami ricurcanchi.

25Cunanga, ¿imashpata huañuna canchi? Chai ninanda rupajuj ninaca ñucanchita tucuchingami. Ñucanchita Mandaj Dios rimajta cutin uyashpaca, huañuringamari.

26Runacunaca, ¿imashpata, nina chaupimanda Taita Dios rimajta, ñucanchi uyashcashna uyashca cashpapash causaj saquiringayari?

27Shina cashcamanda, ñucanchita Mandaj Taita Dios, imatalla nijujta uyangapa ripailla. Ñucanchita Mandaj Taita Dios imatalla nishcata, can villajpica, ñucanchica cazupashunllami’ nircanguichimi.

28Canguna chashna ninajujta Mandaj Dios uyashpami, Mandaj Diosca cashna nihuarca: ‘Cai gentecuna canda imata ninajujta, imata rimanajujtapash uyarcanimi. Paicunaca alitami ninajun.

29¡Paicuna nishcashnalla, shungumandapacha, Ñuca mandashca shimicunata punllandi pactachishpa causashpaca alipachami canga. Shina cashpami, paicunapash, paicunapaj huahuacunapash, tucui causaipi aliguta causanajunga!

30Cunanga: Cangunapaj carpacunaman ucha tigraichilla ningapa rilla.

31Can Ñucahuan caipi saquirijpimi, cai tucui mandashca shimicunataca villasha. Chaicunata, paicunaman can yachachijpimi, Ñuca carashca llactapi causashpa pactachinajunga’ nihuarcami.

32Cunanga, Mandaj Dios mandashcata pactachishpa, aligutami causana canguichi. Alimambash, lluquimambash, napacha anchurishpami tucuita cazushpa causanguichi.

33Mandaj Dios mandashcataca tucuitami pactachishpa causana canguichi. Shina causashpami, cangunaman carashca llactapica, unaicaman aliguta causanguichi.