1Mandaj Diosca, Moisestaca cashnami nijurca:
2“Israelcunamanga cashna nishpa villangui: ‘Maijan huarmipash vijsayu tucushpa, jari huahuata ungushpaca, canchis punllacamanmi mapa canga. Mashna punllacunata, quilla nanaihuan canashnami mapa canga.
3Chai jari huahuataca, pusaj punllapimi circuncisionda rurana canga.
4Shinallata, chai huarmica, mapa illaj tucungapami, quimsa chunga quimsa punllacaman shuyanga. Pai mapa illaj tucuna punlla pactangacamanmi, Diospajlla shicanyachishcataca, imatapash na tacaringa. Diospajlla huasimambash na shamungachu.
5Huarmi huahuata ungushpaca, ishcai semanacamanmi mapa canga. Mashna punllacunata, quilla nanaihuan canashnami chashna canga. Chai huarmica, mapa illaj tucungapami, sucta chunga sucta punllacaman shuyanga.
6Mapa illaj tucuna punllacuna pactajpica, jari huahuamanda, na cashpaca, huarmi huahuamanda cashpapash, Diosman cushpa tucuillata rupachingapaca, shuj huatata charij maltun llamatami apamunga. Juchamanda cungapapash, shuj palomata, na cashpaca shuj urpita, Dioshuan tuparina jatun carpaman apamushpami sacerdoteman cunga.
7Chai sacerdotemi, chai huarmipaj juchamanda, Mandaj Diosman ofrendata cushpa rupachinga. Chashna rurajpimi chai huarmica, yahuar shamujushcamanda mapa illaj saquiringa. Cai mandashcacunaca, jari huahuata cashpa, huarmi huahuata cashpapash ungujpi pactachinatami villajun.
8Maltun jari llamaguta cungapa na charishpaca, ishcai urpita, na cashpaca ishcai palomatami apamunga. Chaicunataca, shujtaca Diosman cushpa tucuillata rupachingapa, caishujtaca, juchamanda cungapami apamunga. Chaita sacerdote, Diosman cushpa rupachijpimi, chai huarmica mapa illaj saquiringa’ nishpa villai” nijurcami.
Who We AreWhat We EelieveWhat We Do
2025 by iamachristian.org,Inc All rights reserved.
