HECHOS 20 - Quichua Imbabura 2016

Macedoniaman, Greciaman Pablo rishcamanda

1Caparinajui tucurishca jipami Pabloca, crijcunata cayashpa, yarichishpa shinllita rimarca. Chai jipaca, ugllarishpami, “cayacaman nishpa”, Macedonia llactaman rirca.

2Chai llactacunata rijushpaca, yarichishpa shinllita ninanda rimashpami, Grecia llactaman chayagrirca.

3Quimsa quillata chaipi cashca jipaca, Siria llactaman barcopi rigrijushpami, judiocuna paita huañuchingapa chapanajujta yacharca. Chaimandami, Macedonia llactamanllata tigrashpa rirca.

4Shina cajpimi, Bereamanda Sópater shuti runapash, Tesalonicamanda Aristarco shuti, Segundo shuti runacunapash, Derbemanda Gayo shuti runapash, Listramanda Timoteopash, Asia llactamanda Tíquico shuti, Trófimo shuti runacunapash, Pablotaca cumbashpa rinajurca.

5Paicunaca, ñucanchita ñaupashpami, Troas shuti pueblopi shuyangapa rirca.

6Ñucanchica, levadura illaj tandata micuna punllacuna yalijpimi, Filipos pueblomanda barcopi rircanchi. Chaimanda rishpami, picha punlla jipaca paicunahuan Troas shuti pueblopi tuparircanchi, chaipimi canchis punllacaman saquirircanchi.

Pabloca, Troas shuti pueblopi causajcunatami “cayacaman” ningapa rishca

7Semana callari punllapimi, Jesusta catijcunaca tandata chaupishpa micungapa tandanajurca. Chaipimi Pabloca, cayandi punlla ña rina cashpa, chaupi tutacaman yachachijurca.

8Tandanajushca altibajopica, tauca michacunatami japichishca carca.

9Chaipica, Eutico shuti huambrami ventanapi uyashpa tiyajurca. Pablo unai unaita villajujpimi, chai huambraca, puñui mishajpi, quimsa altibajomanda alpaman urmarca. Ricungapa uriajushpaca huañushcatami japigrirca.

10Shina cajpi, Pablo uriajushpa, chai huambraguta japishpa ugllarishpaca:

“Na manllarinachu canguichi, causajllatami” nirca.

11Pablo cutin vichai tigrashpaca, tandata micuchun chaupishpa carashca jipami, yurajlla punllayangacaman villajurca. Chai jipaca llujshishpa rircallami.

12Chai huambrataca, causajta huasiman pushashpami tucuicuna ninanda cushijunajurca.

Troas shuti pueblomanda, Mileto shuti puebloman rishcamanda

13Ñucanchica, Asón shuti pueblopi, Pablota tuparingapami barcopi ñaupashpa rircanchi. Pabloca, chaquilla ringapa munajpimi chaipi tuparishun nishca carca.

14Asón shuti pueblopi tuparishpami, barcopi tiyarishpa Mitilene shuti puebloman rircanchi.

15Chaimanda barcopi llujshishpaca, cayandi punllami, Quío shuti llacta chimbata yalircanchi. Chai cayandica, barcocuna shayarina Samos shuti llactamanmi chayarcanchi. Chaimanda llujshishpaca, Trogilio shuti pueblopi ashata saquirishpami, chai cayandica, Mileto shuti puebloman chayagrircanchi.

16Pabloca, Pentecostés punllapica, Jerusalenman ucha chayangapa munashpami, “Asia llactapi tiyaj Éfeso pueblomanga na chayashpa yalishalla” yajurca.

Pabloca, “cayacaman” nishpami Mileto pueblopi villajushca

17Pabloca, Mileto pueblopi cashpami, Éfeso pueblopi tandanajuj ancianocunata cayachun cacharca.

18Paicuna chayamujpimi Pabloca, cashna nijurca: “Asia llactaman ñuca chayamushca punllamandapacha, imashna cangunahuan causashcataca, alimi yachanguichi.

19Apunchi Jesuspajtaca, na jariyashpa, ninan huacaihuanmi tucuita rurajushcani. Shinallata, judiocuna huañuchingapa pacalla chapanajujpipash llaquicunata apajurcanillami.

20Canguna ashtahuan ali catichunmi, tucuicunapaj ñaupajpi, cangunapaj huasicunapipash, Diospaj Shimita villashpa yachachijurcani.

21Judiocunaman, na judiocunamanbash: ‘Llaquirishpa Taita Diospajman tigrarichi, Apunchi Jesucristota crichi’ nishpami villajurcani.

22Jerusalenbi ñuca ima tucunata na yachashpapash, ñuca shungupi nijujta cazushpallami cunanga rigrijuni.

23Shinallata, ‘prezuna huasipi churajpi, maijan pueblopi cashpapash ninandami llaquichi tucungui’ nishpami, jucha illaj Diospaj Espirituca villahuarca, chaitallami yachani.

24Shina nijpipash na manllanichu, ñuca causaitapash na llaquinichu. ‘Taita Diosca ninanda juyashpami quishpichijun’ nishpa villachunmi, Apunchi Jesusca ñucaman mingahuarca. Chaitaca, ñuca huañuna punllacaman, cushijushpa pactachinatami charini.

25Cangunahuan cashpami, Taita Dios mandajuj llactapi causagrinamanda villajurcani. Cunanga, chai villashcata uyashcacunaca, cutinga ñana ricui ushanachu cahuanguichi.

26Chaimandami, ‘pai na villashcamandami huañuiman rin’ nishpaca, pipash na ñucata juchachi ushahuanguichi.

27Taita Dios imata nichun mandashcatapash tucuitami cangunaman villashcani.

28Shina cashcamanda, cangunapash aliguta yarishpami causana canguichi. Shinallata, tandanajushca crijcunatapash, llamacunata aliguta michijshna michinajuchunmi, jucha illaj Diospaj Espirituca cangunataca churarca. Paicunataca, Apunchi Jesusca, Paipaj yahuarhuanmi randirca.

29Shinallata, ñuca rishca jipaca, llamacunapaj chaupipi millai atujshna yaicushpa, crijcunata tucuchingapa munangapachami, chaitaca alimi yachani.

30Cangunapuramandami, jatun na alicunata rimaj runacuna jatarishpa, Jesusta catijcunata pandachishpa paicunata catichun munanajunga.

31Shina tucunata yachashpami, rijchariajshna causana canguichi. Quimsa huatatami, tutandi punllandi, shuj shujlla japishpa, huacashpa shinllita tacurishpa, yachachijurcani. Chaicunataca na cunganachu canguichi.

32Cunanga huauquicuna, cangunataca, Taita Diosmanmi mingani. Paipaj yachachishca shimita cazushpa causashpami, ashtahuan ali catishpa, Diospajlla causajcunahuan tucuicuna japigringuichi.

33Pipaj culquitapash, curitapash, churajunatapash na munashpa ricushcanichu.

34Ashtahuangarin, ñuca imata munashpapash, ñucata cumbajcuna imata munajpipash, ñuca maquihuan shinlli imagutapash rurashpami japircani. Chaitaca cangunallata alimi yachanguichi.

35Chashna rurashpami, ‘imagupash illajcunamanga caranami canguichi’ nishpa yachachijurcani. ‘Imagupash illajcunaman carajmi, carajpi japijcunataca yali cushijunga’ nishpami, Apunchi Jesusca yachachishca. Chaitaca, yarinami canguichi” nijurcami.

36Shina tucuita nishca jipami, tucuicunahuan cungurishpa, Pabloca Diosta mañarca.

37Shina cajpimi, tucuicuna ninanda huacashpa, Pablotaca ugllarishpa, muchanajurca.

38“Cunanmandaca, ñana cutinga tuparishunllu” nijpimi, chashna ninanda llaquirinajurca. Chai jipami Pablotaca, barcopi yalichingapa rinajurca.