PROVERBIOS 11 - Quichua Imbabura 2016

1Mandaj Diosca, shuhuashpa pezaj balanzataca na ricunayachinllu.

Na shuhuashpa pezaj balanzatami chasquin.

2Jariyashpa jatun tucuncunaca, pingai tucungami.

Ashtahuangarin, ali shunguta charijcunami, ali yachanata charin.

3Ima na alitapash na rurashpa causajcunataca, ali ñandami pushanga.

Ashtahuangarin, juchata rurajcunataca, paicuna jatun na alita rurashcallatami tucuchinga.

4Dios llaquichijui punllapica, imata charishcapash yangallatami canga.

Ashtahuangarin, alitalla rurashcacunami, huañuimanda quishpichinga.

5Ima pandatapash na ruraj runa, alitalla rurashcacunami, pai purina ñandaca alichinga.

Ashtahuangarin, Diosta na manllaj runaca, paillata na manllashcamandami urmanga.

6Alitalla rurajcunataca, paicuna alita rurashcallatami cacharichinga.

Ashtahuangarin, juchata rurajcunaca, paicunapaj juchapillatami japi tucunga.

7Diosta na manllaj runa huañujpica,

pai imata shuyajushcapash, imatalla charinacunapash tucuringami.

8Alitalla ruraj runaca, ninan llaquimandapash cacharichi tucungami.

Ashtahuangarin paipaj randica, Diosta na manllaj runatami llaquipi churanga.

9Mishqui shimi jayaj shungu runaca, imatapash yangata rimashpami shujcunatapash llaquichin.

Ashtahuangarin, alitalla ruraj runaca, ali yuyaihuan rimashpami, pitapash na llaquichin.

10Alitalla rurajcuna ñaupajman rijpica, pueblopi causajcunapash cushijunmi.

Ashtahuangarin, Diosta na manllajcuna huañujpica, cushijuitami ruranajun.

11Aliguta rurajcunata bendiciajpimi, pueblopash jatunyachi tucushca canga.

Ashtahuangarin, Diosta na manllajcuna rimajpica llaquicunami shamunga.

12Ali yuyaita na charij runaca, paipaj cumbatami yangapi churan.

Ashtahuangarin, ali yuyaita charij runaca, upallami saquirinlla.

13Pimambash parlajlla runaca, na villanatapash villanllami.

Ashtahuangarin, ali yuyaita charij runaca, imatapash na yangata parlanllachu.

14Mandajcuna na ali yuyaihuan mandajpica, llactaca llaquipimi urmanga.

Ashtahuangarin, ali yuyaita cungapa taucacuna tiyajpica, ima llaquipash na japingachu.

15Na rijsishca runa culquita mañajujpi,

paipaj randi shayarij runaca llaquitami apanga.

Ashtahuangarin, culquita mañajpi na randi shayarij runaca, manllai illajmi causajunga.

16Ali shunguta charij huarmica, alicachi tucushcami canga.

Shinllitapacha imatapash rurashpa causajcunaca, charijyangami.

17Pitapash juyashpa llaquij runaca, paipajllatami alita ruran.

Ashtahuangarin, pitapash na llaquishpa ninanda llaquichij runaca, paillatami llaquipi yaicujun.

18Diosta na manllaj runaca, imatapash umachingapallami rurajun.

Ashtahuangarin, alitalla ruraj runamanga, imatapash alicunatami cunga.

19Imashnami alitalla ruranaca causaiman pushan,

shinallatami na alita ruranaca huañuiman pushajun.

20Mandaj Diosca, na ali shungu runacunataca na ricunayachinllu.

Ashtahuangarin, ima pandatapash na rurashpa causajcunami, Paipaj ñaupajpi juyailla ricurin.

21Na alita ruraj runaca, cunan cashpa, jipaman cashpapash llaquichi tucungapachami.

Ashtahuangarin, alitalla ruraj runacunapaj miraicunaca, na llaquichi tucungachu.

22Juyailla ñavi cashpapash, juizu illaj huarmica,

cuchipaj singapi, curi argollata churachishcashnami.

23Alitalla rurajcunaca, alita ruranatallami munan.

Ashtahuangarin, Diosta na manllajcunaca, fiñanajuitallami shuyanajun.

24Imatapash na mitsashpa carajcunaca, ashtahuanmi japinga.

Huaquingunaca, mitsashpa, paipajlla charishpami, imapash illaj tucunajun.

25Shujcunaman imatapash carashpa causajcunaca, ashtahuanmi charinga.

Shujcunaman imatapash caraj runaca, na munangacaman micushpami causanga.

26Granocunata tandachishpa paipajlla alichij runataca, ima llaquipash japishpami ali canman ningami.

Ashtahuangarin, granocunata jatuj runataca bendiciangami.

27Alitalla ruraj runaca, paitapash yanapachun charingami.

Ashtahuangarin, llaquichingapa munaj runataca, chai llaquillatami japinga.

28Pai imata charishcacunatalla yariashpa causaj runaca, tucuringami.

Ashtahuangarin alitalla rurajcunaca, quiru malquicuna mushujta viñashcashnami canga.

29Paipaj huasipi causajcunata na ali ricushpa causaj runaca, tucuringallami.

Shinlli shungu runaca, ali yachajushca runapajta rurashpami causanga.

30Alitalla ruraj runa imaguta rurashcapash, causaita cuj yurashnami.

Alipacha yachajushca runaca, tucuicuna aliguta causachunmi villashpa yachachijun.

31Alitalla ruraj runa, cai pachapi tucui alita japina cajpica,

¡Diosta na cazushpa juchata ruraj runacarin, llaquita japingapachami!