1Taita Dioslla,
Candallami Sion pueblopica alicachinga.
Imata pactachisha nishcatapash, Canmanmi pactachinga.
2Ñucanchi mañanajujtaca, Canmi uyajungui.
Tucui gentecunami, Cambajman shamunga.
3Na alita rurana munaicunarami, ñucataca mishajun.
Ashtahuangarin ñucanchi na cazushcataca, Canmi perdonapangui.
4Can agllajpi, Cambaj ñaupajman chayan runaca, ninandami cushijun.
Cambaj huasi patiocunapi causachunmi agllarcangui.
Cambaj huasipi ima alicuna tiyashcahuanmi cushijushun.
Cambajlla huasipi tiyashcacunatami micushun.
5Canga, jatun manllarina alicunata rurashpami, ñucanchiman tigrachingui.
Ñucanchita quishpichij Taita Diosmi cangui.
Tucui cai pacha tucuri manñacunapi causajcunapash,
mama cucha tucuri caru llactacunapi causajcunapash, Candallami shuyanajun.
6Canmi, urcucunataca Cambaj ushaihuan shinllitapacha shayachishcangui.
Cambaj ninan ushaihuanmi, shinllitapacha shayachishcangui.
7Canmi, mama cucha huacajujtapash, chai cucha jatarishpa ninanda huacantapash,
llactacunapi causajcuna caparinajujtapash upallayachishcangui.
8Shinamandami, cai pachapi causajcunaca,
tucuita Can juyailla rurashcacunata ricushpa manllarinajun.
Canmi tutamandatapash, chishitapash juyailla churashcangui.
9Cai pachata ricuj shamushpami tamiachipangui.
Shinami, ninandapacha fucuchingui.
Can Taita Diospaj jatun yacu jundashcahuanmi,
alpapi granocunataca Can munashcashna aliguta fucuchingui.
10Huachucunapash quilparijtami tamiachingui.
Larcayashpa, urai rijtami tamiachingui.
Tamiahuan alpata amujyachishpami, tucuita bendiciashpa viñachipangui.
11Canmi huatacunataca, coronata churachinshna cushichingui.
Cambaj fuyucunatapash, yacuyachishpami tamiamungui.
12Jichushca pambapi tamiachishpami jihuata viñachingui,
Urcucunapash juyaillami ricurin.
13Jatun pambacunapash, animalcuna jundashcami.
Pugru pambacunapash, granohuan quilpashcami.
Chashna cashpami, ninanda cushijushpa caparishpa candanajun.
Who We AreWhat We EelieveWhat We Do
2025 by iamachristian.org,Inc All rights reserved.
