1 JUAN 4 - Quichua Imbabura 2016

Diospaj Espiritumandapash, Cristota fiñaj runapaj espiritumandapash

1Juyashca crijcuna, “Diospaj espiritutami charinchi” nishpa villajcunataca, na tucuicunata crinallachu canguichi. Ashtahuangarin, Taita Diospaj Espirituta charijta, na charijtapash, alipacha rijsinarami canguichi. Cai pachapica, llulla profetacunaca ashtacacunami mirashca.

2Taita Diospaj Espíritu yarichijpi villajcunaca: “Jesucristoca, runa aichayuj tucushpami shamurca” ninajunmi. Chashna nishpa villajpillami, Taita Diospaj Espíritu cajtaca yachai ushanguichi.

3“Jesucristoca, na runa aichayuj tucushpa shamushcachu” nishpa villajcunaca, napacha Taita Diospajchu. Ashtahuangarin, Cristota fiñaj runapaj espíritu yuyaita cujpimi, chashna villanajun. Chashnacuna shamunataca, cangunallata uyashcanguichimi. Cunanga, ñamari cai pachapi purinajun.

4Ñuca huahuacunalla, cangunaca Taita Diospaj cashpami, paicunataca mishai ushashcanguichi. Cangunapi causajuj Diosca, cai pachapajtalla rurachishpa mandajuj diablota yali ushaita charijpimi, chashna mishashcanguichi.

5Paicunaca, cai pachapajlla cashpami, cai pachapi imapash tiyajcunamanda villanajun. Chaitaca, cai pachapajtalla rurashpa causajcunami uyanajun.

6Ñucanchica, Taita Diospajmi canchi. Taita Diosta maijambash rijsishpaca, ñucanchi villajujtapash cazungami. Na Taita Diospaj cashpaca, ñucanchi villajujtaca napacha cazungachu. Shinamandami, Diospaj Espíritu yuyaita cujpi, na llullashpa villajujtapash, pandachishpa villachijuj espirituta charijtapash yachanchi.

Taita Diosca ninan juyaitami charin

7Juyashca crijcuna, caishujhuan chaishujhuan ninanda juyarishpa causashunchi. Juyarishpa causanaca, Taita Diosmandami shamujun. Taita Diospaj huahuacuna cashpami, juyarishpa causashpa, Taita Diostapash rijsishpa causanchi.

8Juyaita na charishpaca, Taita Diostaca na rigsinllu. Taita Diosca juyajpachami.

9Causaita causagrinata ñucanchi japigrichunmi Taita Diosca, Paipaj shujlla Churita cai pachaman cachamushpa, ñucanchita juyajushcataca ricuchirca.

10Ñucanchica, Taita Diosta na juyashpami causarcanchi. Ashtahuangarin, Diosmi ñucanchitaca juyarca. Ñucanchi juchacunata anchuchingapa, Paipaj Churita cachamushpami, ñucanchita juyajushcataca ricuchijun.

11Juyashca crijcuna, ñucanchitaca Taita Diosmi ninanda juyashca. Shinamandami ñucanchipash, caishujhuan chaishujhuan ninanda juyarishpa causana canchi.

12Taita Diosca, pipaj ñavipipash napacha ricurishcachu. Ashtahuangarin, caishujhuan chaishujhuan juyarishpallami, Taita Dios ñucanchi shungupi causajujtaca yachanchi. Shina causanajushpami, Diospaj juyaitaca, ashtahuan ali pactachinajunchi.

13Paipaj Espirituta, ñucanchiman carajpimi, Dioshuan causajushcatapash, Pai ñucanchi shungupi causajushcatapash yachanchi.

14Shinallata, Taita Diosca, cai pachapi causajcunata Quishpichij cachun Paipaj Churita cachamushcata, ñucanchillata ricushca cashpami villanajunchi.

15Maijan cashpapash: “Jesusca, Taita Diospaj Churimi” nishpa, villajcunapaj shungupimi Taita Diosca causajun. Paicunapash, Taita Dioshuanmi causanajun.

16Taita Dios ñucanchita ninanda juyajujta yachashpami, Paitaca crishcanchi. Taita Diosca ninan juyaitami charin, shinamandami maijambash chai juyaita charishpaca, Taita Dioshuan causajun, Taita Diospash paihuanmi causajun.

17Aligutapacha juyarishpa causashpallami, gentecuna imata rurashpa causashcata, Dios tapushpa llaquichijui punllapica, na manllashpa cushijushun. Ñucanchipash, cai pachapica, Jesucristo causajunshnami causanajunchi.

18Juyaihuan causajpica, manllaica illangami. Diospaj juyai ñucanchipi cashpami, tucui manllaita anchuchin. Maijambash manllaihuan causajushpaca, llaquichi tucuna cashpami chashna causajun. Chashna manllaihuan cashpaca, Diospaj juyaitaca nara charinllu.

19Taita Dios punda ñucanchita juyashcamandami, Paitaca juyanchi.

20“Taita Diosta juyanimi” nijushpapash, shuj crijta na ricunayachishpaca, llullapacha cashcatami yachanchi. Paipaj huauquita ricujushpapash, na juyai ushashpaca, ñavipi na ricurij Taita Diostacarin, ¿imashnata juyai ushangayari?

21“Taita Diosta juyashpaca, cambaj huauquitapash juyangui” nishpa Cristo mandashcatami charinchi.