2 CRÓNICAS 2 - Quichua Imbabura 2016

Salomonhuan, Hiram shuti runahuan tucuita pactachingapa ari ninajushcamanda(1 Rey. 5:1-18; 7:13-14)

1Salomonga, Mandaj Diospaj shutipi mañana huasitapash, llactata mandashpa tiyajuna huasitapashmi shayachingapa yarijurca.

2Salomonga, Tucui imatalla aparinajuchunga, canchis chunga huaranga runacunata, urcupi rumicunata faquishpa aliguta ruranajuchunga, pusaj chunga huaranga runacunatami churarca. Paicunata ricushpa mandachunga, quimsa huaranga sucta patsaj runacunatami churarca.

3Salomonga, Tiro shuti llactata jatun mandaj Hiram shuti runapajmanmi, cashna nichun cacharca: “Ñuca taita Davidhuan rurashcashnallata, ñucahuambash rurapailla. Pai causana huasita shayachijuchun, cedro caspicunata paiman cachamushcashna cachamupailla.

4Ñucami, ñucata Mandaj Taita Diospaj shutipi mañana huasita, Paipajlla cachun Paiman mingangapa shayachisha. Chaipica, mishquilla ashnajun inciensota cushnichingapa, Paipajlla shicanyachishca tandatapash punllandi churangapa, samana punllacunapi, llullu luna punllacunapica, tutamandapash, chishipash, animalcunata Diosman cushpa tucuillata rupachingapami, shayachina cani. Shinallata, ñucanchita Mandaj Taita Diosta yarishpa shuj jatun cushijuita rurangapami shayachina cani. Chai ruranaca, Israel llactapica tucui causaipajmi canga.

5Ñuca shayachina huasica, jatun huasimi canga. Ñucanchi Taita Diosca, tucui dioscunatapash yali jatun Dios cajpimi, chashna rurana cani.

6Ashtahuangarin, Pai causana huasitaca, ¿pita shayachi ushangayari? ¿Jahua pachapash, ashtahuan jahuaman jahua pachacunapash, pai causangapaca pactanllu? Paipaj huasita shayachingapaca, ¿ñucaca pita caniyari? Ashtahuangarin, inciensota paipaj ñaupajpi cushnichingapallami, shayachingapa munani.

7Cunanga, curita, culquita, bronceta, jirruta imatapash ruranata ali yachaj, shuj runata cachamupai. Paica morado, puca, azul telacunata imatapash ruranata ali yachaj cachun. Shinallata, rumita faquishpa juyaillaguta ruraj runataca, Judá llactapi, Jerusalenbi imatalla ñucaman ruranajuj runacunahuan pacta ruranajuchun cachamupangui. Chaicunataca, ñuca taitallatami ña alichijushca carca.

8Shinallata, Líbano shuti urcupi tiyaj caspicunamandaca, cedro caspicunata, ciprés caspicunata, sándalo caspicunata cachamupangui. Cambajta rurajcunaca, Líbano shuti urcupi caspicunata cuchunata ali yachajcuna cajtami yachani. Cambajta rurajcunata yanapachunga, ñucapajta ruraj runacunatami cachapasha.

9Ñuca shayachina huasica ninan jatun, juyailla huasi cana cajpimi, chashna ashtaca caspicunata alichinajuchun cachamuna capangui.

10Caspicunata cuchuj runacunamanga, pusaj huaranga pusaj patsaj quintal trigota, pusaj huaranga pusaj patsaj quintal cebadata, sucta patsaj pusaj chunga huaranga litro vinota, sucta patsaj pusaj chunga huaranga litro aceitetami curcani” nichunmi cacharca.

11Tiro shuti llactata jatun mandaj Hiram shuti runaca, cashna quilcashpami Salomonman tigrachimurca: “Mandaj Diosca, Pai agllashcacunata juyashpami candaca, paicunata jatun mandaj cachun churashca” nircami.

12Hiram shuti runaca, cashnatapashmi nichun cachamurca: “Israelcunata Mandaj Taita Diosca, jatunyachi tucushca cachun. Paimi, jahua pachatapash, cai pachatapash rurarca. Mandaj Diospaj huasitapash, llactata mandana huasitapash shayachijuchunga, paillatami cashna alipacha yachajushca, ali yuyaita charij jatun mandajta, Davidman cushca.

13Ñucaca, imata ruranatapash ali yachaj, ali yuyaita charij, Hiram-abi shuti runatami cachamurcani.

14Paica, Dan shuti ayllupuramanda shuj huarmipaj churimi capan. Ashtahuangarin paipaj taitaca, Tiro shuti pueblomandami carca. Hiram-abi runaca, curita, culquita, bronceta, jirruta, rumita, caspita, morado, azul, yana puca telacunata, lino telata, imatapash ruranata alipacha yachaj runami. Shinallata, caspita llagllashpami, imashna juyaillaguta rurachun mañashcata ruranlla. Paitaca, ali yachajushca runacunahuambash, cambaj taita ñucata mandaj David charishca ali yachajushca runacunahuambash churanguilla.

15Cunanga, ñucata mandaj cambajta ruraj ñucaman carasha nishca trigota, cebadata, aceiteta, vinotaca cachamupailla.

16Ñucanchipash, Líbano shuti urcupica, mashnata can munashca caspicunata cuchugrishunllami. Chai caspicunataca, mama cuchatami balsacunapi churashpa, Jope shuti pueblocaman apamushun. Chai pueblomandaca, canllata Jerusalenman apachun mandanguillami” nishpami cachamurca.

17Chai jipami Salomonga, shuj llactamanda shamushpa Israel llactapi causanajuj runacunataca, tucuillata yuparca. Paipaj taita David yupashca jipami, paipash yuparca. Paicunaca, 153.600 runacunami carca.

18Chai runacunamandaca, 70.000 runacunatami imatalla aparinacunapi churarca. 80.000 runacunataca, urcupi rumita faquinajuchunmi churarca. 3.600 runacunataca, imatalla ruranacunata ricushpa mandachunmi churarca.