SANTIAGO 3 - Quichua Imbabura 2016

Jarcarishpa rimanamanda

1Ñuca juyashca huauquicuna. Cangunapurapica, na tucuicuna yachachijcuna tucunachu canguichi. Yachachijcunaca, ashtahuan pactachishpa ricuchigrinatami yachana canguichi.

2Tucuicunami, imatapash pandata rimashpa llaquichinchilla. Maijan cashpapash, na pandata rimashpa na llaquichij cashpaca, ima pandatapash na ruraj cashpami, paipaj cuerpotapash jarcari ushan.

3Caballocunapaj shimipica, ñucanchita cazuchunmi huascata churanchi. Ñucanchi maiman munashcaman richunmi chashna churanchi.

4Barcocunatapash ricunami canguichi: Jatun cajpipash, ninanda huairajushpaca, maimambash apanllami. Chai barcocunataca, shuj uchilla timón shuti caspihuanllami, maiman ringapa munashpapash tigrachi ushan.

5Shinallatami, ñucanchi cuerpopi uchilla jallupash, ninanda jariyashpa cacharishcata rimanlla. ¡Ricuichi, shuj ashalla ninagullata, shuj jatun sachataca rupachishpa tucuchinllami!

6Jallupash, ninashna cashpami, jatun na ali. Jalluca, ñucanchi cuerpopi tiyajushpami, tucui ñucanchi cuerpota mapayachin. Jalluca, ucu pacha ninata japichishcashna cashpami, ñucanchitaca cai causaipillata rupachijshna huaglichijun.

7Tucui tiyashca millai animalcunata, alasyu animalcunata, culebracunata, mama cuchapi tiyaj animalcunatapash, gentecunaca mansoyachi ushashcami.

8Ashtahuangarin jallutaca, maijambash na mansoyachi ushanllu. Jallutaca huañuchijlla venenoshna jatun na ali cajpimi, pipash na jarcai ushan.

9Chai jalluhuanmi, Taita Diostaca alicachinajunchi. Chaihuanllatami, Taita Diosman rijchajta rurashca gentecunatapash, “ima llaquipash japishpami ali canman” nishpa rimanajunchi.

10Chai shimimandallatami bendicianapash, ninanda na alicachinapash llujshijun. Ñuca juyashca crijcuna, napacha chashna canachu canguichi.

11¿Maijan pugyumandapash, chaimandallata, mishqui yacupash, jayaj yacupash llujshinllachu?

12Ñuca juyashca huauquicuna. ¿Higo yurapica, aceitunacuna fucunllachu? ¿Uva yurapica, higocuna fucunllachu? Shujlla pugyumandaca, cachi yacupash, mishqui yacupash napacha llujshinllu.

Ali yachanaca jahua pachamandami shamun

13Cangunapurapi ali yachajushca, ali yuyaita charijcuna pipash tiyashpaca, aliguta causashpa, juyai shunguhuan imatapash rurashpami ricuchina canguichi.

14Ashtahuangarin, ninanda fiñarishpa, jayaj shunguhuan, na ali yuyaihuanmi causanajunguichi. Shina cashcamanda, jariyashpa rimashpa, llullanataca saquinami canguichi.

15Chai panda yachanacunaca, jahua pachamandaca na shamunllu. Ashtahuangarin chaicunataca, cai pachapi na ali yuyaicunata churaj diablomi gentecunaman yarichijun.

16Maipimi fiñanajushpa, na ali yuyaicunata rurashpa causanajun, chaipimi musparishpa, jatun na alita ruranacunapash shamujun.

17Ashtahuangarin, jahua pachamanda shamujuj ali yachajunaca, pundaca, ima mapapash illaj canatami yarichijun. Chai jipaca ali causaita, juyai shunguta, juyaita charinata, shujcunata llaquishpa causanata, imatapash aliguta ruranatami yarichijun. Chashnallami, mishqui shimi jayaj shungu canata saquishpa tucuicunahuan ali causanguichi.

18Alitalla rurashpa causajcunaca, imatapash alitalla rurashcamandami, cushijushpa causanata japinga.