JUECES 12 - Quichua Imbabura 2016

1Shinamandami Efraín ayllu runacunaca, tandanajushpa janajman yalishpa, Jefté runataca cashna ninajurca: “Amón llacta gentecunahuan macanajugrishpaca, ¿imashpata ñucanchitaca, canhuan richun na cayarcangui? Chaimandami cambaj huasitapash, candapash rupachigrinchi” ninajurcami.

2Jefté runaca cashnami nijurca: “Ñucapash, ñuca llactapi causajcunapash, Amón llacta gentecunahuan jatun fiñanajuita charishpa, cayachun cachajpica, quishpichingapa na shamungapa munashpami, chaipillata saquirircanguichi.

3Ñucanchita na yanapangapa shamujpimi, huañunatapash na manllashpa, Amón llacta gentecunahuan macanajungapa rircanchi. Paicunataca, Mandaj Diosmi ñuca maquipi churarca. Cunanga ¿imashpata ñucahuan macanajungapa vichai shamunguichi?” nircami.

4Shina nishpami Jefté runaca, Galaad llactapi causanajuj tucui runacunata tandachishpa tucuilla, Efraín aylluhuan macanajushpa misharca. Efraín ayllucunaca cashnami nishca carca: “Cai Galaad llactapi causajcunaca, Efraín ayllupuramanda pacajushpa rishpami, Manasés llactapaj, Efraín llactapaj chaupipi causanajunguichi” nishcami carca. Shina nishcamandami, Efraín ayllucunaca mishai tucurca.

5Galaad llactapi causajcunaca, Efraín ayllucunataca, Jordán yacuta maita chimbanallatami quichurca. Efraín ayllupuramanda pacajushpa shamujcuna: “Chimbaman yalingapami munani” nijpica: “¿Efraín ayllupurachu cangui?” nishpami, Galaad llacta runacunaca tapunajun carca. Shina tapujpi: “Na chaipurachu cani” nijpica:

6“Shina cashpaca: ‘Shibolet’ nishpa rimai” ninajujmi carca. Chai shimita na ni ushashpa: “Sibolet” nijpica, chai Jordán yacu manñapillatami cungata cuchushpa huañuchij carca. Chaimandami Efraín ayllupuracunaca, chuscu chunga ishcai huaranga runacuna huañunajurca.

7Jefté runaca, sucta huatatami Israelcunataca mandashpa causajurca. Galaad llactamanda Jefté runa huañujpica, Galaad llactapi tiyaj paipaj pueblopillatami pambarca.

Ibzán, Elón, Abdón shuti runacuna, Israel llactata mandashcamanda

8Jefté runapaj jipaca, Belén pueblopi causajuj Ibzán shuti runami, Israelcunataca mandajurca.

9Paica, quimsa chunga churicunata, quimsa chunga ushicunatami charirca. Chai ushicunata, churicunataca, shuj gentecunahuanmi cazarachirca. Ibzán shuti runaca, canchis huatatami Israelcunataca mandajurca.

10Ibzán shuti runa huañujpica, Belén pueblopillatami pambarca.

11Paipaj jipaca, Zabulón ayllupura Elón shuti runami Israelcunataca, chunga huatata mandajurca.

12Zabulón llactamanda Elón shuti runa huañujpica, Zabulón llactapi Ajalón shuti pueblopimi pambarca.

13Paipaj jipaca, Piratón shuti pueblopi causajuj Hilel shuti runapaj churi Abdón shuti runami, Israelcunataca mandajurca.

14Paica, chuscu chunga churicunatami charirca. Chai churicunamandaca quimsa chunga huahuacunatami charirca. Paicunaca, canchis chunga burrucunapimi tiyarishpa purinajun carca. Abdón shuti runaca, pusaj huatatami Israelcunataca mandajurca.

15Piratón shuti pueblomanda Hilel shuti runapaj churi Abdón shuti runa huañujpica, Piratón shuti paipaj pueblopillatami pambarca. Chai puebloca, Efraín llactapi, Amalec shuti urcupimi saquirin.