1 SAMUEL 26 - Quichua Imbabura 2016

Davidca, Zif shuti pambapipashmi Saultaca na huañuchishca

1Zif shuti pueblopi causajcunaca, Gabaa pueblopi Saulpajman shamushpami, cashna nishpa villanajurca: “Davidca, ¿nachu jichushca pambamandaca, indi llujshimujman tiyajuj, Haquila shuti lomapi pacajushca tiyajun?” ninajurcami.

2Shina nijpimi Saulca, Zif shuti jichushca pambaman urai rirca. Paica, quimsa huaranga Israel runacunata agllashpa pushashpami, Zif shuti jichushca pambapi Davidta mascangapa rirca.

3Saulca, jichushca pambamandaca, indi llujshimujman tiyajuj, Haquila shuti loma ñan manñapimi, carpacunata shayachishpa tiyajurca. Shinallata Davidpash, chai jichushca pambapillata cashpami, chaiman Saúl catishpa shamushcata yacharca.

4Chaimandami Davidca, pacalla chapajcunata cachashpa, Saúl chaiman shamushcataca alipacha yacharca.

5Shina yachashpami Davidca, Saúl maipi carpacunata shayachishpa tiyanajuj pushtuman shamurca. Chaipimi Davidca, Saulpash, macanajunata yachaj runacunata mandaj Ner shuti runapaj churi Abner shuti runapash, maipi puñunajujta ali ricurca. Tucuilla gentecuna, carpacunata shayachishca chaupipimi Saulca puñujurca.

6Chaimandami Davidca, heteopura Ahimelec shuti runatapash, Sarvia shuti huarmipaj churi, Joab runapaj huauqui Abisai runatapash cashna nirca: “Carpacuna shayanajuj pambaman ñucahuan, Saulpajman urai ringapaca, ¿pita munanguichi?” nishpa tapujpimi, Abisai runaca: “Ñuca, canhuan urai rishallami” nirca.

7Shinami Davidpash, Abisai runapash, chai tutaca macanajunata yachaj runacunapajman rinajurca. Saulca, carpacunata shayachishca pambapimi, tucsina jirrutapash, paipaj uma saunapi churashca puñujurca. Shinallata Abner runapash, macanajunata yachaj runacunapashmi, Saulta chaupipi churashpa muyundi puñunajurca.

8Shinata ricushpami Abisai runaca, Davidta cashna nirca: “Cunanmi Taita Diosca, canda fiñajtaca cambaj maquipi churashca. Cunanga, ñucallata paita huañuchijuchun saquihuailla. Paitaca, tucsina jirruhuan, alpaman yalijta shujta cushpallami huañuchisha” nirca.

9Shina nijpimi Davidca, Abisai runataca cashna nirca: “Na huañuchinachu cangui. Mandaj Dios agllashpa churashca jatun mandajta, maijambash huañuchishpaca, llaquichi tucungapachami” nirca.

10Davidca cashnatapashmi nirca: “Mandaj Dios ricujujpimi, cashna nini: Saulca, Mandaj Dios causaita quichujpi, na cashpaca paipaj huañui punlla chayajpi, na cashpaca jatun macanajuiman urai rishpami huañunga.

11Shina cajpica, Mandaj Dios agllashpa churashca jatun mandajta ñuca maquihuan huañuchinamandaca, Mandaj Diosllata jarcahuachun. Ashtahuangarin cunanga, paipaj uma saunapi shayajuj tucsina jirruta, yacuta japinata apashpa jaculla” nircami.

12Shina nishpami Davidca tucsina jirrutapash, yacuta japinatapash, Saulpaj uma saunamanda apashpa rirca. Chaitaca pipash na ricujta, pipash na uyajta, pipash na yachajtami aparca. Mandaj Diosllata, paicunapajman ninan puñuita cachamujpimi, tucuicunallata ninandapacha puñunajurca.

13Chai jipami Davidca, chimbaman yalishpa, carumanpacha rishpa, shuj loma pundapi shayarirca.

14Chaipi cashpami, Davidca macanajunata yachaj runacunatapash, Ner shuti runapaj churi Abnertapash, cashna nishpa caparirca: “Abner, ñuca caparijujtaca, ¿nachu uyahuangui?” nijpimi, Abner runaca: “Jatun mandajta caparingapaca, ¿pita canguiyari?” nirca.

15Shina nijpimi Davidca, Abnertaca cashna nijurca: “¿Nachu canga tucuita yali shinlli runa cangui? Shina cashpaca, ¿imashpata canda jatun mandajtaca, na ricuriajurcangui? ¿Israelpurapica, canshnaca pita tiyanyari? Macanajunata yachaj runacunamanda shuj runami, canda jatun mandajtaca, huañuchingapa yaicurca.

16Chashna na ricuriashpaca, na alitami rurashcangui. Mandaj Diosca ricujunmi. Cangunaca, huañunapachami canguichi. Mandaj Dios churashca cangunata jatun mandajtami, na ali ricuriashcanguichi. Cunanga ¿Jatun mandajpaj uma saunapi tiyajushca tucsina jirrupash, yacuta japinapash maipitayari?” nijurcami.

17Shina nijpimi Saulca, David rimashcata rijsishpa: “¿Nachu ñuca huahua David, chashna rimajungui?” nijpi Davidca, cashna nirca: “Ñucata jatun mandajlla, ari, ñucallatami rimajupani.

18¿Imashpata ñucata mandajca, cambajta ruraj ñucataca, chashna catiriyajuhuangui? ¿Imatata rurashcani? ¿Ima na alitata, ñuca maquihuanga rurapashcani?

19Ñucata jatun mandajlla, cambajta ruraj ñuca rimashca shimicunata uyapayari. Ñucata llaquichijuchun, Mandaj Diosllata munajpica, ofrendata cujpishna huañushallami. Ashtahuangarin huañuna aichayuj runacunalla, chashna yarinajujpica, Mandaj Dios paicunataca, ninandapacha llaquichishca cachun. Paicunami, Mandaj Dios carashca llactata ama japigrichun: ‘Rurashcalla dioscunata alicachingapa rilla’ nishpa cachahuashca.

20Ñucaca, Mandaj Diospaj ñaupajmanda caru llactapi ñuca yahuar jicharichunga, na munapanichu. Ashtahuangarin, Israelcunata jatun mandajllatami, piquita mascangapashna llujshimushcangui. Sacha atalpata, sachapi catijshnallami purijungui” nijurcami.

21Shina nijpimi Saulca, cashna nirca: “Ñuca huahua Davidlla, ñucaca juchatami rurashcani. Cunanga tigrailla, ashtahuanga na llaquichishachu. Canga, ñuca causaita ninanda juyashpami, cunanga na huañuchihuashcangui. Ricui ñucaca, juizu illaj runashnami, na alita rurashpa ninanda pandarishcani” nircami.

22Shina nijpimi Davidca, cashna nijurca: “Can jatun mandajpaj tucsina jirruca caipimi. Cambajta rurajcunamanda shuj runa apachun, caiman cachamuilla.

23Mandaj Diosca, ali cashcatapacha rurajmambash, ali cazujmambash, imata cuna cashcatapacha cushpami ali canman. Cunanga, Mandaj Diosllatami candaca, ñuca maquipi churarca. Ashtahuangarin ñucami, Mandaj Dios agllashpa churashca jatun mandajta, ñuca maquihuan huañuchingapaca, na munarcani.

24Cunanga cambaj causaita ninanda juyashpa, ñuca na huañuchishcamandaca Mandaj Diosca, ñucatapash shinallata juyashpa, tucui llaquimandapash quishpichihuachun” nijurcami.

25Shina nijpimi Saulca cashna nirca: “Ñuca huahua David, canga imata rurashpapash alitalla rurajmi cangui. Shina cashcamandami, tucui imata rurashcapash ali llujshinga” nircami. Chai jipaca Davidca, pai maita rijushca ñandallata rircallami. Saulpash, paipaj huasiman tigrarcallami.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help