ÉXODO 17 - Quichua Imbabura 2016

Rumimandami yacuta llujchishca

1Tucuilla tandanajushca Israelcunami, Sin shuti jichushca pambamanda llujshishpa, Mandaj Dios mandashcashna asha asha rinajurca. Chaimanda rishpaca, Refidim shuti pambaman chayashpami, carpacunata shayachishpa tiyanajurca. Chaipica gentecuna ufiangapaca yacu illajpimi,

2Israelcunaca, Moisesta ninanda fiñashpaca:

“Yacuta ufiangapa carayari” ninajurca.

Shina ninajujpimi Moisesca:

“¿Imashpata ñucatara ninanda fiñashpa, Mandaj Dios ushaita charishcatapash na crishpa, fiñachinguichi?” nirca.

3Shinami Israelcunaca, chaipica ninanda yacunayachishpa, Moisesta na alicachishpa cashna ninajurca:

“¿Imapata ñucanchitaca, Egiptomanda llujchimurcangui? Ñucanchipash, ñucanchi huahuacunapash, ñucanchi animalcunapash, yacunayachishpa huañuchunmari pushamushcangui” ninajurcami.

4Shinamandami Moisesca, Mandaj Diostaca cashna nishpa ninandapacha mañajurca:

“Cai gentecunahuanga, ¿imatata rurashayari? Ñallami rumicunahuan huañuchihuanga” nijurcami.

5Shina mañajujpimi Mandaj Diosca, Moisestaca cashna nirca:

“Israelcunata mandaj rucu taitacunata pushashpa, gentecunata ñaupashpa ringui. Shinallata, jatun yacuta huajtashca cambaj vara caspitapash apashpa ringui.

6Ñucaca, canda ñaupashpa rishpami, Horeb shuti lomapi tiyaj jaca rumipi shuyasha. Chaipica, jatun rumita can huajtajpi, chai rumimanda yacu llujshijpimi gentecunaca ufianajunga” nircami.

Shina nijpimi Moisesca, Israelcunata mandaj rucu taitacunapaj ñaupajpi, chashnallata rurajurca.

7Chai jipaca, chai pushtutaca Masah nishpapash, Meriba nishpapashmi shutichirca. Israelcunaca, paicunapura fiñanajushpami: “¿Mandaj Diosca ñucanchihuanllu, nachu ñucanchihuan imata?” nishpa, Mandaj Diosta na crishpa fiñachirca. Chaimandami chashna shutichinajurca.

Amalec runacunahuan macanajushcamanda

8Chai jipami, Amalec runacunaca, Israelcunahuan macanajungapa, Refidim shuti pambaman shamunajurca.

9Shinamandami Moisesca, Josuetaca cashna nirca:

“Israel runacunata agllashpa, Amalec runacunahuan macanajungapa llujshingui. Cayami ñucaca, Taita Diospaj vara caspita apashpa, urcu pundapi shuyasha” nircami.

10Shina nijpimi Josueca, Moisés mandashcashna Amalec runacunahuan macanajungapa rirca. Moisespash, Aaronbash, Hur shuti runapashmi, urcu pundaman vichai rinajurca.

11Chaipica cashnami tucurca: Moisespaj maquita vichai chutajpica, Israelcunami macanajuitaca mishanajurca. Moisespaj maquita urai churajpica, Amalec gentecunami macanajuitaca mishanajurca.

12Moisés, maquita vichai chutaita shaijujpimi, shuj rumita churashpa paitaca chaipi tiyachinajurca. Chaipi tiyarijpimi Aaronhuan, Hur shuti runahuanga, shujca shuj maquita, caishujca chaishuj maquita vichai charinajurca. Chashnami Moisesca, paipaj maquita shinlli vichai chutashpa, indi huashajungacaman tiyajurca.

13Shinami Josueca, Amalec gentecunataca tucuillatapachami, espadahuan huañuchishpa tucuchijurca.

14Mandaj Diosca, Moisestaca cashnami nirca:

“Cashna tucushcataca ama cungashpa yarinajuchun quilcangui. Shinallata, ‘Amalec runacunataca, cai pachapi ama ashtahuan yarinajuchunmi, tucuillata tucuchisha’ ninmi nishpa, Josueman villangui” nircami.

15Shina nijpimi, Moisesca shuj altarta rurashpa, chai altartaca: “Mandaj Diosmi ñuca bandera” nishpa shutichirca.

16Moisesca cashnatapashmi nirca: “Jatun Mandaj Diosta, Amalec gentecuna na cazushpa jatarishcamandaca, Mandaj Diosmi Amalec runacunapaj mirai miraicunahuan macanajunga” nircami.