JOB 1 - Quichua Imbabura 2016

Job shuti runamanda

1Uz shuti llactapimi, Job shuti runa causajurca. Paica, tucuita alitalla ruraj, Taita Diostapash manllaj, ima na alitapash na ruraj runami carca.

2Paica, canchis churicunata, quimsa ushicunatami charirca.

3Paipaj alpacunapica, canchis huaranga llamacunata, quimsa huaranga camellocunata, picha patsaj yunta huagracunata, picha patsaj burrucunatami charirca. Shinallata, paipajta rurajcunapash ashtacatami carca. Indi llujshimujman tiyanajuj llactacunapi causajcunamandaca, paimi ashtahuan charijpacha carca.

4Paipaj churicunaca, shuj shuj punllacunapimi, paicunapaj huasipi jatun micuicunata ruranajuj carca. Paicunapaj quimsa panicunatapash, paicunahuan micuchun, ufiachunmi cayachun cachaj carca.

5Jatun micui punllacuna tucurishca jipaca, Job runaca, paipaj tucui huahuacunatami, Diospaj ñaupajpi alichirichun cachaj carca. Shinallata paica, tutamandata jatarishpami, paipaj huahuacunamanda, Diosman animalcunata cushpa huañuchishpa, tucuillata rupachij carca. Job runaca: “Ñuca huahuacuna imapipash juchata rurashpa, paicunapaj shungupi na ali shimicunata rimashpa, Taita Diostapash fiñachircapashchari” nishpami, punllandi chashna rurajuj carca.

6Shuj punllami angelcunaca, Mandaj Diospaj ñaupajpi ricuringapa shamurca. Paicunapurapica, Satanaspashmi shamurca.

7Chaipimi Mandaj Diosca, Satanastaca:

“¿Maimandata shamungui?” nirca.

Shina nijpimi Satanasca, Mandaj Diostaca:

“Alpa pachata muyushpa, purishpami shamuni” nirca.

8Shina nijpimi Mandaj Diosca, Satanastaca cashna nirca:

“Ñucapajta ruraj Job runaca, ¿nachu, tucuita alitalla ruraj, Taita Dios Ñucatapash manllaj, ima na alitapash na ruraj cajtaca, ricushcangui? Alpa pachapica, paishnaca pipash na tiyanllu” nirca.

9Shina nijpimi Satanasca, Mandaj Diostaca cashna nirca:

“Job runaca, ¿Can Taita Diostaca yangamanda manllan yanguichu?

10¿Nachu Canllata paitapash, paipaj huasi ucupuratapash, tucui imatalla pai charishcatapash, tucuilla muyundita ricujungui? Pai imata rurajujpipash, Can bendiciajpimi cai llactapica ninandapacha charijyashca.

11Ashtahuangarin cunanda, pai imatalla charishcacunata quichujpica, ¿nachu Candaca, Cambaj ñaupajpillata na alicachishpa rimanga?” nirca.

12Shina nijpimi Mandaj Diosca, Satanastaca cashna nirca:

“Pai imatalla charishcacunataca cambaj maquipimi saquini. Shina cajpipash paipaj causaitalla ama quichungui” nirca.

Shina nijpica Satanasca, Mandaj Diospaj ñaupajmanda llujshishpa rircallami.

13Shuj punllami, Job runapaj churicunapash, ushicunapash, paicunapaj punda huauquipaj huasipi micushpa, vinotapash ufianajurca.

14Chaipimi shuj villaj runa, Job runapajman shamushpaca cashna nirca:

“Huagracuna yapunajuj manñapimi, burrucunapash micunajurca.

15Chaipimi, Sabá llactamanda runacuna shamushpa, cambajta rurajcunataca espadahuan huañuchirca. Ñucallami quishpirishpa, canman villangapa shamurcani” nijurca.

16Chai runa villajujpillatami, shuj runa chayamushpaca:

“Taita Diospaj nina jahua pachamanda urmamushpami, llamacunatapash, michij runacunatapash rupachishpa tucuchirca. Ñucallami quishpirishpa, canman villangapa shamurcani” nirca.

17Chai runapash villajujpillatami, shuj runa chayamushpaca:

“Caldeo runacuna, quimsapi shicanyarishpa llaquichingapa chayamushpami, camellocunatapash shuhuashpa, cambajta rurajcunatapash espadahuan huañuchirca. Ñucallami quishpirishpa, canman villangapa shamurcani” nirca.

18Chai runapash villajujpillatami, shuj runa chayamushpaca, cashna nirca:

“Cambaj churicunapash, ushicunapash paicunapaj punda huauquipaj huasipimi micushpa, vinota ufianajurca.

19Chaipica, jichushca pambamanda ninan acapana shamushpa, huasita urmachijpimi, cambaj huahuacunaca chaipi huañurca. Ñucallami quishpirishpa, canman villangapa shamurcani” nirca.

20Shinamandami Job runaca, paipaj jahualla churajushcata liquishpa, uma ajchatapash pilarishpa, alpapi cungurishpa Diosta ninanda mañajurca.

21Paica cashnami nirca:

“Ñuca mamapaj vijsamandaca, lluchullami huacharircani, shinallatami tigrana cani. Mandaj Diosmi carahuarca, Mandaj Diosllatami quichuhuarca. Mandaj Diospaj shutica, ninanda alicachi tucushca cachun” nirca.

22Chai tucui llaquicuna shamujpipash, Job runaca napacha juchataca rurarcachu. Taita Diostaca, ima na alitapash na rimarcachu.