1Amoz shuti runapaj churi Isaiasca, muscuipishnami ricushca. Paica, Judá llactapash, Jerusalenbash imalla tucunatami ricushca. Uzías, Jotam, Acaz, Ezequías shuti jatun mandajcuna, Judá llactata mandajui huatacunapimi, chashna ricushca.
2Jahua pachapash, cai pachapash, Mandaj Dios rimajujta ali uyaichi.
Paica: “Cai huahuacunataca, Ñuca viñachishpami jatumbi churarcani.
Ashtahuangarin paicunaca, ñucata fiñashpami na cazunajurca.
3Huagrapash, paita michijta rijsinmi,
burrupash pai puñuna pushtuta rijsinmi.
Ashtahuangarin Israelcunaca, na cazungapa munanllu.
Ñuca agllashcacunaca, Ñucataca na rijsinllu” ninmi.
4¡Aij, juchasapa gentecunalla!
Cangunaca, na alitalla ruraj gentecuna,
na ali taitacunamanda miraicuna,
na ali huahuacunami canguichi.
Mandaj Diosta saquishpa, huashaman tigrashpami,
Israelcunapaj jucha illaj Diostaca ninanda fiñachishcanguichi.
5¿Imashpata ashtahuan llaquichi tucungapa munanguichi?
¿Cunangamanchu na cazushpa catinguichilla?
Cangunapaj umapipash ungushcami canguichi.
Shungupipash, nanaihuanmi canguichi.
6Cangunaca, chaquimanda umacaman napacha alimi canguichi.
Ashtahuangarin chugrishpa, punguishpa, carachashcami ismunajunguichi.
Cangunataca, pipash na jambishcachu, huatachitallapash na huatachishcachu.
Ashatallapash na aceitehuan jambishcachu canguichi.
7Cangunapaj llactatapash tucuchishcami,
pueblocunatapash rupachishcami.
Cangunapaj pambacunapi fucushcatapash, shuj llactamanda shamujcunami,
cangunapaj ñaupajpillata micushpa tucuchishca.
Na rijsishca runacunami, tucui ima tiyashcata tucuchishca.
8Sion shuti pueblollami, uva chagra chaupipi huasichishca chugllashna shayajun.
Melonguna fucuj yura chaupicunapi churashca chugllashnami saquirishca.
Jichushca puebloshnami tucushca.
9Tucuita Mandaj Dios, huaquindallapash na saquishca cajpica,
Sodoma puebloshna, Gomorra puebloshnami tucurinchiman carca.
Tucui shunguhuan, Diospajman tigrarichun cayashcamanda10Sodoma pueblota mandajcuna, Mandaj Dios rimashcata uyaichiyari.
Gomorra pueblopi causajcuna, ñucanchi Taita Dios mandashcata uyaichiyari.
11Mandaj Diosca, cashnami nijun:
“Ashtaca animalcunata cushpa huañuchishcapash,
Ñucapaca ¿imapata ali cangayari?
Jari llamacunata cushpa tucuillata rupachishcatapash,
virayashca huagracunapaj virata cushpa rupachishcatapash, napacha ricunayanllu.
Huagracunata, jari llamacunata, chivocunata huañuchishpa cushca yahuartapash, napacha munanichu.
12¿Pita cangunataca, ñuca ñaupajman chaicunata apashpa shamushpa,
ñuca huasi patiocunapi saruchun mandarcayari?
13Ofrendacunatapash, yangallatami apamunguichi.
Inciensota cushnichishcatapash, na ricunayanllu.
Llullu luna punllacunapi, samana punllacunapi,
canguna tandanajushcatapash, napacha ricunayanllu.
Canguna, jatun cushijuita rurashcacunapash, napacha alichu.
14Llullu luna punllacunapi, jatun cushijui punllacunapi tandanajuita rurashcatapash, napacha ricunayanllu.
Chai tandanajuicunaca, Ñucataca shaijuchinmi.
Chaicunataca, napacha ricungapa munanichu.
15Cangunapaj maquita vichai churashpa mañanajujtapash, napacha ricunayanllu.
Canguna ninanda mañanajujpipash, napacha uyashachu.
Canguna na alita rurashpa yahuarta jichashcamandami, na uyasha.
16Armashpa, mapa illajmi cana canguichi.
Na alita ruranajushcataca, ñuca ñaupajpica saquinami canguichi.
Na alita ruranataca, saquinapachami canguichi.
17Aliguta causanatami yachajuna canguichi.
Na alita ruranataca saquishpa, alita rurangapami causana canguichi.
Taita mama illaj huahuagumambash, alitami rurana canguichi.
Sapalla huarmigutapash yanapanami canguichi” ninmi.
18Mandaj Diosca, cashnatapashmi nijun:
“Cunanga, Ñucahuanmi ali tucungapa shamuna canguichi.
Cangunapaj juchacuna, puca findushna cajpipash,
yuraj razushna cachunmi alichisha.
Yana puca findushna cajpica, yurajyangacaman tajshashca milmatashnami saquisha.
19Ñuca rimashcata uyashpa, cazushpaca,
cai alpapi juyailla fucushcacunatami micunguichi.
20Ashtahuangarin, jariyashpa napacha cazungapa munashpaca,
espadahuanmi tucuchi tucunguichi” nishpami,
Mandaj Diosca, Paipaj shimihuan villarca.
Jerusalendaca, llaquichishpapash cutin alichina cashcamanda21¡Dios agllashca pueblolla!,
¿imashpata culquimanda huainayaj huarmishna tigrashcangui?
Chaipica, tucuicunami alita rurashpa causaj carca.
Cunanga, huañuchij na ali gentecunallami mirashca.
22Cambaj culquipash, jirru ismushcamanmi tigrashca.
Cambaj vinopash yacuhuan chapushcami tucushca.
23Mandajcunapash, na alita rurangapa,
shuhuacunahuanmi tandanajushca.
Paicunaca, culquita pacalla cujpi, charijyana munaihuanllami causanajun.
Taita mama illaj huahuatapash, llaquichinajunmi.
Sapalla huarmigutapash na yanapanllu.
24Shinamandami, Israelcunata ninan ushaihuan Mandaj Diosca, cashna nin:
“¡Caicamanlla! Cunanga, Ñucata fiñajcunatapash,
Ñucata na ricunayachijcunatapash llaquichishapachami.
25Shinallata, Ñuca ninan ushaihuan llaquichishpami,
cambaj mapacunataca tucuillapacha maillashpa anchuchisha.
26Pundashnallata ali juezcuna tiyachunmi, cutin cai pueblopica churasha.
Ali yuyaicunata cuj runacunatapash cutinmi churasha.
Shina rurajpimi candaca, ‘ali cashcatalla ruraj Pueblomi, Diosta ali cazuj Pueblomi’ ninajunga.
27Sion pueblotaca, Ñuca ninanda llaquishpami, quishpichishpa cutin tigrachimusha.
28Ashtahuangarin jariyashpa na cazujcunatapash,
juchasapacunatapash, tandachishpami tucuchisha.
Mandaj Dios Ñucata na catijcunaca, tucuillami tucuchisha.
29Chashna rurajpimi, canguna juyashca encina quirucunata,
sisa tarpushca pambacunata alicachishcataca pingaichisha.
30Cangunaca, encina quirumanda, fanga chaquishpa urmashcashnami canguichi.
Sisa pamba chaquishcashnami canguichi.
31Ninan shinlli runapash, jupashnami canga.
Pai imata rurashcapash, nina rupashpa tucurijshnami canga.
Paitapash, pai imata rurashcatapashmi rupachishpa tucuchinga.
Chaitaca pipash na jarcai ushangachu” ninmi.
Who We AreWhat We EelieveWhat We Do
2025 by iamachristian.org,Inc All rights reserved.
