ISAÍAS 11 - Quichua Imbabura 2016

Jatun Mandaj Mesías tiyanamanda

1Taita Isaimandaca, shuj mirai churimi shamunga.

Chai jatun quiru sapimandaca, shuj mushuj yura viñajshnami shamunga.

2Paipimi, Mandaj Diospaj Espirituca causanga.

Chai Espiritumi, ali yachanatapash, alipacha yachajushca canatapash,

ali yuyaita cunatapash, ninan ushaitapash paiman cunga.

Chai Espiritumi, Mandaj Diosta rijsishpa, manllashpa causana yuyaitapash cunga.

3Mandaj Diosta manllashpa causashpami, Paica cushijunga.

Paica, na pitapash agllashpami, tucuicunaman alita rurajunga.

4Ashtahuangarin, huajchacunamambash, aliguta rurashpami pactachinga.

Llactapi causanajuj na jariyajcunataca, aliguta ricushpami mandajunga.

Cai pachapi causajcunataca, Paipaj shimi rimashca samaihuanmi tucuchinga.

5Alitalla rurashpa, tucuita pactachishpami, shinllitapacha mandajunga.

6Shinamandami, atujpash, huahua llamahuan tandanajushca purijunga.

Leopardopash, huahua chivohuanmi tandanajushca purijunga.

Shicuhuan, leonhuan, huasipi charina animalhuanga tandanajushpami purinajunga.

Paicunataca, uchilla huambragumi michijunga.

7Huarmi huagrapash, huarmi osohuanmi tandanajushpa purinajunga.

Paicunapaj huahuacunapashmi pacta sirinajunga.

Leonbash, huagrashnami ujshata micushpa causanga.

8Chuchujuj huahuapash, millai culebra causaj utujupimi pugllajunga.

Chairalla chuchumanda anchuchishca huahuapash, millai culebra causaj utujupimi paipaj maquita churanga.

9Ñucapajlla shicanyachishca lomapica, ima na alitapash, na ruranajungachu.

Mama cuchapi yacu jundashcashnami, cai pachapica, Mandaj Diosta cazushpa causana tiyanga.

10Chai punllacunapica, Taita Isaimanda mirai churita rijsingapami, tucui gentecuna mascashpa shamunajunga.

Paica ninan ushaihuanmi causajunga.

11Shinallata, chai punllacunapica:

Ninan ushaihuanmi Mandaj Diosca, prezu apai tucushcamanda puchushcacunataca, cutin tigrachimunga.

Paicunataca, Asiria, Egipto, Patros, Etiopía, Elam, Sinar shuti llactacunamanda,

Hamat shuti pueblomanda, mama cucha manñacunapi tiyaj llactacunamandami tigrachimunga.

12Paimi, caita chaita rishca Israelcunataca, cutin tandachimunga.

Shinallata, Judá ayllu miraicunatapash, cai pachamandaca, cutinmi tandachimunga.

13Chaipica, Efraín ayllu miraicuna fiñashpa ricunaca illangami.

Judá aylluta fiñajcunaca, tucuchi tucushcami canga.

Efraín aylluca, Judá ayllutaca na fiñashpa ricungachu.

Judá ayllupash, Efraín ayllutaca na ashtahuan llaquichingachu.

14Ashtahuangarin ishcai tucushpami, indi huashajunman causanajuj filisteocunataca tucuchinga.

Indi llujshimujman causajcuna, imatalla charishcatapashmi quichunajunga.

Edom shuti, Moab shuti llactacunapi causajcunaca, paicunapaj gañancunami tucunga.

Amón llactapi causajcunapash, paicunatami cazushpa causanajunga.

15Mandaj Diosca, Egiptopi tiyaj jatun yacutapashmi chaquichinga.

Paipaj ninan ushaihuanmi, Éufrates jatun yacutapash, canchispi chaupinga.

Shina rurajpimi, chaquillapash yali ushanalla canga.

16Dios agllashcapuramanda, Asiria llactapi puchushcacunaca, chaitami yalishpa shamunajunga.

Egipto llactamanda Israel gentecunaman ñanda pascashpa, vichai pushamushcashnami, pushamunga.