JOSUÉ 11 - Quichua Imbabura 2016

Jabín shuti runataca, shuj llactacunandi mishashcamanda

1Chaicunata uyashpami, Hazor pueblota jatun mandaj Jabín shuti runaca, Madón pueblota jatun mandaj Jobab shuti runaman, Simrón pueblota jatun mandajman, Acsaf pueblota jatun mandajmambash, villachun cacharca.

2Shinallata, jahua urcucunapi tiyaj llactacunata mandajcunamambash, Cineret shuti cucha uraman tiyajuj, Arabá shuti pambacunapi causajcunata mandajcunamambash, indi huashajunman tiyaj Dor shuti pueblota mandajmambashmi villachun cacharca.

3Indi llujshimuj, indi huashajuncunaman causanajuj cananeo gentecunamambash, urcucunapi causanajuj amorreo, heteo, ferezeo, jebuseo shuti gentecunamambash, Mizpa shuti llactapi tiyaj Hermón shuti urcu chaquipi causanajuj heveo gentecunamambashmi, villachun cacharca.

4Paicunami, macanajunata yachaj tucuilla runacunandi llujshimunajurca. Paicunaca, mama cucha manñapi tiyaj t'iyu alpashna ashtaca gentecunami, ashtacapacha caballocunandi, macanajuna carretacunandi llujshimunajurca.

5Tucuilla chai jatun mandajcunami tandanajurca. Paicunaca, Israelcunahuan macanajungapa shamushpami, Merom shuti yacu manñapi carpacunata shayachishpa tiyanajurca.

6Ashtahuangarin Mandaj Diosca, Josuetaca cashnami nirca: “Paicunataca na manllanachu canguichi. Paicunataca, cayapallatami, cangucunapaj ñaupajpi tucuillata huañuchishpa tucuchisha. Caballocunapaj chaqui angucunatapash fitishpami, macanajuna carretacunatapash rupachina canguichi” nircami.

7Josueca, macanajunata ali yachaj runandimi, chai gentecunahuan macanajungapa cungashcapi Merom shuti yacu manñaman chayarca.

8Mandaj Diosllata, Israelcunapaj maquipi churajpimi, chai gentecunataca huañuchinajurca. Paicunataca, Sidón shuti jatun pueblocaman, Misrefot-maim shuti pueblocaman, indi llujshimujman tiyaj Mizpa shuti pugru pambacaman catishpami, shujllatapash na saquishpa huañuchinajurca.

9Josueca, Mandaj Dios mandashcashnami, paicunataca huañuchirca. Paicunapaj caballocunapaj chaqui angucunatapash fitishpami, macanajuna carretacunatapash rupachirca.

10Josueca, chai punllacunallata Hazor shuti puebloman tigrashpami, chai pueblota mishashpa, chaipi jatun mandajtapash espadahuan huañuchirca. Hazor puebloca, chai tucui pueblocunata mandajuj jatun pueblomi cashca carca.

11Chaipica, causaita charijcunataca, tucuillatami espadahuan huañuchishpa tucuchirca. Shujllatapash causajtaca na saquishpa, tucuillata huañuchishpami, Hazor pueblotapash rupachirca.

12Josueca, chai jatun mandajcunatapash, chai pueblocunapi tucui causajcunatapashmi espadahuan huañuchirca. Mandaj Diospajta ruraj Moisés mandashcashnami, huañuchishpa tucuchirca.

13Ashtahuangarin Israelcunaca, lomacunapi tucuilla pueblocunataca, na rupachircachu. Hazor shuti pueblotallami, Josueca rupachirca.

14Israelcunaca, chai pueblocunapi tucui imalla tiyajcunatapash, animalcunatapashmi apanajurca. Ashtahuangarin chaipi causanajuj gentecunataca, shujllatapash na causajta saquishpami, espadahuan huañuchishpa tucuchinajurca.

15Imashnami Mandaj Diospajta ruraj Moisesta mandarca, chashnallatami Moisespash, Josuetaca mandarca. Mandaj Dios, Moisesta mandashcataca, shuj shimitallapash na saquishpami, Josueca tucuita pactachijurca.

Josueca, tucuilla llactacunatami mishashpa quichurca

16Josueca, tucui cai llactacunatami mishashpa quichurca: Urcupi tiyaj llactacunata, Neguev shuti tucuilla pambata, Gosén shuti tucuilla llactata, jatun pambacunata, Arabá pambacunata, Israel llacta urcucunataca, chai pugru pambacunandimi quichurca.

17Seir shuti llactaman vichai rina Halac shuti urcumanda callarishpaca, Líbano shuti jatun pambapi tiyaj Baal-gad shuti llactacaman, Hermón shuti urcu manñacamanmi quichunajurca. Shinallata paicunapaj tucui jatun mandajcunatapashmi huañuchirca.

18Josueca, chai jatun mandajcunahuanga, unai huatacunatami macanajurca.

19Israelcunahuan casilla aliguta causanata munaj puebloca, na tiyarcachu. Gabaón pueblopi causanajuj heveo gentecunallami, Israelcunahuanga ali causanajurca. Chaimanda caishuj pueblocunataca, macanajushpa mishashpami tucuillata quichurca.

20Paicunataca, Israelcunahuan macanajuchunmi, Mandaj Diosllata shinlli shunguta rurarca. Mandaj Dios, Moisesta mandashcashnami, chai llactapi causajcunataca, na llaquishpa, sapimanda llujchishpa shitajshna tucuillatapacha huañuchirca.

21Josueca, chai huatacunapillata shamushpami Hebrón, Debir, Anab shuti urcucunapi, Judá ayllupaj tucui urcucunapi, Israelcunapaj tucui urcucunapi causanajuj, Anac runapaj miraicunataca huañuchishpa tucuchirca. Josueca, chai gentecunataca, paicunapaj pueblocunandimi tucuchirca.

22Anac runapaj miraicunamandaca, Israelcunapaj llactapica shujllapash na saquirircachu. Chai gentecunaca, Gaza, Gat, Asdod shuti pueblocunapillami causaj saquirinajurca.

23Mandaj Dios, Moisesta imashna mandashcashnami Josueca tucuilla chai llactacunataca mishashpa quichurca. Chai llactacunataca Israelcunamanmi, tucui ayllucuna imashna cashcashnallata, chaupishpa curca. Shinami chai llactapica macanajuicunaca tucurirca.