1 CRÓNICAS 29 - Quichua Imbabura 2016

1Chai jipami, tucuilla tandanajushca gentecunata, jatun mandaj Davidca cashna nirca: “Taita Diosca, ñuca churi Salomondami agllashca. Paica, chairalla huambra cashpami, Diospaj huasita shayachinataca, nara ali yachai ushanga. Chai huasica na runacunapaj cashpa, Mandaj Diospaj cajpimi, aligutapacha yarishpa rurana canga.

2Diospaj huasita rurangapaca ñuca tucui ushaihuanmi ña tucuita alichircani. Curita, culquita, bronceta, jirruta, caspicunata tucuita imatalla ruranatapash ali ricushpami ña tandachircani. Shinallata, ónice shuti rumicunata, shuj juyailla rumicunata, yana rumicunata, shuj shuj ricurijuj rumicunata, mármol rumicunatapash, tucuitami ña tandachircani.

3Chai jahuapash Diospaj huasita juyaimandami, ñuca ima charishcata alichina ucupi tiyajuj curita, culquita alichishca charijuni. Diospaj huasita rurachunmi ñuca imatalla charishcatapash curcani.

4Ofir shuti llactamanda, ishcai huaranga chuscu chunga quintal curitapashmi curcani. Diospaj huasi ucu pircacunata, culquihuan jahualla quilpangapaca, ashtahuan ali culquitami, chuscu huaranga canchis patsaj sucta chunga quintalta curcani.

5Curimanda, culquimanda, imatalla ruranata yachajcunami, imata cashpapash juyailla ruranajunga. Chaicunahuanmi imata cashpapash, aliguta ruranata yachajcunaca, juyailla ruranajunga. Cunanga, ¿pita cangunapaj munai, Mandaj Diosman imagutapash carangapa munanguichi?” nijurcami.

6Shina nijujpimi, huasi ucupuracunata mandajcunapash, Israel ayllucunata mandajcunapash, huaranga macanajuj runacunata mandajcunapash, patsaj macanajuj runacunata mandajcunapash, jatun mandajpaj alpapi tucuita ricujcunapash, paicunapaj tucui shunguhuan tucuita caranajurca.

7Diospaj huasipaca, quimsa huaranga chuscu patsaj quintal curita, chunga huaranga dracma curicunata, sucta huaranga pusaj patsaj quintal culquita, chunga ishcai huaranga ishcai patsaj chuscu chunga quintal bronceta, chuscu patsaj quintal jirrutapashmi caranajurca.

8Shinallata, juyailla rumicunata charijcunapash, Mandaj Diospaj huasita juyaillaguta rurachunmi, Gersón runamanda mirai, Jehiel runapaj maquipi cunajurca.

9Gentecunaca, paicunapaj tucui shunguhuan, Mandaj Diosman tucui imatalla carashpami ninanda cushijunajurca.

10Shinallata, jatun mandaj Davidpash, ninanda cushijushpami, tucuicunapaj ñaupajpi, Mandaj Diostaca cashna nishpa alicachijurca: “Ñucanchi ñaupa taita Israelta Mandaj Dioslla, canga tucui causaipimi alicachi tucuna cangui.

11Mandaj Dioslla, ninan ushaita charinapash, ninan Jatun canapash, punchapamba canapash, tucuita mishaj canapash, ninanda alicachi tucunapash Cambajmi capan. Mandaj Dioslla Jahua pachapash cai pachapash Can mandanami capan. Tucuita yalipachami cangui.

12Imaguta charinatapash, ninanda cushijunatapash Canmi carangui. Tucuitami Canga Mandajungui. Tucuita mandanapash, tucui ushaita charinapash, tucuicunata jatunyachinapash, ushaita caranapash Cambaj maquipimi capan.

13Chaimandami ñucanchi Jatun Diostaca, Paipaj Shutipi candashpa alicachinajunchi.

14Ñucapash, caipi causajcunapash, Canman ofrendata carangapaca imata canchiyari. Caipachapi ima tiyashcapash Cambajllatami capan. Canllata ñucanchiman carashcatami Canmanga cunajunchi.

15Cambaj ñaupajpica, ñucanchi ñaupa taitacunashnallata, shuj llactacunamanda shamushpa mingarishpa causashcami canchi. Ñucanchipaj causaica, llandu chingarinshna ashapallami causanchi.

16Ñucanchita Mandaj Dioslla, jucha illaj Cambaj shutita alicachina huasita shayachingapami, cai tucuitaca tandachishcanchi. Chaicunataca, Cambaj maquimandami japircanchi. Tucui imapash Cambajllatami capan.

17Ñuca Dioslla, ñucanchi shungu ima cajta yachashpami, imatapash alita rurajpica alicachingui. Chaimandami, tucui shunguhuan, tucui juyaihuan, tucui ñuca munaihuan caicunataca curcani. Cunanga, caipi tandanajushca, Can agllashca gentecunapash cushijuihuan caranajujtami ricupani.

18Ñucanchi ñaupa taita Abrahamda, Isaacta, Israelta Mandaj Taita Dioslla. Can agllashca gentecunataca, Cambaj munaita rurashpa causachun, paicunapaj shungupi ali yuyaita carapailla. Paicunapaj tucui causaipi Canda yarishpa causachun, shungupi yarichipanguilla.

19Shinallata, ñuca churi Salomonbash, ama pandarichun ali yuyaicunata cupanguiyari. Chashna cashpami Can mandashcata, Can ima nijushcata, Can yachachishcata pactachishpa causanga. Shinallata, Cambaj huasita shayachingapa ñuca tandachishcahuanga aliguta yarishpa rurachunga, paipaj shungupi yachachipangui” nijurcami.

20Shina mañashca jipami Davidca: “Cangunata, Mandaj Diostaca alicachinami canguichi” nirca. Shina nijpimi, tandanajushca gentecunaca, paicunapaj ñaupa taitacunata Mandaj Diostaca, Mandaj Diospaj ñaupajpipash, jatun mandaj Davidpaj ñaupajpipash, cungurishpa alicachinajurca.

21Chai cayandi punllami, Mandaj Diosman animalcunata cushpa, tucuillata rupachinajurca. Paicunaca huaranga shicuta, huaranga llamata, huaranga maltun llamatami, vinota talishpa tucuillata rupachinajurca. Shinallata, tucui Israelcuna carashca animalcunatami, Diosman cushpa huañuchinajurca.

22Chai punllapica, Mandaj Diospaj ñaupajpi micushpa ufiashpami, ninanda cushijunajurca. Chai jipami, Davidpaj churi Salomondaca, Israelcunata jatun mandaj cachun, juyailla churajunata churachinajurca. Sadoc shuti sacerdotetaca, Mandaj Diospaj ñaupajpi aceiteta talishpami, sacerdotecunata mandaj cachun churanajurca.

23Salomonga, Mandaj Dios cushca tiyarinapimi, paipaj taita Davidpaj randi tiyarirca. Salomonga, tucuipi ali cajpimi, Israel gentecunaca aliguta cazunajurca.

24Tucui cati mandajcunapash, ushaita charijcunapash, mandaj David charishca caishuj churicunapash, tucuicunami jatun mandaj Salomondaca alicachinajurca.

25Mandaj Diosca, tucui Israelcunapaj ñaupajpimi Salomondaca ninanda jatunyachijurca. Punda mandajcunamanda ashtahuan yali ali mandashcamanda jatunyachi tucuchunmi chashna ruranajurca.

David huañushcamanda(1 Rey. 2:10-12)

26Isaí runapaj churi Davidmi, tucui Israel llactata mandajurca.

27Paica, chuscu chunga huatatami, Israel llactataca mandajurca. Canchis huatataca, Hebrón pueblopi, quimsa chunga quimsa huatataca, Jerusalenbimi mandajurca.

28Paica, ashtaca punllacunata causashpa, ali rucuyashpami huañurca. Paica, ninan charijpash, alicachi tucushcapashmi carca. Pai huañujpica, paipaj churi Salomonmi paipaj randi mandajurca.

29Callarimanda tucuringacaman, jatun mandaj David imata rurashcataca, Dios ricuchishcata villaj Samuel, profeta Natán, Dios ricuchishcata villaj Gad shuti runacuna quilcashca librocunapimi tiyajun.

30Chai librocunapica, pai imashna mandajushcata, pai ninan shinlli cashcata, pai ima tucushcata, Israel llacta ima tucushcata, tucuilla llactacunapipash imashnalla mandajushcatapash quilcashcami tiyajun.