1Ñucapajta ruraj, Ñuca agllashca runataca, Ñucami ricuriasha.
Paimi, Ñucataca ninanda cushichin.
Ñuca Espiritutaca, Paipimi churarcani.
Paimi, alitalla ruranataca, llactacunaman apamunga.
2Paica, na caparijungachu, na shinllita rimajungachu.
Pai rimashcapash, na ñangunapi uyarijungachu.
3Faquirinalla sucustapash, na faquingachu.
Huañunalla rupajuj michatapash, na huañuchingachu.
Ashtahuangarin na llullashpa, alitallami ruranga.
4Paica, cai pachapica alitalla rurana tiyangacamanmi, tucuita pactachijunga.
Mama cucha manñacunapi causajcunapash, pai mandashcatami shuyanajunga” ninmi.
5Mandaj Taita Diosca, jahua pachata rurashpaca, fachata mandajshnami churarca.
Paimi, cai pachatapash, caipi tucui imalla tiyajcunatapash rurarca.
Cai pachapi causajcunamambash, Paimi causana samaitapash cararca. Paicunatami cashna nijun:
6“Mandaj Dios Ñucami, Candaca ali cashcatalla rurachun cayarcani.
Ñucallatami, Cambaj maquimanda pushashpa, Candaca ricuriasha.
Candami, Ñuca agllashcacunahuan ari nishcata pactachingapa cachamurcani.
Candaca, shuj llactapi causajcunapaj michashna cachunmi churasha.
7Ñausacunapaj ñavita pascachun,
prezu tiyanajujcunatapash, yana ucucunapi vichai tucushcacunatapash llujchijuchunmi ushaita cusha.
8Ñucami, Mandaj Dios cani.
Ñuca ninanda alicachi tucunataca, pimambash na cushachu.
Rurashcalla dioscunatara, alicachishpa causachunga na saquishachu.
9Ricuichi, punda Ñuca villashcacunaca, ñami pactamurca.
Cunanga, nara rurashca mushujta jipaman ruranatami villajuni.
Chaicunataca pactachishapachami” ninmi.
Mandaj Diostaca, ninan ushaihuan quishpichij cajpimi alicachishca10Mandaj Diostaca, mushuj candanahuan candaichiyari.
Cai pachapi causajcunaca, tucuicunami alicachina canguichi.
Mama cuchaman urai rijcunapash, chaipi imalla tiyajcunapash,
mama cucha chaupipi tiyaj llactacunapash, chaipi tucui causajcunapash, alicachinami canguichi.
11Jichushca pambacunapash, chaipi tiyaj pueblocunapi causajcunapash,
chai muyundicunapi causaj, Cedar shuti ayllu runacunapash, alicachinami canguichi.
Sela shuti pueblopi causajcunapash, ninan cushijuihuan, urcu pundacunamanda caparishpa candanami canguichi.
12Mandaj Diostaca, ninandami alicachina canguichi.
Mama cucha manñacunapi causajcunapash, Paitami alicachina canguichi.
13Mandaj Diosca, manllanayai jatun runashnami llujshinga.
Macanajunata ali yachaj runashnami, ninanda fiñarishpa shayaringa.
Paica, ninanda caparishpa shinlli tucushpami, paita fiñajcunahuanga macanajunga.
Shinlli tucushpami shayaringa.
14Taita Diosca: “Ñucaca, unai huatacunatami upalla uyarcani.
Imatapash na ricujunshna, na uyajunshna, casilla tiyajurcanillami.
Unguna nanaihuan huarmi ninanda caparinshnami, shinllita caparisha.
Llaquinayaita huañuchishpami, tucuicunata tucuchisha.
15Urcucunapi, lomacunapi tiyaj jihuacunata chaquichishpami, jichushcata saquisha.
Jatun yacu rijuj huaicucunatapash, chaquishca alpatami saquisha.
Cuchayashca yacucunatapashmi chaquichisha.
16Ñausacunataca, paicuna na purishca ñandami pushasha.
Paicuna na rijsishca chaqui ñangunatami, aliguta pushasha.
Paicunapaj ñaupajpica, yana tutatapash, punchapamba michamanmi tigrachisha.
Na puri ushanalla ñangunatapash, ali ñanmanmi tigrachisha.
Caicunata rurashpami, paicunataca napacha jichusha.
17Rurashcalla dioscunata yariajlla causajcunaca,
ninandapacha pingaichi tucushpami, huashaman tigranajunga.
Paicunaca, yacuyachishpa imamambash rijchajcunata rurashcatami:
‘Cangunami, ñucanchi dioscuna canguichi’ ninajun.
Israelcunaca, Dios llaquichijpipash na cazujcuna cashcamanda18Na ali uyajcunapash, ali uyaichiyari.
Ñausacunapash, ñavita pascashpa ali ricuichiyari.
19¿Picunata ñausashna canga? Ñucapajta rurajcunami chashna tucushca.
¿Picunata rinri illajshna canga? Ñuca cachashca villajcunami chashna tucushca.
Mandaj Dios Ñucapajta rurajcuna, ñausacunashnaca, ¿pita tiyanga?
20Paicunaca, imata ricushpapash na yuyaipi japinllu.
Rinrita pascashpapash, imatallapash na ali uyanllu.
21Mandaj Diosca, alitalla ruranata juyaimandami,
Pai mandashca shimicunataca, juyailla cajtapash, jatun cajtapash ricuchinajuchun curca.
22Ashtahuangarin cai gentecunaca, tucuicunami imatapash quichui tucushpa, sarui tucushpa causanajun.
Utujucunapi japi tucushpa, prezui tucushcami tiyanajun.
Paicunataca, imatapash quichui tucushca causachunmi churashca.
Paicunata cacharichingapaca, pipash na tiyanllu.
Paicunata quichushpa apashcatapash, pipash na: ‘Tigrachinami cangui’ ninllu” nijurcami.
23Caicunataca, ¿pita uyashpa cazugringuichi?
Jipa punlla ima tucunata villajpipash, ¿Pita aligutapacha rinrita mañachishpa uyagringuichi?
24Jacobpaj mirai Israelcunataca, ¿pita prezu apai tucuchun saquishcanga?
¿Pita shuhuacunapaj maquipi churashcanga?
Mandaj Diosta na cazushpa juchata rurashcataca, ¿nachu yaringuichi?
Paicunaca, Pai mandashcata na cazushpami purinajurca.
25Chaimandami Diosca, Israelcunataca, ninandapacha fiñarishpa,
ninan ushaihuan jatun macanajuita paicunaman cachamurca.
Tucui muyundipimi ninata japichirca.
Shina rurajpipash, paicunaca napacha cazunajurcachu.
Nina rupashpa tucuchijujpipash, napacha cazunajurcachu.
Who We AreWhat We EelieveWhat We Do
2025 by iamachristian.org,Inc All rights reserved.
