1Shina cashcamanda, huauquicuna panicuna, Taita Dios ninanda juyajushcamanda, cangunapaj tucui causaita Diosman cushpa, Paipajta rurashpami causana capanguichi, nishpami mañajuni. Chashna causashpami, Taita Diosta alicachinajushcata ricuchinguichi.
2Na cai pachapajtalla rurashpa causanachu canguichi. Ashtahuangarin, cangunapaj yuyaita Dios mushujyachijpimi mushujta causana canguichi. Shina causashpami, Taita Diospaj munai ima cajta, Dios chasquijujta, chashnapacha cashcatapash yachai ushanguichi.
3Diospaj ninan juyaita ñucaman carashcamandami, cangunataca: “Maijambash cangunallataca na jatunbi ricurinachu canguichi” nini. Ashtahuangarin, imashna Dios churashcata chasquishpami causana canguichi. Taita Dios tucuicunaman crinata carashcashnami aliguta yarishpa causana canguichi.
4Ñucanchi cuerpopica maquicuna, chaquicuna ashtahuan tucuicunatami charinchi, shina cashpapash na tucuilla chaitalla ruranllu.
5Chashnallatami ñucanchica, ashtacacuna cashpapash, Cristohuanga shujlla cuerpo canchi. Shina cashpami caishujhuan, chaishujhuan paipurallata canchi.
6Shinamandami, Diosca ñucanchita ninanda juyashpa, imata rurachumbash ushaita cararca. Profeta cachun ushaita cushca cajpica, Dios ima nishcatallami villanata charin.
7Shujcunaman ima alita ruraj cashpaca, chaita pactachishpa causachun. Yachachij cashpapash, yachachishpa causachun.
8Yarichishpa rimaj cashpaca, chaita pactachishpa causachun. Imaguta carajpash, juyaihuan carachun. Pushaj cashpapash, aliguta ricushpa pushachun. Llaquishpa yanapajpash, cushijushpa rurachun.
9Na nij tucushpallami, juyarishpa causana canguichi. Na alicunataca napacha rurashpami, alitalla rurashpa causana canguichi.
10Huauquipurashnami, aliguta juyarishpa causana canguichi. Caishuj chaishuj, ninanda alicachirishpa, chasquirishpami causana canguichi.
11Na quillanayachishpami, imata cashpapash uchalla rurana canguichi. Ali yuyaihuambachami, Apunchi Jesusman rurana canguichi.
12Japigrinata yachashpami cushijushpa shuyana canguichi. Jatun llaqui japijpipash, llaquita apanallami canguichi. Na cungashpami Diosta mañashpa causana canguichi.
13Diospajlla causaj crijcunapaj imagu illajpipash, caranami canguichi. Huasiman shamujpipash, mingachinami canguichi.
14Catiriyashpa llaquichijcunatapash, juyanami canguichi. “Ima llaquipash japishpachari ali canman” ningapa randica, juyaitami ricuchina canguichi.
15Cushilla cajcunahuanga cushijuichi, huacanajujcunahuanga huacaichi.
16Cangunapurapash, shujllashnalla yarishpa causaichi. Na jatun tucunachu canguichi. Na jariyajcunahuanmi tandanajuna canguichi. Cangunapaj yuyaipilla, “alipachami yachani” yashpaca na causanachu canguichi.
17Pipash, cangunata ima na alita rurajpipash, na chashnallata tigrachinachu canguichi. Tucuicunapaj ñaupajpi, aliguta rurashpa causanatami mascana canguichi.
18Canguna ushashcacamanga, tucuicunahuan na fiñanajushpa, aliguta causanatami mascana canguichi.
19Ñuca juyashca crijcuna, cangunata llaquichijcunataca, na chashnallata llaquichinachu canguichi. Ashtahuangarin, Taita Dios llaquichijuchunmi saquinalla canguichi. Dios quilcachishcapica cashnami nijun: “Mandaj Diosca: ‘Ñucami randi llaquichisha. Ñucami, imata cuna cashcatapash cusha’ ninmi” nijunmi.
20Shina cashcamanda: “Canda na ricunayachij runa yarjachijujpica, micunaguta caranguilla. Yacunayaihuan cajpipash, yacuguta caranguilla. Shina rurajpimi, na alita rurashcamandaca, llaquirishpa, pingai tucunga” nijunmi.
21Ima na ali rurana munai mishachunga na saquinachu cangui. Ashtahuangarin, aliguta rurashpami, chai na alitaca mishana cangui.
Who We AreWhat We EelieveWhat We Do
2025 by iamachristian.org,Inc All rights reserved.
