NEHEMÍAS 13 - Quichua Imbabura 2016

Nehemías mushuj mandashcacunata churashcamanda

1Chai punllapica, Moisés quilcashcatami tucui gentecunapaj ñaupajpi quilca catirca. Chai quilcashcapica: Taita Dios agllashca gentecunaca, Moab llacta gentecunahuan, Amón llacta gentecunahuanga, napacha tandanajunachu nijujtami tarirca.

2Paicunaca, tandahuan, yacuhuanga na tuparimushpami, ashtahuangarin, Balaam shuti runa, Israelcuna ninan llaquita apachun Diosta mañachun nishpa culquita cushca carca. Shina cajpipash Taita Dios rimachijpimi, chai runaca Taita Dios bendicianata rimarca.

3Chai mandashcata uyashpami, Israelcunahuan chapurishca shuj llactamanda gentecunataca shicanyachirca.

4Nara chashna rurajpica, Eliasib shuti sacerdotemi, Taita Diospaj huasi ucucunapica mandajurca. Paica, Tobías runapaj ayllupurami tucushca carca.

5Paimanmi Diospaj huasi ñaupajpica, shuj jatun ucuta rurashpa cushca carca. Chaipimi ofrendacunata, inciensota, imatalla charishcacunata, trigota, vinota, aceiteta, chungamanda shujguta cushcacunata alichijuj carca. Chaicunataca levitacunaman, candajcunaman, pungucunapi ricunajujcunaman, sacerdotecunaman cuchunmi mandashca carca.

6Chai punllacunapica, ñucapash na Jerusalenbichu carcani. Ashtahuangarin jatun mandaj Artajerjes shuti runa, quimsa chunga ishcai huatata Babilonia llactata mandajujpica, chaimanmi tigrarcani. Huaquin punllacunata chaipi cashpami, cutinllata Jerusalenman tigrasha nishpa mañarcani.

7Jerusalenbica, Eliasib shuti sacerdoteca, Tobías runata llaquishpa, Diospaj huasi pungu quimiriapi pai causana huasita rurashpa, na alita rurashcatami ricurcani.

8Chaimandami ninanda fiñarishpa, Tobías runa imata charishcatapash, llujchishpa canllaman shitarcani.

9Chai jipami tucuilla fichashpa, Taita Diospaj huasipi ima tiyashcatapash, Diosman ofrendacunata cushcatapash, inciensocunatapash, chai ucupillata cutin churachun mandarcani.

10Shinallata, levitacunaman cuna cashcatapash na cujpi, levitacunapash, Diospajta rurashpa candajcunapash, paicunapaj alpamanllata pacajushpa rishcatami japigrircani.

11Chaita ricushpami mandajcunataca: “¿Imashpata Taita Diospaj huasitaca, cashna jichushpa saquircanguichi?” nishpa rimarcani. Chai jipami sacerdotecunata, levitacunata tandachishpa, paicuna punda ruranajushcapi cutin ruranajuchun churarcani.

12Chaimandami Judá llactapi causajcuna, trigota, vinota, aceiteta, chungamanda shujguta cungapa apamushcataca, chai alichina ucupi alichinajurca.

13Chai jipami, sacerdote Selemías runata, quilcaj Sadoc runata, levitapuramanda Pedaías runatapash tucuita ricunajuchun churarcani. Paicunata yanapachunga, Zacur shuti runapaj churi Hanán shuti runatami churarcani. Zacur shuti runaca, Matanías runapaj churimi carca. Paicunami, Diosta ali cazushpa, pactachijcuna cajpi, paicunapaj huauquicunaman chaupishpa cunajuchun churarcani.

14Chai jipaca cashna nishpami mañarcani: “Ñuca Taita Dioslla, Cambaj huasipi Cambajta rurajushpa, Canda juyashpa alita rurashcamandaca ama cungahuanguichu” nircanimi.

15Chai punllacunapimi, Judá llactapica, samana punllacunapi, uvata cutanajujta, granocunata aparinajujta, vinota, uvata, higota, imata cashpapash burrucunapi apachishpa, Jerusalenman shamunajujta ricurcani. Samana punllapi chashna ruranajujta ricushpami, gentecunataca shinllitapacha rimarcani.

16Shinallata, Tiro shuti pueblomanda shamushca gentecunami samana punllapica, pijicunata, imata cashpapash, Judá llactapi causajcunaman Jerusalenbi jatunajurca.

17Chaimandami, Judá llactapi mandajcunataca: “¿Ima nishpata samana punllacunapi cashna na alita ruranajunguichi?

18¿Nachu cangunapaj ñaupa taitacunatapash, cashna na alita rurashcamanda, Taita Diosca ninanda llaquichirca? ¿Cangunapashchu samana punllata yangapi churashpa, Taita Dios, Israelcunata fiñashpa ninanda llaquichijuchun cashna ruranguichi?” nircani.

19Cayapaca samana punlla cajpimi, chishi ña amsayajujpi, Jerusalén pungucunataca vichachun mandarcani. Chaitaca, ña samana punlla yalijpi pascachunmi mandarcani. Shinallata, samana punllapica, aparishca quipicunahuan pipash ama yaicumuchunmi, ñucapajta ruraj runacunata pungucunapi ricuchun churarcani.

20Chaimandami randijcunapash, jatujcunapash, Jerusalenbica, canllapi cutin cutin shuyanajuj carca.

21Chaimandami paicunataca: “¿Imashpata cai pirca ñaupajpi shuyanajunguichi? Cutinllata caipi japishpaca, prezuna huasipimi churagrisha” nircani. Shina nijpimi paicunaca, samana punllapica cutinga na shamurca.

22Chai jipami, levitacunataca mapa illaj cashpalla, Diospajlla huasi pungucunapi ricunajuchun mandarcani. Chashna rurashpami, samana punllacunataca, Diospajlla shicanyachishca cachun pactachinajurca.

Chai jipami: “Ñuca Taita Dioslla, cashna alita rurashcamandaca ama cungashpa, ñucatapash llaquihuangui” nishpa mañarcani.

23Chai punllacunapimi, Judá llactapi causajcunataca, Asdod, Amón, Moab llactacunamanda huarmicunahuan cazarashpa causanajujta ricurcani.

24Chai huarmicunahuan charishca huahuacunaca, Judá llacta rimaitaca na rimashpami, chaupica Asdod pueblopaj rimaipi, shuj llactacunapaj rimaicunapi rimanajurca.

25Chaimandami paicunataca ninanda fiñashpa, “cangunataca ima llaquipash japishpami ali canman” nishpa rimarcani. Huaquindaca, astichishpami, huaquindaca ajchata pilachircani. Chai jipami paicunataca Diospaj shutipi: “Cangunapaj ushicunatapash, cangunapaj churicunatapash chai gentecunahuanga napacha cazarachinachu canguichi” nishpa juramentochircani.

26Israel llactata jatun mandaj Salomonbash, ¿nachu chaimandallata juchata rurarca? Paica, shuj llactacunata jatun mandajcunata ashtahuan yali ali mandajmi carca. Taita Dios juyashpa churajpimi, Israel llactata jatun mandaj tucurca. Chashna cajpipash shuj llactamanda huarmicunami, paitaca juchata rurachirca.

27Shina cashcamandami cangunataca, shuj llactamanda huarmicunahuan cazarashpa, Taita Diosta fiñachinajuchunga napacha saquina canchi, nircani.

28Joiada shuti runapaj shuj churimi, Horón llactamanda Sanbalat shuti runapaj ushita cazararca. Chaimandami paitaca llujchishpa cacharcani. Joiada runaca, sacerdotecunata mandaj Eliasib shuti runapaj churimi carca.

29Ñuca Taita Dioslla, sacerdotecunapash, levitacunapash ama mapayangapa ari nishcata cungashpa, na alita rurashcamandaca ninanda llaquichipangui.

30Shuj llactamanda shamushcacunata anchuchishpami, sacerdotecunata, levitacunataca, paicunapuratalla tandachishpa, punda ruranajushca pushtupi cutin ruranajuchun churarcani.

31Diosman carana yamdatapash, punda fucushca granotapash alichinajuchunmi churarcani. “Ñuca Taita Dioslla, ñucata ama cungashpa, ñucamambash alita rurapangui” nircanimi.