NÚMEROS 9 - Quichua Imbabura 2016

Pascua cushijui punllamanda

1Mandaj Diosca, Sinaí chaquishca pambapimi, Israelcuna Egipto llactamanda llujshimushcapash, ña ishcai huatapaj callari quillapi, Moisesman cashna nijurca:

2“Israelcunaca, pascua punllapipachami cushijui micui punllataca ruranajunga.

3Cai callari quillapi chunga chuscu punlla tucujpica, chishipimi chai cushijui micuitaca charina canguichi. Tucuita imashna rurana cashcashnallata, imashna mandashcashnallata cushijushpa micunguichi” nircami.

4Shina nijpimi Moisesca, Israelcunataca pascua punllapi cushijushpa micunajuchun mandarca.

5Shinamandami Israelcunaca, Sinaí chaquishca pambapica, huata callari quillapi, chunga chuscu punlla chishipica, chai cushijui micuita ruranajurca. Mandaj Dios, Moisesman tucuita mandashcashnami, Israelcunaca chashnatapacha ruranajurca.

6Ashtahuangarin huaquingunaca, huañushcapi tacarishpa mapayashca cashpami, pascua punllapi micuitaca na ushanajurca. Chaimandami, chai punllallata Moisespaj ñaupajman, Aaronbaj ñaupajman shamushpa,

7chai runacunaca cashna ninajurca:

“Ñucanchica, huañushcapi tacarishpami mapayashcanchi. Chaimandallachu, Israelcunahuan pascua punllapi, Mandaj Diosman ofrendata caraitaca ¿na ushana capanchi?” ninajurcami.

8Shina ninajujpimi Moisesca cashna nirca:

“Ashata shuyaichi, Mandaj Dios cangunamanda imata nijta uyagrisha” nircami.

9Chaipimi Mandaj Diosca, Moisestaca cashna nirca:

10“Israelcunaman cashna nishpa villangui: ‘Cangunapash, cangunapaj miraicunapash, huañushcapi tacarishpa mapayashca cashpa, na cashpaca, caru llactapi causajushpapash Mandaj Dios Ñucata yarishpa, pascua punllapi cushijushpa micuitaca rurachunlla.

11Paicunaca, cati quilla chunga chuscu punlla chishipimi, chai cushijui micuitaca micunajunga. Chai punllapica, jayaj jihuahuan, levadura illaj tandahuanmi micunajunga.

12Diosman cushpa huañuchishca animalpaj aichataca, cayandi punllapaca imatallapash na puchuchinachu. Chai huañuchishca animalpaj tullutapash, na faquingachu. Pascua punllapi imashna tucuita rurana cashcashnami cushijushpa micunajunga.

13Ashtahuangarin maijambash mapa illaj cashpata, maimambash na rishca cashpata, pascua punllapi na micushpaca, Israelpuramandaca anchuchi tucungapachami. Mandashca punllapi, Mandaj Diosman ofrendata na carashcamandami, chai runaca, paipaj juchamanda llaquita apanga.

14Shuj llactamanda shamushpa cangunahuan causajushpa, paipash Mandaj Dios Ñucata yarishpa, pascua punllapi micushpaca, imashna rurana cashcashna, imashna mandashcashna rurachun. Shuj llactamanda cashpa, chai llactapillata huacharishca cashpapash, imashna rurana cashcashnallatami rurana’ nishpa villangui” nijurcami.

Diospaj jatun carpa jahuaman fuyu shamushcamanda(Éx. 40:34-38)

15Diospaj jatun carpata shayachinajui punllapica, arca tiyajuj jatun carpa jahuapimi fuyu quilparca. Chishi amsayajunmanda cayandi tutamandacamanmi, Diospaj jatun carpapica ninashnalla ricurijurca.

16Chashnami, punllapica fuyu quilpajurca. Tutaca, nina rupajunshnami ricurijurca. Chashnami punllapash, tutapash ricurishpa catijurcalla.

17Diospaj jatun carpa jahuamanda fuyu ña vichai rijpica, Israelcunapashmi rinajurca. Fuyu maipi shayarijpipash chaipimi, paicunapaj carpacunata shayachishpa tiyanajurca.

18Israelcunaca, Mandaj Dios mandajpillami rinajurca. Mandaj Dios mandajpillatami, carpacunatapash shayachishpa tiyanajurca. Diospaj jatun carpa jahuapi fuyu tiyajui punllacunaca, paicunaca chai pushtupimi causanajurca.

19Diospaj carpa jahuapi fuyu unai punllacunata tiyajujpica, Israelcunaca Mandaj Dios mandashcata cazushpami, maimambash na rinajurca.

20Diospaj carpa jahuapi fuyu ashalla punllacunata tiyajujpica Israelcunaca, Mandaj Dios mandajpimi, carpacunata shayachishpa tiyanajurca. Shinallata Mandaj Dios mandajpillatami rinajurca.

21Chishimandapacha, tutamandacaman fuyu tiyajujpi, na cashpaca tutamanda fuyu vichai rijpica, Israelcunaca rinllami carca. Na cashpaca, shuj punllata chishashpa tutayajpi, fuyu vichai rijpica, rinllami carca.

22Fuyuca, huaquimbica ishcai punllata, huaquimbica shuj quillata, na cashpaca shuj huatatami, Diospaj carpa jahuapica tiyajuj carca. Fuyu chaipi tiyajujpica, Israelcunapash na maimambash rishpami, chaipi tiyanajun carca. Ashtahuangarin, fuyu vichai rijpica, paicunapashmi rinajuj carca.

23Mandaj Dios mandajpillami, carpacunata shayachishpa tiyarinajurca. Mandaj Dios mandajpillatami rinajurca. Mandaj Dios mandashpa, Moiseshuan villashcashnami paicunaca, Mandaj Dios mandashcata pactachinajurca.