SANTIAGO 1 - Quichua Imbabura 2016

“Alillachu capanguichi” nishcami

1Taita Diospajta, Apunchi Jesucristopajta ruraj Santiagomi cani. Caiman chaiman rishpa causanajuj, chunga ishcai Israel ayllucunatami, “alillachu capanguichi” nijuni.

Alipacha yachanaca Taita Diosmandami shamun

2Ñuca juyashca crijcuna, ima llaquicuna japijpipash, ninanda cushijushpa causanguichi.

3Crij cashcamanda llaquicuna japimushpaca, ama fiñarishpa, tucui shunguhuan ali crishpa causachunmi yachachijun.

4Chashna na ñapash fiñarishpa causashpami, tucuita alitapacha pactachina canguichi. Shina cashpami, ima pandatapash na rurashpa, alipacha crishpa, tucuita pactachishpa causanguichi.

5Cangunapurapi, maijambash nara ali yachajushca cashpaca, Taita Diostami mañana canguichi. Paica, tucuicunaman ashtacata caramujlla cashpami, cangunamambash caranga.

6Alipacha crishpa, na ishcai shungu tucushpami mañana cangui. Ishcai shungu tucushpa mañajcunaca, mama cucha yacuta, huaira caiman chaiman apajunshnami.

7Maijambash chashna mañashpaca, Jatun Dios imagutapash carajpi japinataca ama yajuchun ninimi.

8Ishcai shungu tucushpa mañaj runaca, imata rurashpapash, aliguta causaitaca napacha ushangachu.

9Maijan cashpapash, imaguta na charishpapash, Taita Dios jatumbi churashcata yachashpami ninanda cushijuna.

10Shinallata charij cashpapash, Dios quichujpica, cushijuchun ninimi. Charijcunaca, jihua sisa chaquinshnami tucuringa.

11Indi llujshimushpa ninanda rupajpica, jihuaca chaquinllami. Shinallata, sisa urmajpica, juyailla cashcapash tucurinllami. Shinallatami, ninanda charij runapash, pai tucuita charishcacunandi tucuringa.

Na ali munaicunata mishanamanda

12Na alita rurana munaita mishajcunaca, ninandami cushijunga. Shinlli shayarishpa mishashpaca, causaita causagrinata ricuchij coronatami japigringa. Chaitaca Taita Diosca, Paita juyajcunamanmi “carashapacha” nijun.

13Maijandapash, na ali munaicuna japijpica, caitaca Taita Diosmi cachamushca yanguichiman. Taita Diosca, na ali munaicunataca napacha charishpami, chai na alicunataca pimambash na cachamun.

14Ashtahuangarin, chai na ali munaicunaca, gentecunapaj shungupi tiyajushpami, pita cashpapash, na alita rurachun yarichishpa pandachijun.

15Chai na ali munaicuna tiyashpami, juchaca ruraiman apan. Chai juchata rurashpa catijpica, huañuimanmi apan.

16Ñuca juyashca crijcuna, napacha pandarinachu canguichi.

17Tucui ima alita caramushcapash, na pandata ruranapash jahua pachamandami shamun. Taita Diosmi punchayachij michacunataca churarca. Paica, viñaipaj chashnallata Dios cashpami, ashallatapash na shujman tigranga.

18Taita Diosca, Pai munashcata rurashpami, na llullashpa villajuj Shimita ñucanchiman villashpa mushujman tigrachirca. Pai churashcamandaca punda cachunmi ñucanchitaca chashna rurashca.

Diospaj Shimita pactachinamanda

19Shina cashcamanda, ñuca juyashca crijcuna, tucuicunallatami, aliguta uyajcuna, aliguta yarishpara rimajcuna, na ñapash fiñarijcuna cana canguichi.

20Fiñarijlla runacunaca, Taita Dios mandashcataca napacha pactachi ushanllu.

21Shinamandami, mapata ruranata, na alitalla ruranatapash tucuilla saquina canguichi. Shina rurashpami, Diospaj Shimi cangunapaj shungupi tarpushcashna tiyajujtaca, ali yuyaihuan chasquinguichi. Chai Shimica, cangunapaj almata quishpichingapami ushaita charin.

22Diospaj Shimitaca, na yanga uyajcunalla canachu canguichi, ashtahuangarin, cazujcunami cana canguichi. Uyashpalla purinajushpaca, cangunallatami pandarinajunguichi.

23Diospaj Shimita uyashpapash na cazushpa purijcunaca, ñavita espejopi ricurijujshnami.

24Paicunaca, ñavi imashna cajta ricurishpa rishca jipaca, imashna cashcatapash cunganllami.

25Ashtahuangarin maijambash, huatashcashna cashcamanda cacharichij mandashca shimicunata, na cungashpa pactachishpa causajushpami, ninan cushijuita charinga.

26Cangunapurapi maijambash, Diosta crijmi cani nijushpapash, paipaj jallu rimanata na jarcari ushashpaca, paipaj shungupillatami pandarijun. Shinamandami, Diosta crijmi cani yajushcapash, yangapacha ricurijun.

27Taita Diospaj ñaupajpi, jucha illaj, ali crij canaca: Taita mama illaj huahuacunata ricugrina, llaquilla causaj sapalla huarmicunata yanapana, shinallata, cai pachapi ima na alicunamanda anchurishpa causanami.