1Mandaj Dios, jahua pachaman Eliasta jatun acapanapi apana punllapimi: Eliasca, Eliseondi Gilgal pueblomanda shamunajurca.
2Chaipimi Eliasca, Eliseotaca cashna nirca:
“Cunanga, canga caipi saquirilla. Ñucataca Mandaj Diosmi, Bet-el shuti puebloman cachajuhuan” nircami.
Shina nijpimi Eliseoca, cashna nirca:
“Mandaj Diosca ricujunmi, cambash caipimi cangui. Canmandaca napacha shicanyarishachu” nirca.
Chai jipaca, ishcandimi Bet-el shuti puebloman urai rinajurca.
3Chaiman ña chayajpimi, tandanajushca profetacunaca, Eliseota tuparingapa, Bet-el pueblomanda llujshishpa cashna ninajurca:
“¿Mandaj Diosca, canda mandaj Eliasta cunan quichushpa apanataca yachanguichu?” ninajujpimi, Eliseoca:
“Ari, yachanimi. Upalla caichilla” nirca.
4Eliasca, cutinmi Eliseotaca cashna nirca:
“Cunanga, canga caipi saquirilla. Ñucataca, Mandaj Diosmi Jericó puebloman cachajuhuan” nirca.
Shina nijpimi, Eliseoca:
“Mandaj Diosca ricujunmi, cambash caipimi cangui. Canmandaca napacha shicanyarishachu” nirca.
Chai jipami, Jericó puebloman ishcandi shamunajurca.
5Paicuna ña chayajpimi, Jericó pueblopi causaj tandanajushca profetacunaca, Eliseopajman quimirishpa, cashna ninajurca:
“¿Mandaj Diosca, canda mandaj Eliasta cunan quichushpa apanataca yachanguichu?” ninajujpimi, Eliseoca:
“Ari, yachanimi. Upalla caichilla” nirca.
6Chai jipami Eliasca, Eliseotaca: “Canga, caipi shuyapailla nipanimi. Ñucataca Mandaj Diosmi, Jordán yacu manñaman cachajuhuan” nirca.
Shina nijpimi Eliseoca, cashna nirca:
“Mandaj Diosca ricujunmi, cambash caipimi cangui. Canmandaca napacha shicanyarishachu” nirca.
Chai jipami ishcandillata rinajurca.
7Chaiman chayashpaca, Jordán yacu manñapimi ishcandi shayarirca. Chaipi shayanajujpimi, picha chunga tandanajushca profetacuna shamushpaca, paicunapaj chimbapura carupi shayarinajurca.
8Chaipimi Eliasca, paipaj jahualla churajushcata llujchishpa yacuta astirca. Shina astijpimi, yacuca caiman chaiman pascarijpi, paicunaca chaquishca alpata ishcandi yalinajurca.
9Ña yacuta yalishca jipami Eliasca, Eliseotaca cashna nirca:
“Ñucata cambaj ñaupajmanda nara anchuchijpillata, imata canmanda rurachun munashpapash mañahuailla” nirca.
Shina nijpimi Eliseoca:
“Can charishca ushaimandaca, ashtahuan yali ushaita charingapa carahuai nipanimi” nirca.
10Shina nijpimi Eliasca, cashna nirca:
“Na cui ushanallatami mañahuangui. Shina cajpipash, cambaj ñaupamanda ñucata apajta ricushpaca, japinguimi, na ricushpaca, na japinguichu” nirca.
11Chai jipaca, paicuna rinajujpillata, nina carreta, nina caballocunahuan shamushpa, ishcandita shicanyachijpimi, Eliasca jatun acapanapi jahua pachaman vichai rirca.
12Chaita ricushpami Eliseoca, cashna nishpa caparirca: “¡Ñuca taitalla, ñuca taitalla, canga Israelcunapaca macanajuna carretacunashna, caballopi tiyarishca runacunashnami cangui!” nirca. Chai jipaca, Eliastaca na ashtahuan ricurcachu. Chaipimi, paipaj churajunata liquishpa chaupirca.
13Chai jipaca, Eliaspaj jahualla churajuna alpaman urmashcata japishpami, Jordán yacu manñaman tigrashpa rishpa, chaipi shayarirca.
14Chaipi shayajushpami, Eliaspaj jahualla churajuna urmashcata japishpaca: “¿Eliasta Mandaj Taita Diosca maipita canga?” nishpa, chai churajunahuan yacuta astirca.
Elías astishcashnallata astijpi, yacu caiman chaiman pascarijpimi, Eliseoca chimbarca.
15Tandanajushca profetacunaca, Jordán yacu chimbaman Jericó pueblopi shayanajushpa, chaita ricushpami cashna ninajurca: “Eliaspaj espiritumi, Eliseopi causajun” ninajurcami. Shina nishpami, Eliasta tuparingapa rishpa, paipaj ñaupajpi cungurinajurca.
16Paicunaca cashnami ninajurca:
“Cambajta rurajpurapica, picha chunga shinlli runacunami shayanajun. Paicunataca, canda mandaj Eliasta mascachun cachapailla. Paitaca, Mandaj Diospaj Espiritura maijan urcumambash, na cashpaca maijan pugru pambamambash apashpa shitashcanman” ninajurcami.
Shina ninajujpimi, Eliseoca:
“Na pitapash cachanachu canguichi” nirca.
17Ashtahuangarin paicunaca, cachapaillayari ninajujpillatami Eliseoca, pingai tucushpa:
“Shina cashpaca cachaichilla” nirca.
Shina nijpimi paicunaca, chai picha chunga runacunata cacharca. Paicunaca, quimsa punllacaman mascashpapash, Eliastaca na tarircachu.
18Jericó pueblopi Eliseopajman paicuna tigramujpimi, Eliseoca:
“¿Nachu na rinachu canguichi nircani?” nirca.
19Jericó pueblopi causanajuj runacunami, Eliseotaca cashna ninajurca:
“Cai puebloca, ñucanchita mandaj alicachishpa ricushcashnallata ali pushtugumi. Chashna cashpapash, yacuca na alichu. Shinallata pambapipash, imallapash na fucunllu” ninajurcami.
20Shina ninajujpimi, Eliseoca:
“Shuj mushuj mangapi cachita apamuichi” nijpi, paicunaca apamunajurca.
21Eliseoca, yacu pugyucunaman rishpa, chai pugyucunapi cachita shitashpami cashna nijurca:
“Mandaj Diosca cashnami nin: Ñucami, cai yacutaca jambircani. Shina cashcamanda cai yacupica, huañuipash, ungüipash na tiyangachu ninmi” nijurcami.
22Shina nijpimi chai yacuca, Eliseo imashna nishcashna cunangaman ali tucushpa saquirishca.
23Chai jipaca, Bet-el shuti puebloman, Eliseo vichai rijujpimi, pueblopi causanajuj shuj huambracuna llujshishpaca: “¡Lluchu uma runa, vichai rilla! ¡Lluchu uma runa, vichai rilla!” nishpa asinajurca.
24Chaimandami, huashaman tigrarishpa Eliseo ricushpaca, Mandaj Diospaj shutipi chai huambracunataca: “Cangunataca, ima llaquipash japishpaca alichari canman” nirca. Chashna nijpimi, ishcai osocuna sachamanda llujshishpa, chuscu chunga ishcai huambracunataca, caita chaita fitishpa tucuchirca.
25Chai pueblomandaca, Carmelo shuti urcumanmi Eliseoca rirca. Chai urcumandaca, Samaria pueblomanmi tigrarca.
Who We AreWhat We EelieveWhat We Do
2025 by iamachristian.org,Inc All rights reserved.
