1 SAMUEL 22 - Quichua Imbabura 2016

1David chaimanda ña rishpaca, Adulam shuti jatun utujupimi pacajungapa rirca. Paipaj huauquicunapash, paipaj taitapaj huasi ucupurapash, David chaipi cajta yachashpami paipajman shamunajurca.

2Shinallata, llaquichi tucushcacunapash, culquita mañashpa na tigrachi ushashcacunapash, tucui llaquihuan causajcunapashmi, paihuan tandanajurca. Chaipimi Davidca, paicunata mandaj tucushpa, chuscu patsajshna runacunata tandachishca charirca.

3Chaimandaca, Moab llactapi tiyajuj Mizpa shuti pueblomanmi Davidca rirca. Chaiman chayashpami, Moab llactata jatun mandajtaca cashna nirca: “Taita Dios ñucata imatalla mandajtapash yachangacaman, ñuca taitatapash, ñuca mamatapash, caipi causachun saquipai nishpami mañapani” nircami.

4Shina nishpami, Moab llactata jatun mandajpaj ñaupajman pushamurca. Pircashca huashapi, David pacajushpa causajui tucui punllacunacamanmi, paicunaca jatun mandajhuan causanajurca.

5Chaipimi, Gad shuti profeta runaca, Davidtaca cashna nirca: “Pacajungapa pircashca cai pata huashapica, ama tiyajuillachu. Judá llactaman rilla” nijpimi, Davidca, Haret shuti quirucuna shayanajuj pambaman shamurca.

Nob pueblo causanajuj sacerdotecunata, Saúl huañuchishcamanda

6Saulca, David, paipaj cumbacunandi maipi cajtapash yacharcami. Saulca, Gabaa shuti puebloman chayanapi, shuj loma jahuapi shayajuj tamarisco shuti quiru ucupimi, tucsina jirruta chaririyaj tiyajurca. Chaipica, paipajta rurajcunapashmi, muyundi shayanajurca.

7Chaimandami Saulca, paipaj muyundipi shayanajuj runacunataca, cashna nijurca: “Benjamín ayllu runacuna, cunanga uyahuaichi. Isaí shuti runapaj churica, tucuicunamanmi, alpacunata, uva chagracunata caranga yanguichiman. Shinallata, cangunatara, huaranga runacunata, patsaj runacunata mandaj cachun churanga yanguichiman.

8¿Imashpata, cangunaca pacalla parlarinajunguichi? ¿Cangunaca ñuca churihuan, Isaí runapaj churihuan, imata rurangapa ari nirishcata yachashca jahuachu, na villahuarcanguichi? Cangunaca, ñucataca na llaquishpami puringuichi. Chaimandami, Davidca, ñuca churillata yachachijpi, cunangaman ñucata llaquichingapa munashpa purijun” nijurcami.

9Shina nijpimi, Saulpaj runacunata mandaj, Edom llactamanda Doeg shuti runaca, cashna nirca: “Ñucami, Isaí runapaj churitaca, Nob pueblopi causajuj Ahitob runapaj churi Ahimelec runapajman shamujta ricurcani.

10Chaipimi Ahimelec runaca, David imatalla ruranataca, Mandaj Diosta tapurca. Chai jipami, micunatapash, Goliat shuti filisteo runapaj espadatapash curca” nircami.

11Shina nijpimi jatun mandajca, Ahitob runapaj churi sacerdote Ahimelectapash, paipaj tucui ayllucunatapash, Nob shuti pueblomanda sacerdotecunatapash, cayachun cacharca. Shina cayajpimi, jatun mandajpajman tucuilla shamurca.

12Chaipimi Saulca: “Ahitob runapaj churi, cunanga ali uyahuai” nirca. Shina nijpimi, Ahimelec runaca: “Caipimi capani, ñucata mandajlla” nirca.

13Shina nijpimi Saulca, cashna nirca: “¿Imashpata canhuan, Isaí runapaj churihuanga, ñucata llujchingapa pacalla parlarircanguichi? Tandatapash, espadatapash cushpami, David imatalla ruranatapash, Taita Diosta tapushcangui. Chaitaca, ñucata fiñashpa llaquichijuchunmi, chashna rurashcangui. Cunan punllapica, paica chaitami rurajun” nircami.

14Shina nijpimi Ahimelec runaca, jatun mandajtaca cashna nirca: “Tucuilla cambajta rurajpuramandaca, can jatun mandajpaj masha Davidshna can imata mandashcatapash, tucuita pactachij runaca, ¿pita tiyanyari? Paica, can mandashpa tiyajuna huasipipash, tucuicuna alicachijpimi causajurca.

15¿Ñucaca, Davidmanda Taita Diosta tapunataca, cunanllu callarishcani? Napacha shinachu. Jatun mandajlla, cambajta ruraj ñucatapash, ñuca taitapaj mirai ayllucunatapash, ama yangaca juchachijuichu. Cambajta ruraj ñucaca, chaicunataca ali cajtapash, yangalla cajtapash nimata na yachapanichu” nircami.

16Shina nijpimi jatun mandaj Saulca, cashna nirca: “Ahimelec, cambash, cambaj taitapaj mirai ayllupurapash huañunapachami canguichi” nircami.

17Shina nishpallami jatun mandajca, paita muyundi ricushpa shayanajuj macanajunata yachaj runacunataca, cashna nirca: “Mandaj Diospaj sacerdotecunataca, huañuchinami canguichi. Paicunapashmari, Davidtaca tandanajushpa yanapanajushca. Chaimandami, pai pacajushpa rijujta yachashpapash, na villahuashca” nircami. Shina nijpipash, jatun mandajpajta rurajcunaca, Mandaj Diospaj sacerdotecunata huañuchingapaca na munarcachu.

18Chaimandami jatun mandajca, Doeg shuti runataca: “Sacerdotecunataca can huañuchi” nishpa mandarca. Shina mandajpimi, Edom llactamanda Doeg shuti runaca, linota rurashca efodta churajushca pusaj chunga picha sacerdotecunata, chai punllallata huañuchirca.

19Chai jipaca, sacerdotecuna causanajuj Nob shuti puebloman rishpami jaricunata, huarmicunata, huahuacunata, chuchujuj huahuacunatapash huañuchijurca. Shinallata, huagracunata, burrucunata, llamacunatapashmi, espadahuan huañuchijurca.

20Shina huañuchijujpimi, Ahitob runapaj churi, Ahimelec runapaj churipuramanda, Abiatar shuti shuj runaca, quishpirishpa Davidta catishpa rirca.

21Abiatar shuti runa, Mandaj Diospaj sacerdotecunata Saúl imashna huañuchishcatami, Davidman villarca.

22Chaimandami Davidca, Abiatar shuti runataca cashna nirca: “Chai punlla ñuca chaipi cashpallatami, Edom llactamanda Doeg shuti runa, Saulman villanataca yacharcani. Cambaj taitapaj mirai ayllucunaca, ñucamandami huañuchi tucushca.

23Canga ama manllashpa, ñucahuan saquirilla. Ñucata huañuchingapa mascaj runaca, candapashmi mascanga. Can ñucahuan cashpaca quishpiringuimi” nircami.