APOCALIPSIS 13 - Quichua Imbabura 2016

Manllanayai ishcai animalcunatami ricushca

1Mama cucha manñapi tiyaj illul alpapimi shayarircani. Chaipi shayajushpaca, canchis umayuj, chunga cachuyuj, manllanayai shuj animal, mama cuchamanda llujshijujtami ricurcani. Chai cachucunapica, chunga coronacunata churajushcami carca. Chai umacunapica, Diosta na alicachishpa rimashca shuticunami tiyanajurca.

2Ñuca ricushca chai manllanayai animalca, leopardoman rijchajmi carca. Chaquicunaca, osopaj chaquicunashnami carca. Shimica, leonbaj shimishnami carca. Paimanmi, dragonga, paipaj ushaitapash, pai mandashpa tiyarinatapash, ninanda mandai ushanatapash curca.

3Chai manllanayai animalpaj shuj umataca, huañunatashna chugrichishcatami ricurcani. Ashtahuangarin, huañunatashna chugrichishcapash, ali tucurcallami. Chaita ricushpami, cai pachapi tucui causajcunaca, ninanda manllarishpa, chai animaltaca catinajurca.

4Chaicunaca, manllanayai animalman mandai ushanata cuj dragondapash, chai manllanayai animaltapashmi, cashna nishpa ninanda alicachinajurca: “Manllanayai animalshnaca, ¿pita tiyangayari? Paihuan macanajuitaca, ¿pita ushangayari?” ninajurcami.

5Chai manllanayai animalmanmi, jatun na ali shimicunata rimachun, Diosta na ali shimicunata rimachumbash ushaita curca. Shinallata, chuscu chunga ishcai quillacaman mandai ushachumbashmi ushaita curca.

6Paica, Taita Diostapash, Diospaj shutitapash, Diospajlla huasitapash, jahua pachapi causajcunatapash ninanda fiñashpami, na ali shimicunata rimajurca.

7Diospajlla causajcunahuan macanajushpa, mishana ushaitapashmi curca. Shinallata, tucui ayllucunata, gentecunata, shuj shuj rimaita rimajcunata, llactacunata mandana ushaitapashmi curca.

8Causaita causana libropi, paicunapaj shuticunata na quilcashcacunami, chai manllanai animaltaca tucuicuna alicachinajurca. Chai libroca, cai pachata callari punllamandami, huañuchi tucushca Llamagupaj carca.

9Maijambash rinrita charishpaca, ali uyanguichi.

10Maijambash prezu apashpaca, paipashmi prezu apai tucunga.

Maijambash espadahuan huañuchishpaca, paipashmi espadahuan huañuchi tucunga.

Chaimandami, Diospajlla causajcunaca, na ñapash fiñarishpa, aliguta crishpa causana canguichi.

11Chai jipallami, alpa ucumanda manllanayai shuj animal llujshijtapash ricurcani. Chai animalca, llama cachuman rijchaj, ishcai cachucunatami charirca. Ashtahuangarin, dragonshnallatami rimajurca.

12Paipash, manllanayai chai punda animalshnallatami, paipaj ñaupajpi tucuita mandajurca. Paica, cai pachapash, cai pachapi causajcunapash, huañunatashna chugrichi tucushca cashpapash, ali tucushca, punda manllanayai animalta, alicachinajuchunmi mandajurca.

13Shinallata, pipash na rurai ushanallacunata rurashpami, gentecunapaj ñaupajpi, jahua pachamanda ninata cachamushpa ricuchijurca.

14Punda shamuj animalpaj ñaupajpi, chashna rurashpa ricuchi ushachunmi saquirca. Chashna rurashpami, cai pachapi causajcunata umachishpa cashna nirca: “Espadahuan chugrichi tucushpapash, na huañushca, manllanayai animalman rijchajta rurashpa shayachinguichi” nishpami, cai pachapi causajcunataca mandajurca.

15Shinallata, chai manllanayai animalman rijchajta rurashca, causaita charichunga, jipa animal samaita carachumbashmi, Diosca saquirca. Shina carajpimi, chai animalman rijchajca rimai ushashpa, paita na alicachijcunataca, tucuillata huañuchinajuchun mandajurca.

16Shinallata, ali maquipi cashpa, frentepi cashpapash, tucuicunapi, shuj ricuchinata churachunmi mandarca. Chaitaca, uchillacunapi, jatungunapi, charijcunapi, imagutapash na charij gentecunapi, na gañangunapi, gañangunapipashmi churachun mandarca.

17Chai ricuchinata na charishpaca, jatuitapash, randitapash na ushangachu. Chai manllanayai animalpaj shutita, na cashpaca, chai animalpaj shutipaj yupaita charijllami, jatuitapash, randitapash ushanga.

18Caitaca, alipachami yachana. Maijambash ali yuyaita charishpaca, chai animalpaj yupaica, runapaj yupana cajtami yachana. Chai yupaica, sucta patsaj sucta chunga suctami canga.