AMÓS 5 - Quichua Imbabura 2016

Diosman tigrarichun cayachishcamanda

1Israel gentecuna, ninanda llaquirishpa Ñuca rimashca shimicunata uyaichi.

2Israelcunaca, juyailla cuitsashna cashpapash urmarcamari.

Paicunaca, na cutin jatari ushangachu.

Paicunaca, urmashcami sirinajun.

Paita jatarichingapaca, pipash na tiyanllu.

3Mandaj Jatun Diosca cashnami nin:

“Israelcunaca, huaranga runacunahuan macanajungapa llujshishpapash, patsajhuanllami tigramunga.

Patsaj runacunahuan macanajungapa llujshishpapash, chungahuanllami tigramunga” ninmi.

4Mandaj Diosca, Israelcunataca cashnatapashmi nin:

“Ñucata mañashpaca, causaita charinguichimi.

5Bet-el pueblopica na mañangapa rinachu canguichi.

Gilgal pueblomambash, na rinachu canguichi.

Beerseba pueblopipash, na mañangapa rinachu canguichi.

Gilgal pueblopi causajcunaca, prezu apai tucungami.

Bet-el pueblopash tucuringami” ninmi.

6Shinallata: “Mandaj Dios Ñucata mascashpallami causaita charinguichi.

Na cashpaca, Josepaj miraicunataca, rupachishpa tucuchishami.

Bet-el pueblopi nina japirishcataca, pipash na huañuchi ushangachu.

7Cangunaca, aliguta ricushpa mandanataca saquishcanguichimi.

Alitalla ruranataca, cungashcanguichimi.

8Pléyades shuti, Orión shuti luzerocunatapash ruraj Ñucata mascaichi.

Ñucami, yana tutatapash punchayachini.

Punllatapash, tutatashnami amsayachini.

Mama cucha yacutapash, jahuaman cayashpami, cai alpapi tamiachimuni.

Ñucaca, Mandaj Dios shutimi cani.

9Ñucami, ninan shinlli runata quichugrichun, ushaita cuni.

Ñucami, chai quichuj runataca, shinlli torreta urmachijuchun ushaita cuni.

10Cangunami, pueblo pungupi jarcashpa rimajtapash na cazurcanguichi.

Aliguta rimajtapashmi, na ricunayachircanguichi.

11Huajcha runagutapashmi llaquichinguichi.

Impuestota cuchun mañashpami, aparishca trigota quichurcanguichi.

Chashna quichushpami, juyailla rumicunahuan cangunapaj huasita rurarcanguichi.

Ashtahuangarin, chai huasicunapica napacha ali causai ushashpami puringuichi.

Juyailla uva chagracunata tarpushpapash, chaimanda vinotaca na ufiai ushashpami causanguichi.

12Canguna na cazushcatapash, cangunapaj juchacunatapash yachanimi.

Alitalla ruraj runata llaquichishcatapash, imata pacalla cujpi japinajushcatapash yachanimi.

Juezcunapash, huajchacunatami llaquipi churanguichi.

13Ali yuyaita charij runapash, chaicunata ricushpapash na imatapash ninllu.

Ama llaquichi tucungapami, pipash imatapash na ninajun.

14Na alita ruranataca saquishpa, alita ruraichi.

Chashna causajpimi, tucuita Mandaj Taita Dios Ñucaca, cangunahuan casha.

15Na alita ruranata saquishpami, alita ruranata juyana canguichi.

Alitalla rurashpami, aliguta ricushpa mandana canguichi.

Canguna chashna rurajpica, tucuita Mandaj Taita Dios Ñucaca,

Josepaj miraicunataca llaquishpa quishpichishapashchari” nircami.

16Tucuita Mandaj Taita Diosca, cashnatapashmi nin:

“Tucui plazacunapimi huacaicuna tiyanga.

Tucui ñangunapimi, ninanda llaquirishpa huacanajunga.

Tarpuj runatapash, llaquirishpa huacachunmi cayajunga.

Yarishpa yarishpa huacachunmi cayajunga.

17Uva chagracunapimi huacai tiyanga.

Ñuca chashna llaquichijujpimi, chashna huacanajunga” ninmi Mandaj Diosca.

18Shinallata: “Mandaj Dios Ñuca shamuna punlla chayamuchun munajcunaca,

¡aij imachari tucunguichi!

Mandaj Dios Ñuca shamuna punllataca, ¿imapata shuyanguichi?

Ñuca shamuna punllapica, punchalla cangapa randica, yana tutami canga.

19Chai llaqui punllapica,

leonda pacajushpa calpajushpapash, osohuanmi tuparinga.

Huasiman yaicushpa pircapi taunarijujpipash, culebrami caninga.

20Mandaj Dios Ñuca shamui punllapica,

¿nachu yana tutashna canga?

¿Nachu ima punchayachijpash illaj yana tutashna canga?

21Ñucaman jatun cushijui punllacunata rurashcataca, na ricunayachinichu.

Cangunapaj jatun tandanajuicunapica, na cushijushachu.

22Ñucaman animalcunata cushpa tucuillata rupachijpipash,

ofrendacunata cujpipash, na chasquishachu.

Ñucahuan ali cangapa, virayashca animalcunata carajpipash, na chasquishachu.

23Ñucaman candanajujtapash, na uyanayanllu.

Citaracunahuan taquishcatapash, na uyashachu.

24Alitalla rurashpa mandanaca, yacushna calpajuchunmi munani.

Alitalla rurashpa causanapash, jatun larca ninanda rijujshna cachunmi munani.

25Israel gentecunalla,

jichushca pambapi, chuscu chunga huatacunata purinajushpaca,

¿animalcunata Ñucaman cushpa huañuchishpa,

ofrendacunata, Ñucaman carashpachu purircanguichi?

26Chaipaj randica, Moloc shuti, Quiún shuti rurashcalla dioscunatami aparishpa purircanguichi.

Cangunaca, luzerocunaman rijchaj rurashcalla dioscunata, apashpami purircanguichi.

27Chaimandami cangunataca,

Damasco pueblotapash yalishpa, shuj llactacunaman prezu apachun saquisha” ninmi Mandaj Diosca.

Paica, tucuita Mandaj Taita Diosmi.