OSEAS 12 - Quichua Imbabura 2016

Efraín ayllutaca, llullashpa llaquichijpimi shinllita tacurishca

1Efraín aylluca, huairata michijshnami purinajun.

Rupajlla huairata catijshnami purinajun.

Ashtahuan llullanatapash, macanajushpa tucuchinatapash, yariallami purinajun.

Asirio gentecunahuanmi pactachingapa ari ninajurca.

Aceitetapash, Egiptomanmi carashpa cachanajun.

2Mandaj Diosca, Judá llactapi causajcunahuanga, ninandapachami fiñarishca.

Jacobpaj miraicunataca, na ali cashcamandami llaquichigrin.

Paicunamanga, imata cuna cashcatallatami cunga.

3Jacobca, paipaj mamapaj vijsa ucumandallatami,

paipaj huauquipaj chaqui talonbi charirishpa huacharirca.

Diospaj Angelhuan macanajushpapash, paipaj ushaihuanmi misharca.

4Jacobca, angelhuan ninanda macanajushpa misharcami.

Chai jipami huacashpa, ninanda mañajurca.

Jacobca, Bet-el shuti pushtupi tuparishpami, Paihuan rimajurca.

5Ashtahuangarin Mandaj Diosca, tucuicunapaj Taita Diosmi.

Paica, Mandaj Dios shutimi.

6Cangunaca, cangunapaj Taita Diospajman tigrarichi.

Shujcunata llaquishpa, alitalla rurashpa causaichi.

Cangunapaj tucui causaipi, cangunapaj Taita Diostalla yariashpa causaichi.

7Cangunaca: “Randishpa jatuj runashna, na ali pezaj balanzata charinajunshnami,

na alita rurashpa llaquichinatalla munanguichi.

8Efraín aylluca, cashnami nijurca:

‘Ñucanchica, ninandapachami charijyashcanchi.

Ñucanchica, tucuitami ashtacatapacha charinchi.

Pipash ñucanchitaca, na juchachi ushangachu.

Ñucanchi rurashcacunapica, ima juchatapash na taringachu’ ninajurcami.

9Shina cajpipash Egipto llactamanda llujchimushca punllamandapachami,

cangunata Mandaj Taita Dios cani.

Cangunataca, cushijui punllacunapishnallata carpacunapi causachun saquisharami.

10Ñucaca, profetacunamanmi villachircani.

Ñuca villashcataca, ashtahuan mirachircanimi.

Ñuca profetahuanllatami, imahuambash chimbapurashpa parlanacunata villachircani.

11¿Galaad llactapi causajcunaca na alicunallachu canga?

Paicunaca, imapapash na alicunami tucushca.

Gilgal pueblopica, huagracunatami rurashcalla dioscunaman cushpa huañuchinajurca.

Paicunapaj altarcunaca, huachushca pambapi rumita shitashcashnami saquiringa” nircami.

12Ashtahuangarin, Jacobpaj miraicunaca Aram llactamanmi pacajushpa rirca.

Israelca, huarmihuan cazarangapami tucuita rurashpa causarca.

Huarmihuan cazarangapami, llamacunata michishpa causarca.

13Mandaj Diosca, shujlla profeta runahuanmi Israelcunataca, Egiptomanda vichai pushamurca.

Shujlla profetahuanmi, paicunataca huacaichijurca.

14Efraín aylluca, Taita Dios Ñucatami ninandapacha llaquichijurca.

Shinamandami, paicuna huañuchishpa yahuarta jichashcapash, paicunapaj jahuallata canga.

Paicunallata na alicachishpa rimashcamandami,

Jatun Diosca, paicunaman imata cuna cashcata cunga.