PROVERBIOS 14 - Quichua Imbabura 2016

1Ali yuyaita charij huarmica, paipaj huasipi causajcunataca aliguta ricushpami charin.

Ashtahuangarin juizu illaj huarmica, paillatami pandachin.

2Alitalla rurashpa causaj runaca, Mandaj Diostami manllashpa causan.

Ashtahuangarin, na alita ruraj runaca, yangapimi churan.

3Juizu illaj runaca, jariyashpallami rimajun.

Ashtahuangarin, ali yachajushca runaca,

ima na alita rimanamandapash jarcarinmi.

4Yapungapa huagracuna illajpica, granota alichina wasipica ima granopash na tiyangachu.

Ashtahuangarin, yapungapa huagracuna tiyajpimi, ashtaca granocuna tiyanga.

5Na llullashpa villaj runaca, ima cashcatapachami na llullashpa villan.

Ashtahuangarin llullaj runaca, llullashpallami tucuita villan.

6Na alicachishpa rimaj runaca, alita yachajungapa munashpapash, na ushangachu.

Ashtahuangarin, ali yuyaita charij runapaca, imata yachajunapash fangallami canga.

7Juizu illaj runapaj ñaupajmandaca anchurinami cangui.

Paicunamandaca, ima alitapash na taringuichu.

8Alipacha yachajushca runaca,

ima ali cajtapash, ima na ali cajtapash yachashpami causan.

Ashtahuangarin, juizu illaj runaca, paillata pandarishpami causan.

9Juizu illaj runa juchata rurashpaca, ninanda jariyashpami cushijun.

Ashtahuangarin alita rurajcunaca, alita rurana munaitallami charin.

10Ima llaquipi cashpapash, ñucanchillatami alipacha yachanchi.

Shinallata, ima cushijuita charijpipash shujcunaca na yachai ushangachu.

11Diosta na cazujcunapaj huasica, shitashcami saquiringa.

Ashtahuangarin, alita rurashpa causajcunapaj huasipica, ali causaimi tiyanga.

12Runapaj yuyaipica, imapash alishnallami ricurin.

Ashtahuangarin chaicunaca, huañuimanmi apajun.

13Ninanda asishpapash, shunguta nananllami.

Cushijushca jipapash, huacana chayamunllami.

14Juizu illaj runaca, pai na alita rurashcahuanmi cushijun.

Ashtahuangarin, alita ruraj runaca, pai alita rurashcamandami cushijunga.

15Juizu illaj runaca, tucuita crinllami.

Ashtahuangarin, ali yachajushca runaca, imata rurangapapash aligutami yarin.

16Alipacha yachajushca runaca, na alita ruranataca manllashpa anchurinmi.

Ashtahuangarin juizu illaj runaca, imatapash jariyashpa yangata ruranllami.

17Ñapash fiñajlla runaca, imatapash yangata rurangallami.

Na alita ruraj runataca, tucuicunami na ricunayachin.

18Na ali yachajushca runaca, juizu illaj causajungallami.

Ashtahuangarin ali yuyaita charij runaca, tucuitami ali yachanga.

19Na ali runacunaca, alitalla rurajcunapaj ñaupajpimi cunguringa.

Diosta na cazujcunaca, alita rurashpa causajcunapaj ñaupajpimi cunguringa.

20Huajcha runataca, paipaj cumballatami na ricunayachinga.

Ashtahuangarin charij runataca, tucuicunami alicachinga.

21Paipaj cumbatallata yangapi churashpaca, juchatami ruran.

Ashtahuangarin, huajchacunata llaquij runaca, ninandami cushijun.

22Na alita ruranatalla yarijushpaca, ¿nachu pandarinajun?

Alita ruranatalla yarishpa causajcunaca, Dios juyajpimi causan.

23Imata rurashpapash, chaita rurashcamandaca chasquingami.

Ashtahuangarin, na imatapash rurashpaca, imapash illajmi saquiringa.

24Ali yachajushca runacunapaca, paipaj ali yachajushcacunaca umapi coronata churajushcashnami.

Ashtahuangarin, juizu illaj runacunaca, na alitallami ruran.

25Na llullashpa villaj runaca, llaquiman rinatami quishpichinga.

Ashtahuangarin, llullashpa villaj runaca, llullashpallami villanga.

26Mandaj Diosta manllajcunaca, Paita yariashpami causanajun.

Paicunapaj huahuacunapash, chashnallatami causan.

27Mandaj Diosta manllashpa causanaca, causaita caraj yacushnami.

Chashna cashpami, huañunamanda quishpichinga.

28Jatun mandajcunaca, ashtaca gentecunata mandajushpami ushaita charin.

Ashtahuangarin, huaquinlla gentecunata mandajushpaca, imata ruraitapash na ushanllu.

29Na ñapash fiñarij runaca, ali yuyaita charishcatami ricuchin.

Ashtahuangarin ñapash fiñarij runaca, juizu illaj cashcatami ricuchin.

30Ali yuyaita charij runaca, ali causaitami charin.

Ashtahuangarin, imatapash ñucapaj cashcanman yashpa ricushpaca, nanaicuna japijpimi causanga.

31Huajchacunata llaquichij runaca, paita Ruraj Diostami fiñachin.

Ashtahuangarin, huajchacunata llaquij runaca, Diostami jatunyachin.

32Diosta na cazuj runaca, pai na alita cashcamandami, ninan llaquiman cachai tucunga.

Ashtahuangarin, alitalla ruraj runataca, Dios huacaichijpimi tucui causaipi causanga.

33Ali yuyaita charij runapaj shungupimi, ali yachajushca canaca tiyajun.

Ashtahuangarin juizu illaj runacunaca, chaicunataca na yachanllu.

34Alitalla rurashpa causashpaca, llactatami jatumbi churan.

Ashtahuangarin, juchata rurashpa causashpaca, llactatami pingaichin.

35Jatun mandajca, ali yuyaita charijcunatami alicachishpa charin.

Ashtahuangarin, paita pingaichij runataca fiñashpami llaquichin.