1Muscuipishna ricurishca pambata, llaquichinata villashpami cashna nirca:
¿Imashpata cangunaca, huasi jahuaman llujshinajunguichi?
2Cai pueblopi causaj gentecunaca, ninanda caparishpami cushijuj carca.
Paicunaca, espadahuanga na huañurcachu.
Shinallata jatun macanajuipica na huañurcachu.
3Cangunata mandajcunaca, tucuillami, flechacunahuan catijpi, manllashpa calpanajurca.
Caruta calpashca cajpipash, tucuillatami prezu japinajurca.
4Chaimandami cashna nircani: “Ninanda llaquirishpa huacachun saquihuailla.
Ñuca llacta gentecunata tucuchishcamanda llaquirishpa huacajujpica, saquihuailla.
5Ninanda caparishpa, ninanda manllarishpa, llaquita apachunmi, Jatun Mandaj Diosca cachamushca.
Muscuipishna ricurijuj pugru pambapi shayajuj pueblopaj muyundi jarcashca pircata tucuchijpimi,
lomacaman uyarijta, ninanda caparinajurca” nircanimi.
6Elam llactamanda gentecunaca, flechacunata, carretacunata apashpami, caballopi tiyarishca macanajuj runacunatapash pushashpa rinajurca.
Kir shuti llactamanda macanajuj runacunaca, jarcarina jirrucunatami llujchinajurca.
7Cangunapaj juyailla pugru pambacunapica, carretacunallami jundarca.
Cangunapaj pueblo pungu ñaupajpica, caballocunapi tiyarishpa macanajuj runacunami, carpacunata shayachishpa tiyanajurca.
8Judá llactapi causajcunataca pipash na yanapangachu.
Chai punllapica, macanajunata alichina huasita, quirucuna shayanajuj chaupipi shayajundallami ricunguichi.
9Davidpaj pueblo pircacunatapash, caipi chaipi urmashcatami ricurcanguichi. Yacutapash shujpillami, uraman tandachi usharcanguichi.
10Jerusalenbipash ashtahuan ali pircata rurangapami, huasicunataca yupashpa urmachircanguichi.
11Yacu japinatapash shuj mushujtami, jatun pircacunapaj chaupipi rurarcanguichi. Dios rurashcataca, na cazushpami chashna rurarcanguichi. Chaicunataca, Diosllata rurashcata na cazushpami, chashna rurarcanguichi.
12Chai punllapica, Jatun Mandaj Diosca, cangunataca, ninanda llaquirishpa huacanajuchunmi cayarca.
Ajchatapash tucuillata muchurishpa, cañamuta churajushpa, ninanda caparishpa huacanajuchunmi cayarca.
13Cangunaca huagracunata, llamacunata huañuchishpa, aichata micushpa, vinota ufiashpami:
“Micushunchi, ufiashunchi, cayapaca huañuipajpash canchi” ninajurcanguichi.
14Mandaj Diosmi, ñucataca cashna nihuarca:
“Chashna juchata rurashcataca, canguna huañungacaman, napacha cungashachu” nircami Mandaj Jatun Diosca.
Culquita ricuchunga, Eliaquim shuti runatami, Sebna shuti runapaj randi churashca15Mandaj Diosca, cashnami nin: “Culquita alichij Sebna shuti runapajman, rishpa cashna nigri:
16‘¿Canga, caipica imatata charingui?
Caipica, ¿picunata canhuan causan?
¿Canllata pambaringapachu utujuta allachircangui?
¿Jaca rumipi causangapa utujuta rurachijshnachu, rurachishcangui?
17Mandaj Diosca, shinlli runata caru llactaman prezu apachun, shitashpa saquijshnami jichushpa saquigrin.
Chashna rurashpami ninanda pingaichigrin.
18Candaca, jatun pambapi rumita urai shitajshnami cachanga.
Can chaipi huañujpimi, can jariyashpa purina carretacunapash tucuringa.
Canda mandajpaj huasitaca, chashnami ninanda pingaichingui.
19Can tucuita ricushpa tiyajunamandapash,
can imata ruranamandapash, llujchishpami shitasha.
20Chai punllapica, Hilcías shuti runapaj churi,
Ñucapajta ruraj, Eliaquim shuti runatami cayasha.
21Cambaj churajunataca, paimi churajunga.
Can chumbilina caratapash paimi chumbilinga.
Can mandanataca, paimanmi cusha.
Paica, Jerusalenbi causajcunatapash, Judá llactapi causajcunatapash, taitashnami mandanga.
22Davidpaj huasi punguta pascai ushachunga, paimanmi ushaita cusha.
Pai pascashcataca pipash na vichangachu.
Pai vichashcataca pipash na pascangachu.
23Paitaca, pipash na anchuchi ushanallatami saquisha.
Chaipimi paipaj taitapaj miraicunapash, alicachi tucunga.
24Paimandami taitapaj huasi ucupurapash, paicunapaj miraicunapash, ashtahuan cati miraicunapash causanga.
Uchilla tazacunamanda, vasocunamanda callarishpa, jatun jarrocunacamanmi, paiman cunga’ nigri” nircami.
25Mandaj Diosca, cashnatapashmi nin:
“Chai punllapica, shinlli caspipi tacashca cashpapash anchuchi tucungami.
Chai tacashca caspicuna faquirijpica, tucuillami urmashpa tucuringa” ninmi Mandaj Diosca.
Who We AreWhat We EelieveWhat We Do
2025 by iamachristian.org,Inc All rights reserved.
