FILIPENSES 1 - Quichua Imbabura 2016

“Alillachu capanguichi” nishcami

1Pablopash, Timoteopash, Jesucristopajta rurajcunami canchi. Filipos pueblopi tandanajushca, Jesucristota crishpa, Diospajlla causajcunaman, ancianocunaman, diaconocunamanmi quilcamunchi.

2Ñucanchi Taita Diospash, Apunchi Jesucristopash, cangunaman, ninan juyaita, ali causaita carachunmi munanchi.

Pabloca, crijcunamandami Diosta mañashca

3Cangunata yariashpami, ñuca Taita Diostaca “pashi” nishpa mañajunilla.

4Taita Diosta, ñuca maipi mañajushpapash, cangunamandaca ninanda cushijushpami mañajuni.

5Quishpirimanda villangapa callarishca punllamandapacha, cunangamanmi, tucui imatapash alita rurahuashcanguichi.

6Chashna alita rurachun callarichij Diosllatami, Jesucristo tigramuna punllacaman, ashtahuan aligutapacha rurashpa pactachinajuchun ushaita caranga. Chaitaca yachanipachami.

7Cangunata yarina cashcamandallata, ñuca shungupi yarijushpami cushijuni. Shina cashpami prezu tiyajujpi, mandajcunapaj ñaupajman apajpipash, quishpirinamandaca shinllitapacha villajuni. Cangunapash ñucahuan pajtami chai juyaitaca ricuchinajunguichi.

8Jesucristo juyajujshna, tucui shunguhuan cangunata ñuca juyajujtaca, Taita Diospash alipachami yachan.

9Shinallata, cangunapurapipash, ashtahuan ninanda juyarina tiyachun, ali yachajushcacuna cachun, ali yuyaitalla japinajuchunmi mañajuni.

10Shinallata, alitalla rurana munaihuan causachunmi mañani. Shina cashpami, Cristo tigramui punllapica, ima na alitapash na rurashca cashpa, na juchachi tucunguichi.

11Jesucristo cangunaman ushaita carajpimi, alitalla rurashpa ricuchinajunguichi. Shina cashpami, Taita Diostaca, “ninan ushaita charijmari cangui” nishpa jatunyachinguichi.

“Jesucristopajllami causajuni” nishcami

12Juyashca crijcuna, caita yachachunmi munani: Quishpirimanda villanaca, maipipash ashtahuan uyarishpa catichunmi cai llaquicunaca japihuashca.

13Cristota catijuimanda ñuca prezu tiyajujtaca, jatun mandajpaj huasipi ricujcunapash, cai llajtapi causajcunapash tucuicunallatami yachan.

14Chashna prezu tiyajujpipash, chaupi yali crijcunami, Apunchi Jesús shinllichijpi, imatapash na manllashpa, Diospaj Shimitaca cushijushpa villanajun.

15Huaquingunaca, “ñucapash Cristomandaca paishnallapacha villashallami” nishpami, fiñanajuita mascashpa villanajun. Ashtahuangarin shujcunaca, ali shunguhuanmi villanajun.

16Caishujcunaca, ñuca prezu tiyajujpi, ashtahuan llaquichingapa munashpami, Cristomandaca yangata villaj tucunajun.

17Ashtahuangarin chaishujcunaca, juyaimandami, quishpirinamanda villanataca, ñuca prezu tiyajujpipash aliguta villanajun.

18Shina cajpica ¿imatata nina cani? Ali shunguhuan cashpapash, na chashna cashpapash, Cristomanda villanajujpimi ninandapacha cushijuni. Ashtahuambash cushijusharami.

19Canguna Diosta mañanajujpi, Jesucristopaj Espíritu ñucata, caimanda llujchinapacha cashcataca yachanimi.

20Chaimandami ñuca munashpa yarijushcashna, imapipash na pingai tucusha. Chaitaca causashpapash, huañushpapash, ñuca tucui causaipi Cristopaj ushaita cunanbillata ricuchishapacha yashpami causajuni.

21Ñuca causajushpaca, Cristopajllami causasha. Huañushpacarin, Paihuanmi causajgrisha.

22Ashtahuangarin, Diospajta rurangapaca, causajushpami ashtahuan ali. Shina cajpimi, maijanda agllaitapash na ushani.

23Causanapash, huañunapash ali cajpimi, maijanda agllaitapash na ushani. Huañushpacarin Cristohuan causagrina cajpimi, ashtahuan alicachini.

24Shina cajpipash cangunamandaca, cai pachapi causashpa catinami ashtahuan ali cajta ricuni.

25Shinamandami, canguna alipacha crishpa, cushijushpa catinajuchun, caipi saquirishpa, cangunahuan causashara yajuni.

26Cangunapajman tigrashpa ñuca chaipi cajpimi, Cristo Jesushuanga ninandapacha cushijunguichi.

27Cristomanda villashcata cazushpami aliguta causana canguichi. Cangunata ricungapa shamushpa, na shamushpapash, “alipacha crishpa, shujllashnalla catinajun” nijta uyangapami munani. Shinallata, Jesús quishpichijujtapash crishpami, shujllashnalla shinlli catinajuj nijtapashmi uyangapa munani.

28Quishpirinamanda villanata jarcajcunataca na manllanachu canguichi. Chashna rurashpami, paicunaca chingaita chinganaman rinajun. Ashtahuangarin cangunaca, Taita Dios quishpichijpimi, ña quishpirishca canguichi.

29Taita Diosca, cangunamanga, Cristota crinatami curca. Shina cashpapash, na crinatalla cushpami, Paimanda llaquita apanatapash curca.

30Chaimandami cangunapash, ñucapash, chashnallata llaquicunata apanajunchi. Cunambash, ñucataca chai llaquitallata apajujtami yachanguichi.