ZACARÍAS 10 - Quichua Imbabura 2016

Pai agllashcacunata, Mandaj Dios quishpichinamanda

1Mandaj Diostaca, chaquishca punllacunapi tamiata cachamuchun ninanda mañajshna mañaichiyari.

Mandaj Diosca, punchapamba shitamushpami, ninanda tamiachimunga.

Pambapica, verdella jihuacunatami tucuicunapajllata viñachinga.

2Terafín shuti, rurashcalla dioscunaca, yanga umashpallami villanajushca.

Yachajcunapash, llullacunatallami ricunajushca.

Paicunaca, yanga muscuicunatami villanajushca.

Cushijui tiyanata villashcapash, yangallatami carca.

Chaimandami gentecunaca, llamacunashna yangata purinajun.

Paicunaca, michijta na charishpami, llaquilla causanajun.

3Chaimandami Diosca: “Chai michijcunahuanga, ninandapacha fiñarishca cani.

Paicunata mandajcunataca ninandami llaquichisha.

Ashtahuangarin tucuita Mandaj Dios Ñucami, Judá llactapi causanajujcunataca ricugrisha.

Paicunataca, macanajuiman rina ninanda alicachishca caballotashnami rurasha.

4Paipuramandami, pirca tigranapi churana rumipash,

jatun estacapash, macanajuna arcopash, tucui mandajcunapash llujshinga.

5Paicunaca, turulla ñangunapi sarushpa tucuilla tucuchij macanajuj ninan shinlli runacunashnami canga.

Mandaj Dios paicunahuan cajpimi, chashna macanajunajunga.

Caballocunapi tiyarijcunaca, pingaichi tucunajungami.

6Judapaj miraicunataca, Ñucami shinllichisha.

Josepaj miraicunatapash, Ñucami quishpichisha.

Paicunata juyaimandami, cai llactaman cutin tigrachimusha.

Shinamandami paicunaca, na shitai tucushcashna canga.

Ñucami, paicunata Mandaj Dios cani.

Shina cashcamandami, paicuna mañashcataca uyasha.

7Efraín aylluca, ninan shinlli runashnami canga.

Paicunaca, vinota ufiashpa cushijujshnami, ninanda cushijunajunga.

Shinallata paicunapaj huahuacunapashmi cushijunajunga.

Paicunaca, Mandaj Dioshuanmi tucui shungu cushijunajunga.

8Paicunata quishpichishpami, tucuicunata cayashpa tandachisha.

Paicunaca, punda imashna cashcashnami, ashtacapacha miranajunga.

9Paicunataca Ñucami, shuj llactacunaman caita chaita cacharcani.

Caru llactacunapi causanajushpapash Ñucatami yarinajurca.

Paicunapaj huahuacunandimi, cutin tigramunga.

10Paicunataca, Ñucami Egipto llactamanda pushamusha.

Asiria llactamandapashmi tandachimusha.

Paicunataca, Galaad shuti, Líbano shuti llactacunamanmi pushamusha.

Chai llactacunaca, paicuna causangapaca na pactangachu.

11Ninanda manllachijuj, mama cuchatami yalinga.

Ninanda jatarijuj yacupash, mama cuchapillatami tucuringa.

Jatun yacucunapash, tucuillami chaquinga.

Asiria llacta gentecuna jariyashpa causanapash tucuringami.

Egipto llactapi causajcunapaj ushaipash tucuringami.

12Mandaj Dios Ñucami, paicunataca ñuca shutipi shinllichisha.

Shinamandami, Ñuca shutipi mañashpa purinajunga” ninmi Mandaj Diosca.