1¡Jahua pachatapash, fachata liquijshna uriajumushpaca, alichari canguiman!
Shina shamujpica, urcucunapash ninandami cuyurinman.
2Jirruta yacuyachin ninashna,
yacuta timbuchin ninashna,
Canda fiñajcunaman, Cambaj shutita rijsichishpami ali canguiman.
¡Llactacunapi causajcunapash, ninandami manllarinman!
3Can shamushpaca, pipash na rurai ushanallacunata rurangapami uriajumurcangui.
Shina rurajpimi, urcucunapash ninanda cuyurirca.
4Can jatun Dios, canda catijcunata chashna juyashpa rurashcataca,
pipash na uyashcachu, pipash na ricushcachu carca.
5Canda yariashpa, cushijuihuan alitalla rurajcunatapash,
Canda cazushpa, Cambaj ñambi purijcunatapash yanapangapami shamurcangui.
Ñucanchi na cazushpa juchata rurajpimi fiñarircangui.
Tauca huatacunatami juchata rurashpa causarcanchi.
Chashna cashcamandaca, ¿quishpirinachu canchi imashi?
6Tucuicunami juchata rurashpa mapayashca canchi.
Ñucanchi ima alita rurashcapash, mapa findushnami ricurijun.
Tucuicunami chaquishca fanga urmashcashna canchi.
Ñucanchi na alita rurashcami, huaira apanshna llaquiman cacharca.
7Cambaj shutipi mañajcunaca, shujllapash na tiyanllu.
Shinlli tucushpa, canda catingapaca shujllapash na munanllu.
Chaimandami ñucanchita ama ricungapa anchurircangui.
Ñucanchi na alita rurashcacuna, llaquichijuchunmi saquircangui.
8Mandaj Dioslla, Canmi ñucanchipajca Taita cangui.
Ñucanchitaca, alpamandami rurarcangui.
Ñucanchica, tucuicunami cambaj maquihuan rurashca canchi.
9Mandaj Dioslla, ama yapa fiñaripaichu.
Ñucanchi na alita rurashcatapash, ama causaita causaicaman yarijupaillachu.
Ñucanchitaca, Canmi cambajlla causachun agllarcangui.
10Cambajlla agllashca pueblocunaca, jichushcami saquirishca.
Sion lomapi, Jerusalén pueblopash, jichushcapachami saquirishca.
11Can Diosta alicachishpa, ñucanchi cushijuna huasipash ninahuanmi rupachi tucushca.
Chaipica, ñucanchi punda taitacunami alicachinajun carca.
Ñucanchi ninanda alicachishpa charishcacunapash, tucuillami tucurishca.
12Mandaj Dioslla, cai tucui llaquita ricushpaca, ¿nachu imatallapash ruragripangui?
¿Upalla saquirishpachu, ñucanchitaca ashtahuan llaquichishpa catigringui?
Who We AreWhat We EelieveWhat We Do
2025 by iamachristian.org,Inc All rights reserved.
