ISAÍAS 58 - Quichua Imbabura 2016

Na micushpa, Diosta mañanamanda

1“Imatapash na manllashpa, caparishpa ucha villagrilla.

Trompetata huacachinshna, caparishpa rimagrilla.

Ñuca agllashca gentecunaca, Ñucata napacha cazushcata villagrilla.

Jacobpaj huahuacuna juchata rurashcataca villagrilla.

2Paicunaca, punllandimi Ñucataca mascanajun.

Alitalla rurashpa causanajunshnami, Ñucamanda yachajushpa catingapa munanajun.

Paicunapaj Taita Dios mandashcatapash na saquishpa causashcashnami,

aliguta ricushpa, alitalla paicunaman rurachun mañanajun.

Taita Dios Ñucapajman, ashtahuan quimirishun yashpami chashna ruranajun.

3Cangunaca: Na micushpa ñucanchi mañajpipash, ¿Imashpata na uyangui?

Tucui shunguhuan llaquirishpa mañajpipash, ¿Imashpata na tigrachingui? ninguichimi.

Na micushpa mañana punllapica, cangunapaj shungu munashcatarami ruranguichi.

Cangunapajta rurajcunatapash, tucuicunatami llaquichishpa charinguichi.

4Cangunaca, na micushpa mañanajushpapash, fiñarishca, caishuj chaishuj na alicachirishcami, tiyanajunguichi.

Macanajushpa chugrichingapallami, chashna tiyanajunguichi.

Ñucata mañashcata uyachun munashpaca, na chashna mañashpa causanachu canguichi.

5Chashna mañanajujtaca, Ñucaca napacha alicachinichu.

Runacuna ninanda llaquirishcashna,

Sucus yura vinguyashcashna,

uchufata umapi churarishpa, cañamuta churajushca cachun munan yanguichiman.

¿Chaitachu cangunaca: ‘Na micushpa mañana punllami, Mandaj Dios cushijuna punllami’ yashpa causanguichi?

6Na micushpa chashna mañanajungapa randica, ¿Nachu caicunatara pactachichun mandarcani?:

Shujcunata llaquichinata saquishpa,

llaquichishpa charijushcamanda cacharishpa,

gañanda charijushcamanda cacharishpa,

tucui chai na alicunata saquishpa, Ñucata mañachunmi mandarcani.

7¿Nachu yarjachishpa causajcunaman micunata carachun,

caru llactamanda shamushca huajchacunata huasipi mingachijuchun mandarcani?

Shinallata, churajunata na charijcunamambash, churajunata cuchun,

cambaj huauqui llaquilla cajpipash yanapachunmi mandarcani.

8Chaita rurajpica, tutamanda indishnami candaca bendicianga.

Ima llaquicunapash canmandaca anchuringami.

Cambaj causaipica, alitalla rurana yuyaitami charina cangui.

Candaca, Mandaj Dios Ñucami ricuriashpa pushasha.

9Can, Ñucata mañajpimi, Mandaj Dios Ñucapash candaca uyasha.

Can caparijpica: ‘Caipimi cani’ nishami.

Chashna canda uyachun munashpaca,

shujcunata llaquichishpa charinatapash,

cambaj maquihuan llaquichinatapash,

yangamanda juchachinatapash saquinami cangui.

10Yarjachishpa causajmanbash, micunaguta carashpa,

shungupi llaquilla causajtapash yanapashpa, llaquimanda llujchijpica,

yana tutapi cajpipash, candaca punchayachingami.

Yana tutapishna causajujpipash, michashnami punchayachinga.

11Mandaj Diosmi, candaca tucui causaipi michijunga.

Chaquishca punllacunapipash, yacuta carangami.

Cambaj causaipipash, shinllipachami causangui.

Canga, yacu calpajuj pambapi, juyailla yuracuna viñashcashnami cangui.

Na chaquishpa llujshijujlla yacushnami cangui.

12Jerusalén pueblotaca, unai huatacunata rumi mundunlla sirijujtami, cambaj gentecunaca alichinga.

Ashtaca huatacunata urmashca sirijujtami, callari rumicunata churashpa cutin shayachingui.

Chaita rurajpica, cangunataca:

‘Urmashca pircacunata cutin alichishpa,

chaipi causagringapa rina ñangunata alichijcunami’ ninajungami.

Samana punllata pactachinamanda

13Ñucapajlla shicanyachishca samana punllapica, imatapash can munashcata rurangapaca, na llujshinachu cangui.

Ashtahuangarin chai punllataca:

‘Jucha illaj, Mandaj Dios shicanyachishca cushijuna punllami’ ninami canguichi.

Chai punllataca alicachinami cangui.

Chai punllapica, can munashcataca na ruranachu cangui.

Shinallata, cambaj shimihuambash, na yangata rimanallachu cangui.

14Shina causashpaca, Mandaj Dios Ñuca cushijuita carajpimi causangui.

Candaca, tucuicunata yalimi jatumbi churasha.

Jacobpaj miraicuna japinatami canmanga cusha” nishpami, Mandaj Diosca villarca.