2 SAMUEL 15 - Quichua Imbabura 2016

Absalonga, paipaj taita Davidta quichushpa mandangapa munashcamanda

1Chai punllacuna jipami, Absalonga carretacunata, caballocunata randishpa tandachirca. Picha chunga runacunatami, paihuan purichun churarca.

2Absalonga, tutamandata jatarishpami, puebloman yaicuna pungu ñan manñapi shayajuj carca. Maijan cashpapash, fiñanajushca cashpa, jatun mandaj alichijuchun villangapa shamunajujpimi, Absalonga cayashpa: “¿Maijan pueblomandata cangui?” nishpa tapujun carca. Shina tapujpimi: “Cambajta ruraj ñucaca, Israel llacta ayllupurallatami capani” nishpa villanajuj carca.

3Chashna villajpimi Absalonga: “Can villashca shimicunaca, alipacha, na llullaj shimicunami. Shina cajpipash, jatun mandajca, candaca na uyangachu” nijuj carca.

4Absalonga, cashnatapashmi nijuj carca: “Maijan cashpapash, cai llactapi juez cachun ñucata churashpaca, alimi canman. Fiñanajushca cashpa, ima llaquihuan cashpapash, ñucaman shamujcunataca, ñucami alichijuiman” nijujmi carca.

5Maijan cashpapash, paipaj ñaupajpi urai cumurijpica, ugllashpami muchajuj carca.

6Ima llaquihuan cashpapash, jatun mandaj alichijuchun shamuj Israelcunatami, chashna juyajuj carca. Absalonga, Israelcuna paitalla juyachunmi chashna tandachijuj carca.

7Ña chuscu huata yalishca jipami, Absalonga, jatun mandajtaca cashna nirca:

“Mandaj Diosman rurashami nishcata pactachingapa, Hebrón puebloman richun saquihuai nirca.

8Cambajta ruraj ñucaca, Siria llactapi tiyajuj Gesur shuti pueblopi causajushpaca: ‘Ñucata cutin Jerusalenman Mandaj Dios tigrachijpica, Mandaj Diospajtallami rurasha’ nircanimi” nirca.

9Shina nijpimi, jatun mandajca:

“Imatapash na manllashpa rilla” nijpi Absalonga, Hebrón shuti puebloman rirca.

10Chaipimi Absalonga, tucuilla Israel ayllucunaman cashna nichun cacharca: “Trompetata huacachijujta uyashpaca, Absalonmi Hebrón pueblopica, jatun mandaj tucushca ninguichi” nichunmi villajcunata cacharca.

11Jerusalenmandaca, ishcai patsaj runacunami Absalón pushajpi rinajurca. Paicunaca, na alita ruragrijushcataca, imatallapash na yacharcachu.

12Shinallata Absalonga, Taita Diosman carashpa animalcunata huañuchijushpami, Gilo shuti pueblomanda Ahitofel shuti runata cayarca. Chai runaca, Davidman ali yuyaita cushpa causajmi carca. Shinami Davidta na cazujcunaca ashtahuan shinlliyashpa, Absalonda catijcunara miranajurca.

13Shuj villaj runami, Davidmanga: “Tucuilla Israelcunami, Absalondaca alicachishpa catinajun” nishpa villagrirca.

14Shina nijpimi Davidca, Jerusalenbi causanajuj paipajta rurajcunataca, cashna nirca:

“Pacajungapa ucha jacuchi. Absalonbaj ñaupajmandaca, na pacajui usharingachu. Uchashpa ringapa alichirichi, na cashpaca, ñapash caipi japij shamushpara, ñucanchitapash, cai pueblopi causajcunatapash, espadahuan huañuchinman” nirca.

15Shina nijpimi jatun mandajpajta rurajcunaca:

“Cambajta ruraj ñucanchica, can jatun mandaj imata nishcata rurangapami shuyanajupanchi” ninajurca.

16Chai jipami, jatun mandajca, paihuan causaj chungapura huarmicunata, pai mandana huasita ricuchun saquishpa, tucuilla paipaj huasi ucupurata pushashpa rirca.

17Jatun mandajca, tucuilla paita catijcunandi ña llujshishpa rishpami, carupi shayarigrirca.

18Chaipimi, tucuilla paipajta rurajcunaca, cereteo, peleteo runacunandi, paihuan rinajurca. Shinallata, Gat pueblomanda chaquilla shamushca sucta patsaj runacunaca, jatun mandajta ñaupashpa ringapami yalinajurca.

19Jatun mandajca, Gat llactamanda Itai shuti runataca, cashnami nijurca:

“¿Imapata cambash ñucanchihuan shamujungui? Canga caimanda tigrashpa, cambaj jatun mandajhuan saquirilla. Canga, shuj llactamandami cangui. Cambaj llactamandapash llujchishpa cachamujpi, shamushcami cangui.

20Canga, cainallami chayamurcangui. Shina cajpica, ¿imashnata ñucanchihuan jaculla nishayari? Ñucallatapash, maiman rijunitaca na yachanichu. Canga, cambaj llactapuracunata pushashpa tigrailla. Mandaj Diospash canda juyashpa, cambaj tucui causaipi imatapash pactachijuchun” nijurca.

21Shina nijpimi Itai shuti runaca, jatun mandajtaca cashna nirca:

“Taita Diosca ricujunmi. Can jatun mandajpash ricujunguimi. Huañungapa, causangapa, can jatun mandaj maipi cajpipash, ñucapash chaipimi casha” nirca.

22Shina nijpimi Davidca, Itai runataca:

“Shina cashpaca, ñucahuan jaculla” nirca.

Shina nijpimi geteo Itai runaca, paihuan purij tucuilla runacunandi, paipaj tucuilla huasi ucupuracunandi catishpa rirca.

23Shinallata, tucui gentecunami, ninanda huacashpa, yacu jatarijuj Cedrón shuti huaicuta chimbashpa rinajurca. Shinallata, jatun mandajpash chimbajpimi, tucuilla gentecunapash jichushca pambaman rina ñanman rinajurca.

24Chaipica, sacerdote Sadocpash, tucuilla levitacunandimi, Taita Dioshuan ari ninajushpa quilcachishcata alichishca arcata alpapi churashpa chaipilla samanajurca. Shinallata pueblomanda llujshishpa tucuilla rishca jipami, Sacerdote Abiatarpash catishpa vichai rirca.

25Ashtahuangarin jatun mandajca, sacerdote Sadoctaca cashnami nijurca:

“Taita Diospaj arcata apashpa puebloman tigrailla. Mandaj Diospaj ñaupajpi ñuca ali ricurijpica, Paillata ñucata ali tigrachimushpa, Paipaj jatun carpatapash cutin ricuchun saquihuangami.

26Ashtahuangarin: ‘Canhuanga, na cushijunichu’ nishpaca, Paipaj ima ali canata rurahuachun, caipimi cani” nijurcami.

27Jatun mandajca, sacerdote Sadoctaca cashnatapashmi nijurca:

“¿Nachu canga, Dios imatalla ricuchishcata villaj cangui? Imatapash na manllashpa, cambaj churi Ahimaas runata, Abiatar runapaj churi Jonatanda pushashpa puebloman tigrapailla.

28Uyaichi, canguna ali chayashcata villachun cachamungacamanmi, jichushca pambamanda chimbai ushanalla pushtupi shuyasha” nijurca.

29Shina nijpimi sacerdote Sadocpash, Abiatarpash, Taita Diospaj arcata Jerusalenman apashpa, chaipi saquirirca.

30Davidca, umatapash quilparishca, chaquipash lluchullami, huacashpandi, Olivo lomataca vichai rijurca. Shinallata, tucuilla paihuan rijcunapashmi, umata quilparishpa, huacashpa vichai rinajurca.

31Chaipimi cashna nishpa, Davidman villanajurca: “Absalonga, tandanajushpa canda na cazujpuracunahuanmi, Ahitofel runapash tandanajushca” ninajurca. Chaita yachashpami Davidca: “Mandaj Dioslla, Ahitofel runa ima yuyaita cushcatapash yangapi churapangui” nijurca.

32Taita Diosta mañangapa, Olivo lomaman David ña chayajujpimi, arquitapuramanda Husai shuti runaca, pai churajushcapash liquirishca, umapipash alpata churarishca ñapash tuparimurca.

33Paitami, Davidca cashna nijurca:

“Can ñucahuan rijpica, ashtahuanmi ñucapaca llaqui canga.

34Ashtahuangarin puebloman tigrashpa, Absalonda cashna nigrilla: ‘Jatun mandajlla, ñucaca cambajta ruraj cangapami munapani. Imashnami cunangaman cambaj taitapajta rurashpa causarcani, chashnallatami cunanga cambajta rurangapa munapani’ nigrilla. Can chaipi cashpami, Ahitofel runa imata yarijushcatapash yangapi churangui.

35Sacerdote Sadocpash, Abiatarpash, chaipimi canhuan canga. Shina cashcamanda jatun mandajpaj huasipi imata uyashpapash, paicunaman villanguilla.

36Sadoc shuti runapaj churi Ahimaas runapash, Abiatar shuti runapaj churi Jonatán runapash, ishcandimi chaipi canga. Tucui imata uyashpapash, paicuna ñucaman villachun cachamunguilla” nijurcami.

37Chashnami, Davidpaj ali cumba Husai shuti runaca, Jerusalenman shamurca. Shinallata, Absalón runapashmi, chai puebloman yaicurca.