Psalms 38 - Quichua Imbabura 2016

Ninanda llaquirishpa mañashcamandaDiosta yaringapa, David rurashca Salmomi.

1Mandaj Dioslla,

ama ninanda fiñarishpa rimahuaichu.

Ama ninanda fiñarishpa llaquichihuaichu.

2Cambaj flechacunami, ñucata llaquichingapa chayamurca.

Cambaj maquihuanmi ñucataca llaquichihuarcangui.

3Can fiñarishpa, llaquichijpimi tucui cuerpopi nanaihuan cani.

Juchata rurashcamandami, ñuca tullucunapipash nanaihuanlla causajuni.

4Ñuca na alita rurashcami, ñucatallata llaquichijuhuan.

Ninan jatun quipishnami, ñucataca llashachijuhuan.

5Ñuca cuerpopash ismushpami ashnajuni.

Juizu illajshna na alita rurashcamandami chashna tucujuni.

6Ninan nanaicunahuanmi curparishpa saquirijuni.

Chashna nanaicunahuan cashpami llaquihuan huacailla causajuni.

7Ñuca huashatapash ninanda rupashpami nanajun.

Tucui cuerpopimi nanaihuan cani.

8Ninan nanaicunahuanmi ñutushcashna cani.

Tucui nanaicunahuan cashpami, shungumanda llaquirijuni.

9Jatun Dioslla,

Cambaj ñaupajmanmi tucui ñuca mañashcata apamupani.

Ñuca llaquicunataca, tucuitami yachapangui.

10Ñuca shungupi ninan llaquihuan cashpami, ushai illaj saquirishcani.

Ñuca ñavipash amsayashpami catijun.

11Ñuca cumbacunapash, ñucahuan pacta purijcunapash, ñuca ungüita ricushpami caruyashca.

Ñuca ayllucunapashmi saquihuashca.

12Ñucata huañuchingapa munajcunaca, imashna urmachinatami yarinajun.

Ñucata llaquichingapa munajcunaca, na alitallami parlanajun.

Ñucata imashna llaquichinatami, punllandi yarinajun.

13Ashtahuangarin imatapash na uyanshnami, upalla saquirini.

Upashnami, paicunataca na rimani.

14Imatapash na uyajuj runashnami cani.

Ñuca shimihuanga, imata tigrachitapash na ushanichu.

15Mandaj Dioslla,

Candallami shuyajuni.

Ñucata Mandaj Taita Dioslla,

Canmi ñucapaj randi rimapangui.

16Ñucata ricushpaca, ama pipash cushijuchun.

Ñuca urmajpipash, pipash ama jariyashpa rimachun.

17Ashtahuangarin ña huañunallami cani.

Nanaicunapash, cutin cutinmi llaquichijuhuan.

18Chaimandami, ñuca juchacunataca Canman villajupani.

Juchata rurashcata yarishpami ninanda llaquirijuni.

19Ñucata fiñajcunaca, jari jarimi purinajun.

Ñucata yangamanda millanayachij runacunaca, ashtahuanmi mirashca.

20Alita rurajpipash, na alitami tigrachihuan.

Paicunaman alita rurajpipash, fiñashpami rimahuan.

21Mandaj Dioslla,

ama jichuhuaichu.

Ñuca Taita Dioslla,

ama ñucamanda anchuripaichu.

22Ñucata quishpichij Jatun Dioslla,

uchalla yanapahuayari.