FILIPENSES 3 - Quichua Imbabura 2016

Chayanatapacha yashpami catijuni

1Juyashca crijcuna, Apunchi Jesusta crij cashcamanda ninanda cushijuichi. Cangunapaj ali cana cajpimi, cutin chaitallata tigrashpa quilcashcamandaca na fiñarijuni.

2Alcushna causajcunamandapash, na alita yachachijcunamandapash, circuncisionda rurangapa munajcunamandapash, anchurinami canguichi.

3Ashtahuangarin, ñucanchimi circuncisionda rurashca cashpa, Diospaj Espíritu yuyaita cujpi Diospajta ruranajunchi. Ñucanchi imatapash rurashcahuanlla, napacha quishpirinata yachashpami, Cristo Jesushuan ninanda cushijunchi.

4Imamanda jariyanataca ñucapash charinimi. Paicuna cai causaipi imatapash rurashcahuan jariyajpica, ñucacarin ashtahuanmi jariyaiman.

5Huacharishca pusaj punllahuanmi circuncisionda rurahuashca. Israelpuramanda, Benjamín ayllupurami cani. Taitandi, mamandi hebreopura cajpimi, ñucapash hebreopacha cani. Mandashca shimimanda parlashpaca, fariseopurami cani.

6Chaita catichun munashpami, tandanajuj crijcunataca ninanda fiñashpa llaquichijurcani. Mandashca shimipi nijujta tucuita pactachij cajpimi, pipash na juchachi ushahuarca.

7Alitapacha rurajuni yashpami chashna rurajurcani, ashtahuangarin, Cristota juyai callarishpami tucui chaicunataca jichurcani.

8Cristo Jesusta rijsina alipacha cashcamandami, chaicunaca yangapipacha saquirirca. Apunchi Jesucristota juyashpami, Paihuan causangapaca, shitana jupatashna tucuita saquircani.

9Cristohuan shujlla tucujpi, Taita Dios chasquichunmi, mandashca shimita pactachishcamandalla, ñucallata alipi ricuringapaca na munarcani. Ashtahuangarin, Cristota crijpillami Taita Diosca, alita rurashcatashna chasquijun.

10Shina cajpimi, Cristotaca ashtahuan rijsingapa munani. Shinallata, ninan ushaihuan causarishcata rijsingapami munani. Paishnallapacha ñucapash llaquita apashpa huañungapami munani.

11Huañushcacunapaj chaupimandaca, Paishnalla causarishcaiman yajunimi.

12Tucuita rurashpa pactachishcapash na canichu, ima pandata na rurajpash na canichu. Shina cashpapash, Cristo Jesús ñucata agllashcamandami “japishapashchari” yashpa catijunilla.

13Juyashca crijcuna, “ñami chayagrircani” nitapash na ushanichu. Ashtahuangarin caitallami rurani: Punda rurajushcataca huashaman saquishpami, ñaupaman cajta japigrishapacha yashpa rijuni.

14Cristo Jesús ñucata agllashcamandami, Dios carashcata “japigrishapacha” yashpa catijuni.

15Shina cashpaca, ima pandatapash na rurajcunaca, chashnatallata yarishpami causana canchi. Canguna, shuj yuyaita charijpica, Taita Diosllatami ali yuyaita caranga.

16Ña shina yachashcamandaca, aligutapacha cazushpami, shujllashnalla yarishpa catina canchi.

17Juyashca crijcuna, ñucata ricushpa catichi ninimi. Shinallata, ñucanchi yachachishcata catijcunatapash ricushpa catinguichi ninimi.

18Cristota cruzpi chacatashcatapash, ashtacacunami yangapi churashpa purinajun. Chaitaca, ña villashca cashpapash, cutinmi huacashpa cunambash villajuni.

19Chashnacunaca chingaita chingangapa rinajushpami, paicunapaj vijsatalla diostashna yarinajun. Paicunaca pingaitapash na pingashpami, jariyashpa, imatapash cai pachapajtalla ruranajun.

20Ashtahuangarin, ñucanchi causagrina llactaca, jahua pachapimi. Jahua pachamanda Quishpichij, Apunchi Jesucristo tigramunatami ñucanchica shuyanajunchi.

21Jesucristomi, ñucanchipaj tucurinalla cuerpotaca, ninan ushaihuan punchapamba Paipaj cuerpotashnalla ruranga. Paica, tucuita mandangapa ushaita charishpami chashnaca ruranga.