1Pablohuan, Silvanohuan, Timoteohuanmi, Taita Diostapash, Apunchi Jesucristotapash cazushpa causaj, Tesalónica pueblopi tandanajuj crijcunata, “alillachu capanguichi” ninajunchi. Ñucanchi Taita Diospash, Apunchi Jesucristopash ninanda juyashpa, ali causanaguta carachunmi munanchi.
Tesalónica pueblopi causanajuj crijcunaca, aligutami causashca2Tucui cangunamandaca, na cungashpami, Taita Diostaca “pashi” nishpa, yariashpa mañanajunchi.
3Alipacha crishpa, ninan juyaihuan imagutapash aliguta ruranajujpimi, cangunamandaca Taita Diosta ninanda pashi ninajunchi. Shinallata, ñucanchi Apunchi Jesucristo tigramunatapash, tucui shunguhuan yarishpa shuyanajujta yachashpami, cangunamandaca, chashna “pashi” ninajunchi.
4Juyashca huauquicuna, cangunataca, Taita Dios ninanda juyashpa agllashcatami yachanchi.
5Quishpirinamanda ñucanchi villanajushpaca, na nij tucushpalla yachachishpami, jucha illaj Diospaj Espíritu ushaita carajpi, ninan ushaihuan, yachachina cashcatapacha yachachircanchi. Cangunapaj ali cachun, maijanlla juyashpa shamushcataca alimi yachanguichi.
6Apunchi Jesusta ñucanchi imashna catinajujta ricushpami, cangunapash, ñucanchishnalla catinajunguichi. Ñucanchi villajujtaca, jatun llaquita apanajushpapash, Diospaj Espíritu cushichijpimi, cushijushpa chasquircanguichi.
7Shina catinajujta ricushpami, Macedonia llactapi, Acaya llactacunapi causanajuj crijcunapash, tucuilla aliguta catinajun.
8Apunchi Jesusta canguna crishcamandami, Macedonia llactapipash, Acaya llactapipash, ashtahuan shuj llactacunapipash, Taita Diospaj shimitaca yachaj chayanajurca. Chaimandami, imata ashtahuan villanatapash na charinchi.
9Cangunapajman ñucanchi shamujpi imashna chasquishcatapash, ñucanchi yachachijpi, rurashcalla dioscunata yarinata saquishpa, causajujlla Taita Diospajta rurai callarishcatapashmi, paicunaca parlanajun.
10Taita Diosmi, Jesucristotaca huañushcacunapaj chaupimanda causachirca. Paipaj Churimi, jahua pachamanda shamushpa, Taita Dios ninanda fiñarishpa llaquichinamandaca quishpichinga. Chaita crishpami shuyanajunguichi.
Who We AreWhat We EelieveWhat We Do
2025 by iamachristian.org,Inc All rights reserved.
