1Tucuimanda yalica: Diosta ninanda mañachun, tucui imamandapash mañachun, pashi nishpa mañachun, tucui gentecunamandapash mañachunmi mandani.
2Jatun mandajcunamanda, tucui mandajcunamandapash, Diosta mañachunmi mandani. Tucuicuna, ali causaita charishpa, Diosta cazushpa causangapa, shinallata, shujcunahuambash ali causaita charingapami, chashna mañana canguichi.
3Shina mañanaca, ñucanchita Quishpichij Taita Diospaj ñaupajpica, juyailla aligupachami ricurin.
4Paica, tucuicuna quishpirishca cachunmi munan, shinallata, na llullashpa villajuj Shimitapash aliguta yachajuchunmi munan.
5Shujlla Taita Diosmi tiyan. Gentecuna, Taita Dioshuan ali tucuchun, Dioshuan rimajpash shujllami tiyan. Paica, runa aichayuj tucushca Jesucristomi.
6Paica, tucuicunata quishpichingapami, Paillata japi tucushpa huañurca. Chaitaca, ña ricuchina punllacuna chayamujpimi Diosca ricuchimurca.
7Chaicunata, tucuicunaman villagrichunmi, Diosca ñucataca apóstol cachun churahuarca. Shina cashpami, na llullashpa villajuj shimitaca, na Israelcunapash crichun yachachijuni. (Cristota crij cashpami, na llullashpa, “shinapachami” nishpa villajuni).
8Shinamandami tucui jaricuna, maipi cashpapash, Diospajlla causanajushpa, maquita vichai churashpa, na fiñanajushpa, na rimarinajushpa, Diostaca mañana canguichi.
9Shinallata huarmicunapash, juyailla aliguta churajushca cashpapash, na yapata alichirishpa, jariyana shunguhuan purinachu canguichi. Umatapash na yapata alichirinachu canguichi. Shinallata, curita rurashca imatapash, perlacunatapash, ninan alipacha churajunacunatapash, na jariyashpa churajunachu canguichi ninimi.
10Ashtahuangarin, Diosta yarishpa causaj huarmicunashnami, imatapash aliguta rurashpa causana canguichi.
11Huarmica, upalla yachajushpa tucuipi cazuchun ninimi.
12Huarmitaca, jarita yachachijuchumbash, mandajuchumbash na saquinichu. Ashtahuangarin upalla tiyachun ninimi.
13Diosca, Adán runatami punda rurashca. Chai jipami, Evatapash rurashca.
14Adanga, na umai tucurcachu. Ashtahuangarin huarmimi umai tucushpa, Dios mandashcataca na cazurca.
15Shina cajpipash huarmica, huahuacunata charishpa, aliguta crishpa, juyaita charishpa, Diospajlla causashpa catijushpaca quishpiringami.
Who We AreWhat We EelieveWhat We Do
2025 by iamachristian.org,Inc All rights reserved.
