MATEO 22 - Quichua Imbabura 2016

Cazarai bodahuan, yarichishpa yachachishcamanda

1Shina nishpallami Jesusca, cutin cashna yarichishpa yachachijurca:

2“Jahua pachapi Dios mandana llactaca, shuj jatun mandaj, paipaj churita cazarachishpa micuita rurajunshnami.

3Chai mandajmi, micuiman cayashcacunata pushamuchun, paipajta rurajcunata cacharca. Ashtahuangarin paicunaca, na shamungapa munarcachu.

4Cutinmi, shujcunata cashna nishpa cacharca: ‘Micuiman cayashcacunataca, micunapash yanushcallami nigrichi. Ali racuyashca huagracunata, shuj animalcunatapash huañuchinajuchun, ñami mandarcani. Ña tucuita alichishcallami, micuiman shamupaichilla’ nichunmi cacharca.

5Ashtahuangarin, paicunaca napacha cazushpami, huaquingunaca alpata tulashpa alichingapa, huaquingunaca jatunahuan rinajurca.

6Ashtahuan shujcunaca, jatun mandaj cachashca runacunataca rimashpa pingaichishpami, macashpa huañuchinajurca.

7Chashna ruranajujta chai jatun mandaj uyashpaca, ninanda fiñarishpami, chai huañuchijcunata huañuchishpa, paicunapaj llactatapash rupachishpa tucuchigrichun, paipaj macanajuj runacunata cacharca.

8Chai jipami, paipajta rurajcunataca cashna nirca: ‘Micuita rurangapaca, tucuita ña alichishcallami. Ashtahuangarin cazaraiman cayashcacunaca, napacha caiman shamui ushanachu.

9Shina cashcamanda cunanga, ñan llujshinacunata rishpa, pipash tuparijta micuiman pushamugrichi’ nishpami cacharca.

10Shina nijpi, chai runacunaca ñangunaman llujshishpaca na alicunata, alicunatapash tucui tuparijtami tandachimurca. Shina tandachijpimi, chai cazarai huasipica, tucui cayashcacuna jundarca.

11Micuiman cayashcacunata ricungapami jatun mandajca yaicurca. Chaipica, micuiman shamuna churajunata na churajushpa shamushca runatami ricurca.

12Shina ricushpami: ‘Ñuca cumbagu, ¿cazaraiman shamuna churajunata, na churajushca cashpaca imashnata yaicumurcangui?’ nishpa tapurca. Shina tapujpipash, chai runaca upaman tigrashpa tiyajurcallami.

13Chaimi, chai jatun mandajca: ‘Cai runataca chaquindi, maquindi huatashpa, yana yana canllaman shitaichi, chaipimi huacashpa, quirutapash canirishpa tiyajunga’ nishpami, paipajta rurajcunataca mandarca.

14Cayai tucushcanaca ashtacacunami, agllai tucushcacunaca huaquingunallami” nircami.

Impuestota cunamanda(Mar. 12:13-17; Luc. 20:20-26)

15Chai jipami imata tigrachijpipash Jesusta juchachingapa munashpa, fariseocunaca, paicunapuralla parlaringapa llujshishpa rirca.

16Ña parlarishpaca, paicunapaj yachajujcunatapash, Herodesta catijcunatapashmi, Jesusta cashna nichun cacharca:

“Yachachij, na llullashpa Can yachachijujtaca yachapanchimi. Taita Dios munashcashna causachunmi, pimambash na llullashpa yachachijungui. Candaca, pipash imatapash na ni ushangachu. Gentecuna imashna cajtapash, na ricujunguichu.

17Shina cajpimi Candaca, cashna tapupanchi: Cesarman impuestota cunaca, ¿alichu, nachu ali? ¿ima ninguita?” nishpami tapunajurca.

18Ashtahuangarin, na ali shunguhuan tapunajujta yachashpami, Jesusca paicunata cashna nirca:

“Mishqui shimi, jayaj shungucunami canguichi. ¿Imashpata Ñucataca, pandachingapa munashpa shamunguichi?

19Impuestota cuna shuj culquita apamuichi, ricusha” nijpimi paicunaca, shuj denario culquita curca.

20Chaita cujpi ricushpaca:

“¿Pipaj ñavita, pipaj shutita cai culquipica tiyajun?” nishpami, Jesusca tapurca.

21Shina tapujpimi:

“Cesarpajmi” ninajurca.

Shina nijpimi Jesusca cashna nirca:

“Cesarpaj cajpica, Cesarmanllatami cuna canguichi. Ashtahuangarin Taita Diospaj cajtaca, Taita Diosmanmi cuna canguichi” nirca.

22Shina nijpimi ninanda manllarishpa, Jesuspajmandaca anchurishpa rinajurca.

“¿Huañushcacunaca causaringachu?” nishcamanda(Mar. 12:18-27; Luc. 20:27-40)

23Chai punllallatami, huañushcacuna causarinata na crij saduceocuna Jesusta tapungapa, shamurca.

24Paicunaca, cashna nishpami tapurca:

“Yachachij, Moisesca cashnami nishca: ‘Maijambash, huahuacunata nara charishpallata huañujpica. Paipaj huauqui chai huarmitaca cazarachun ninimi, shinami huauquipaj randi huahuacunata mirachinga’ nishcami.

25Ñucanchipurapica, canchis huauquipurami tiyarca. Punda huauquica, cazarashpallami huañurca. Huahuacunata nara charishpallata huañushpaca, paipaj huarmitaca paipaj cati huauquimanmi saquirca.

26Chai cati huauquipash, cazarashpallami huañurca. Chaipaj cati huauquipash, chashnallatami huañurca. Chashnami, chai canchispura huauquicunaca huañurca.

27Paicuna tucuilla huañushca jipami, chai huarmipash huañurca.

28Huañushcacuna causarimui punllapica, chai canchis huauquipurapajca, ¿maijambajta huarmi canga? Chai huarmitaca, chai tucui canchispurami cazararca” ninajurcami.

29Shina nijpimi Jesusca, paicunaman cashna nishpa tigrachirca:

“Cangunaca, Dios quilcachishca Shimitapash na yachashpa, Taita Dios ninan ushaita charijtapash, na yachashpami chashna pandanajunguichi.

30Huañushcacuna causarimui punllapica, pipash na cazarangachu. Cazaranapash na tiyangachu. Ashtahuangarin, jahua pachapica Taita Diospaj angelcunashnami canga.

31Huañushcacuna causarinata Taita Dios cangunaman villashcataca, ¿nachu quilca catishcanguichi? Paica, cashnami nirca:

32‘Ñucami Abrahambaj, Isaacpaj, Jacobpaj Taita Dios cani’ nircami. Taita Diosca, huañushcacunapaj Taita Diosca na canllu, Paica causajcunapaj Taita Diosmi” nircami.

33Jesús chashna yachachijta gentecuna uyashpami, ninanda manllarinajurca.

Ashtahuan yali ali mandashca shimicunamanda(Mar. 12:28-34)

34Jesús yachachijushpa, saduceocunata upallayachishcata fariseocuna yachashpami, paicunapura tandanajurca.

35Paicunapuramanda, mandashca shimipi ima nijujta yachachij shuj runami, imata tigrachijpipash pandachingapa munashpa, cashna nishpa tapurca:

36“Yachachij, mandashca shimicunamandaca, ¿maijanda ashtahuan yali ali capan?” nircami.

37Shina nijpimi Jesusca cashna nirca:

“Cambaj Taita Diostaca, ‘tucui shunguhuan, tucui almahuan, tucui yuyaihuan juyangui’ nijunmi.

38Caimi punda mandashca shimi, tucuita yali ashtahuan ali.

39Chaipaj cati mandashca shimipash, ‘Imashna can juyarinshnallata, shujcunatapash juyangui’ nijunmi.

40Cai ishcai mandashca shimicunami, Moisés mandashca shimicunatapash, profetacuna villashca shimicunatapash, sapishna charijun” nircami.

“Cristoca, ¿pipaj churita canga?” ninajushcami(Mar. 12:35-37; Luc. 20:41-44)

41Fariseocunataca, paicuna tandanajushca tiyanajujpimi Jesusca cashna nishpa tapurca:

42“Cristoca, ¿Pi yanguichita? ¿Pipaj churita canga?” nijpimi:

“Davidpaj churimi canga” ninajurca.

43Shina nijpimi Jesusca cashna nirca:

“¿Imashpata Davidca, Diospaj Espíritu yarichijpi Cristotaca: ‘Jatun Mandajmi cangui’ nijushcanga? Paica cashnami nirca:

44Jatun Diosca, ñucata Mandaj Cristotaca:

‘Canga, Ñuca ali maquiman tiyajuilla.

Canda fiñajcunata, Cambaj chaquihuan saruchun,

Ñuca churangacaman tiyajuilla’ nircami.

45Paitaca Davidllata: ‘Jatun Mandajmi cangui’ nijujpica, ¿imashpata Davidpaj churi cangayari?” nircami.

46Shina nijpica, pipash na ashtahuan imatapash ni usharcachu. Chai punllamandami Jesustaca, na ashtahuan pipash tapui usharca.