1Mandaj Diosca, Moisestaca cashnami nirca:
2“Madián llacta gentecuna, Israelcunata llaquichishcashna, paicunatapash llaquichingui. Chai jipami cambaj punda taitacunahuan tandanajugringui” nircami.
3Shina nijpimi Moisesca, Israelcunata cashna nijurca: “Madián llacta gentecunahuan macanajungapa ringapami cangunaca alichirina canguichi. Paicuna imashna llaquichishcashna, Mandaj Diospaj shutipi, Madián llacta gentecunataca llaquichigrichi.
4Israel ayllucunamandaca, imashna cashcapi shuj ayllumanda huaranga, chaishujmanda huaranga, chashnami tucuilla ayllumanda runacunata agllashpa macanajuiman cachana canguichi” nijurcami.
5Tucuilla Israel ayllucunamandami, chunga ishcai huaranga runacunata macanajuiman cachangapa agllarca.
6Shinami Moisesca, tucui ayllucunamandaca chunga ishcai huaranga runacunata macanajuiman cacharca. Sacerdote Eleazarpaj churi Finees shuti sacerdotepash, Diospaj huasimanda vasocunata apashpa, trompetacunata huacachingapa apashpami macanajuiman rirca.
7Madián llacta gentecunahuan macanajushpaca, Mandaj Dios imashna Moisesta mandashcashnami, tucui jaricunata huañuchirca.
8Huañushcacunaca: Evi, Requem, Zur, Hur, Reba shuti, Madián llactata picha mandajcunapashmi carca. Shinallata, Beor shuti runapaj churi Balaam shuti runatapashmi espadahuan huañuchirca.
9Israelcunaca, Madián llactamandami, huarmicunatapash, uchilla huahuacunatapash prezu aparca. Paicunapaj tucui animalcunatapash, huagracunatapash, chai llactapi tucui imatalla charishcacunatapashmi quichushpa aparca.
10Shinallata, paicunapaj tucui pueblocunatapash, chai muyundi uchilla llactacunatapash, huasicunatapashmi rupachishpa tucuchirca.
11Paicunaca, macanajuipi imatalla quichushcataca, jaricunatapash, animalcunatapashmi apashpa rinajurca.
12Shina cashpami Moisesman, sacerdote Eleazarman, tucuilla tandanajushca Israelcunaman apamunajurca. Shinami Israelcunaca, prezu apashcacunata, macanajushpa quichushcacunataca, Moab shuti llacta pugru pambacunapi carpacunaman apamurca. Chai llactaca, Jericó llacta chimbapi, Jordán yacu manñapimi tiyajun.
13Shina cajpimi Moisespash, sacerdote Eleazarpash, tandanajushca Israelcunata tucui mandajcunapash, carpacunamanda canllaman tuparingapa llujshinajurca.
14Moisesca, macanajuimanda tigramunajuj macanajuj huaranga runacunata mandajcunahuan, patsaj runacunata mandajcunahuanmi ninanda fiñarirca.
15Moisesca cashnami nijurca:
“¿Imashpata cai huarmicunataca, causajta apamunguichi?
16Cai huarmicunamari, Balaam shuti runa yachachijta uyashpa, Israelcunataca Baal-peor shuti rurashcalla diosta yarichun, Mandaj Diospaj ñaupajpica pandachinajurca. Chaimandami, Mandaj Diospaj tandanajushca gentecunapica ashtaca huañui tiyarca.
17Cunanga, tucui jari huahuacunatapash, jaricunahuan pacta puñushca tucuilla huarmicunatapashmi huañuchina canguichi.
18Jarihuan na pacta puñushca, chaira cuitsacunataca ama huañuchishpa saquinguichilla.
19Cangunaca, maijandapash huañuchishca cashpa, shinallata huañushcapi tacarishca cashpapash, canchis punllacamanmi, carpacunamanda carupi saquirina canguichi. Ña quimsa punlla tucujpi, shinallata, canchis punlla tucujpipash, cangunapash, prezu apamushca gentecunapashmi, armashpa, mapa illaj tucuna canguichi.
20Shinallata, tucui churajunacunata, carata rurashcacunata, chivo milmata rurashcacunatapashmi mapa illajta rurana canguichi. Shinallata, caspita rurashca ima charishcacunatapashmi mapa illajta rurana canguichi” nijurcami.
Macanajushpa quichushcacunata chaupirishcamanda21Sacerdote Eleazarmi, macanajuimanda shamushca macanajuj runacunataca cashna nijurca: “Mandaj Dios, Moisesman chai mandashca shimicunapica cashnami nijun:
22‘Curi, culqui, bronce, jirru, estaño, plomo cajpipash,
23ninapi na rupanallacunataca, ninapi churashpami, chai jipaca, yacuhuan maillashpami mapa illajta rurana canguichi. Shinallata, ninapi rupanallacunataca, yacuhuan maillashpami mapa illajta rurana canguichi.
24Shinallata canchis punllapica, cangunapaj churajunacunata tajshashpa, mapa illaj tucushpami, carpacunaman yaicui ushana canguichi’ nijunmi” nircami.
25Mandaj Diosca, Moisestaca cashnami nijurca:
26“Macanajuipi mishashpa apamushca gentecunata, animalcunataca, canhuan, sacerdote Eleazarhuan, tandanajushca Israelcunata mandajcunahuanmi, yupana canguichi.
27Shinallata, macanajuipi mishashpa apamushcataca, macanajuiman rishcacunamambash, tucui tandanajushca Israelcunamambashmi chaupishpa cuna cangui.
28Macanajuiman rishca runacunataca, genteta cashpa, huagrata cashpa, burruta cashpa, llamata cashpapash, picha patsajmandaca shujtami, Mandaj Dios Ñucaman cuchun mañana canguichi.
29Paicunaman chaupishpa cushcamandaca, Mandaj Dios Ñucaman cuna ofrendataca, sacerdote Eleazarmanmi cuna canguichi.
30Tandanajushca Israelcunaman chaupishpa cushcamandaca, genteta cashpa, huagrata cashpa, burruta cashpa, llamata cashpa, tucui animalcunata cashpapash, picha chungamanda, shujtami japina cangui. Chaicunataca, Mandaj Dios Ñucapaj jatun carpata ricuj levitacunamanmi cuna cangui” nijurcami.
31Shina nijpimi Moiseshuan, sacerdote Eleazarhuanga, Mandaj Dios imashna mandashcata rurashpa pactachinajurca.
32Macanajuiman rishca macanajuj runacuna, quichushcacunaca caicunami carca: 675.000 llamacuna,
3372.000 huagracuna,
3461.000 burrucunami carca.
35Shinallata, jarihuan nara pacta puñushca cuitsacunaca, 32.000 cuitsacunami carca.
36Macanajuiman llujshij macanajuj runacunaman chaupishpa cushcacunaca, 337.500 llamacunami carca.
37Chaicunamanda, Mandaj Diosman impuestota cushcacunaca, 675 llamacunami carca.
38Shinallata, 36.000 huagramandaca, canchis chunga ishcai huagracunatami, Mandaj Diosman impuestota cunajurca.
39Shinallata, 30.500 burrucunamandaca, sucta chunga shuj burrucunatami, Mandaj Diosman impuestota cunajurca.
40Shinallata, 16.000 gentecunamandapash, quimsa chunga ishcai gentecunatami, Mandaj Diosman impuestota cunajurca.
41Moisesca, impuestota cushcacunataca, vichai ricuchishpa, Mandaj Diosman cuchunmi, Mandaj Dios imashna Moisesta mandashcashna, sacerdote Eleazarman curca.
42Macanajuiman rishca runacunamambash, tandanajushca Israelcunamambashmi, Moisesca chaupishpa curca.
43(Tandanajushca Israelcunaman cushcacunaca: 337.500 llamacunami,
4436.000 huagracunami,
4530.500 burrucunami carca.
46Shinallata, 16.000 cuitsacunami carca).
47Tandanajushca Israelcunaman chaupishpa cushcamandaca, cuitsacunata cashpa, animalcunata cashpapash, picha chungamanda shujtami Moisesca japirca. Chaicunataca, Mandaj Dios imashna Moisesta mandashcashnami, Mandaj Diospaj jatun carpata ricuj levitacunaman curca.
48Macanajuj runacunata mandajcunapash, huaranga macanajuj runacunata mandajcunapash, patsaj macanajuj runacunata mandajcunapashmi, Moisespajman shamunajurca.
49Chaipimi Moisestaca, cashna ninajurca: “Macanajuiman llujshishca cambajta ruraj macanajuj runacunata yupajpica, ñucanchipuramandaca, shujllapash na huañushcachu carca.
50Chaimandami, imatalla apamushcacunataca, Mandaj Diosman cungapa apamupanchi: Curimanda rurashca juyaillacunata, rigrapi huatarinacunata, maquipi huatarinacunata, surtijacunata, zarcillocunata, cadenacunatapashmi, ñucanchi juchacunamandaca Mandaj Diosman cungapa apamupanchi” ninajurcami.
51Shinamandami, curimanda juyaillata rurashcacunataca, Moiseshuan, sacerdote Eleazarhuanmi japinajurca.
52Shinallata, huaranga macanajuj runacunata mandajcuna, patsaj macanajuj runacunata mandajcuna, Mandaj Diosman tucui ofrendacunata cushca curicunaca, 16.750 siclotami pezarca.
53Shinallata, macanajuiman rishca macanajuj runacunaca, paicuna macanajushpa quichushcacunataca tucuicunami japinajurca.
54Huaranga macanajuj runacunata mandajcuna, patsaj macanajuj runacunata mandajcuna, Diosman cungapa apamushca, curimanda juyaillacunata rurashcacunataca, Moiseshuan, sacerdote Eleazarhuanmi japinajurca. Chaicunataca, Israelcunapaj miraicuna, Mandaj Dioshuan tuparina jatun carpaman apamujpimi, paicunataca na cungashca.
Who We AreWhat We EelieveWhat We Do
2025 by iamachristian.org,Inc All rights reserved.
