1 CRÓNICAS 19 - Quichua Imbabura 2016

Amonitacunapash, Siriocunapash mishai tucushcamanda(2 Sam. 10:1-19)

1Amón llacta gentecunata jatun mandaj Nahas shuti runa huañushca jipaca, paipaj churimi mandai callarirca.

2Chaimandami Davidca, cashna nirca: “Nahas shuti runapaj churi Hanún shuti runamanga, paipaj taita, ñucahuan ali cashcashnallatami, alicunata ruragrini” nirca. Shina nishpami, Hanún runapaj taita huañushcamanda, imatallapash nishpa cushichinajuchun, paipaj randi parlajcunata, Davidca cacharca. Ashtahuangarin, Davidpajta rurajcunaca, Amón llactapi Hanún runapajman chayajpica,

3Amón llactata cati mandajcunaca, Hanún runataca cashnami ninajurca: “¿Davidca, cambaj taita huañushcamanda, imatallapash nishpa cushichinajuchunmi cachamushcanga yanguichu? ¿Nachu cai llactata tucuchingapa, ali ricuchun paipajta rurajcunataca cachamushcanga?” ninajurcami.

4Shina nijpimi Hanún runaca, David cachashca runacunata japishpaca, barbasta rutushpa, paicunapaj churajunatapash, cinturasmanda uraiman liquishpa, “cunanga richilla” nishpa cacharca.

5Chashna rurashcata Davidman villajpimi, paicunata tuparichun cacharca. Paicuna ninanda pinganayachinajunda yachashpami jatun mandajca: “Barbas viñangacaman, Jericó pueblopi shuyaichilla. Chai jipaca tigramunguichillami” nichun cacharca.

6Amón llacta gentecunaca, Davidca paicunata na ricunayachijujtami yacharca. Chaimandami Hanún runaca, Amón llacta runacunahuanga, carretacunata, caballopi tiyarij macanajunata yachaj runacunata, sucta patsaj pusaj chunga quintalta pezaj culquita cushpa apamuchun Mesopotamia, Siria, Maaca, Soba shuti llactacunaman cacharca.

7Shina cachashpami, quimsa chunga ishcai huaranga macanajuna carretacunata, Maaca llactata jatun mandajtapash, paipaj macanajunata ali yachaj runacunandi, culquita cushpa apamurca. Paicuna shamushpami, Medeba shuti pueblo chimbapurapi, carpacunata shayachishpa tiyanajurca. Shinallata, Amón llacta runacunapash, paicunapaj pueblocunamanda llujshishpa tandanajushpami, macanajuiman shamunajurca.

8Davidca, chaita uyashpami, Joab runataca, macanajunata yachaj ninan shinlli runacunandi cacharca.

9Amón llacta gentecuna llujshimushpaca, Medeba shuti puebloman yaicunapimi macanajungapa alichirinajurca. Paicunahuan shamushca jatun mandajcunaca, pambapimi shuyanajurca.

10Joab runaca, huashatapash, ñaupatapash macanajungapa shamumunajundami ricurca. Shina ricushpami, Israelpuramandaca, ashtahuan ali macanajunata yachaj runacunata agllashpa, Siria llacta gentecunahuan macanajungapa llujshirca.

11Chai jipami, puchushca runacunataca, paipaj huauqui Abisai shuti runa mandajpi, Amón llacta gentecunahuan macanajugrichun cacharca.

12Paitaca cashnami nirca: “Siria llacta gentecuna ñucata mishai callarijpica, can yanapangapa shamungui. Shinallata, Amón llacta gentecuna canda mishai callarijpica, ñucami yanapangapa shamusha.

13Shinlli shayaringui. Ñucanchi gentecunamanda, ñucanchi Taita Diospaj pueblocunamandaca, shinllitapachami shayarina canchi. Mandaj Diosca, ima ali cana cajpipash, chaita rurachunlla” nircami.

14Joab runaca, tucui gentecunandi, Siria llacta runacunahuan macanajungapa chayagrijpimi, Siria llacta runacunaca pacajushpa calpanajurca.

15Siria llacta runacuna pacajushpa calpashcata, Amón llactamanda runacuna ricushpami, paicunapash, Joab runapaj huauqui Abisai shuti runata pacajushpa calpashpa, shuj puebloman yaicugrirca. Shina cajpimi Joab runaca, Jerusalenman tigrarca.

16Siria llacta runacunaca, Israelcunahuan mishai tucushca cashpami, jatun mandajpaj randi parlajcunata cacharca. Paicunami, Éufrates yacu chimbaman causaj, Siria llactamandallata, caishuj runacunata pushamungapa rirca. Chai runacunataca, Sofac shuti runami mandajurca. Paica, Hadad-ezer shuti runapaj macanajunata ali yachaj runacunata mandajmi carca.

17Chaita Davidman villajpimi, tucui Israel runacunata tandachishpa, Jordán yacuta chimbamushpa shamurca. Shina shamushpami, Davidca, Siria llacta runacunahuan macanajungapa callarirca.

18Ashtahuangarin Siria llacta runacunaca, Israelcunata manllashpami pacajushpa calpanajurca. Chaipimi Davidca, carretapi purij canchis huaranga Siria llacta runacunata, chuscu chunga huaranga chaquilla purishpa macanajuj runacunata huañuchirca. Macanajunata ali yachaj runacunata mandaj Sofac shuti runatapashmi huañuchirca.

19Hadad-ezer shuti runata yanapajcunaca, Israelcunahuan mishai tucushca cashpami, Shinami, Davidpajta rurashpa causangapa, Davidhuan parlanajurca. Chaimandami, Siria llactamanda runacunaca, Amón llacta gentecunataca napacha ashtahuan yanapangapa munarca.