EZEQUIEL 46 - Quichua Imbabura 2016

1Mandaj Diosca cashnami nin: “Indi llujshimujman tiyajuj, Ñuca huasi punguca, sucta punllatami vichashca canga. Samana punllapi, llullu luna punllapillami pascashca canga.

2Mandajca, jatun punguta yaicushpa, ucu canlla patio, pungupimi pilar caspipi shayaringa. Paica Ñucaman cushca animalta, sacerdote tucuilla rupachingacaman, Ñucahuan ali cangapa ofrendacunata cushpa tucuchingacamanmi chai pilar chaupipi shayajunga. Chaipillata cungurishpami, Ñucataca ninanda alicachishpa llujshinga. Chai pungutaca, tutayangacaman na vichashcachu canga.

3Shinallata, samana punllapipash, llullu luna punllapipash, cai llactapi causajcunaca, chai punguman shamushpa, Mandaj Dios Ñucata mañachun” nircami.

4Shinallata: “Chai llacta mandajca, samana punllapica, sucta maltun llamacunatapash, shuj ali racuyashca jari llamatapash, Ñucaman cushpami tucuillata rupachinga.

5Shuj jari llamatami, ishcai chunga ishcai kilo jacuhuan ofrendataca cunga. Shinallata chai maltun llamacunahuanga, imapash cui ushashcahuan cungallami. Ishcai chunga ishcai kilo jacuhuanga, sucta litro yali aceitetami cunga.

6Llullu luna punllapica, shuj maltun shicuta, sucta maltun llamacunata, shuj maltun carnerotami cunga. Chaicunaca, ali imapash na huagli animalcunami canga.

7Ishcai chunga ishcai kilo jacutami, shuj shicuhuanga cunga. Shinallata jari llamataca, ishcai chunga ishcai kilo jacuhuanmi cunga. Shinallata maltun llamacunataca, imashna ushashcahuan cungallami. Ishcai chunga ishcai kilo jacuhuanga, sucta litro yali aceitetami cunga.

8Ñucapajlla huasiman, mandaj yaicujushpaca, pungupaj yaicuna corredortami yaicunga. Llujshitapash, chaitallatami, llujshishpa ringa.

9Ashtahuangarin cai llactapi causajcunaca, jatun cushijuna punllacunapi Mandaj Dios Ñuca ñaupajman, janajman tiyajuj punguta maijambash yaicushca cashpaca, uraman tiyajuj pungutami llujshinga. Uraman tiyajuj punguta yaicushca, gentecunaca, janajman tiyajuj pungutami llujshinga. Maita yaicushca pungutaca, na llujshingachu. Yaicushca pungu chimbaman tiyajuj pungutami llujshinga.

10Cai llactapi causajcuna Ñucata mañangapa yaicujpica, mandajpash paicunahuanmi yaicunga. Paicuna llujshijpimi, paicunahuan llujshinga.

11Shinallata jatun cushijuita rurana punllacunapipash, jatun tandanajui punllacunapipash, shuj shicuhuanmi ishcai chunga ishcai kilo jacuta cunga. Shuj llamahuanga, ishcai chunga ishcai kilo jacutami cunga. Maltun jari llamahuanga, imashna cui ushashcatallami cunga. Ishcai chunga ishcai kilo jacuhuanga sucta litro yali aceitetami cunga.

12Mandaj runa paillata cungapa munashca ofrendatapash, Mandaj Dios Ñucahuan, ali tucungapa animaltapash cushpa tucuillata rupachingapaca, indi llujshimujman tiyajun punguta yaicuchun. Chaita yaicushpami, samana punllapishna, animaltapash tucuillata rupachishpa, ofrendatapash Ñucahuan ali tucungapa cunga. Chai jipa llujshijpimi, chai pungutaca vichanga.

13Ali maltun llamatami, Mandaj Dios Ñucaman cushpa, punllandi huañuchishpa, tucuillata rupachina cangui. Tucui tutamandami, chaitaca huañuchina cangui.

14Shinallata, sucta kilo yali jacutami, shuj litro aceitehuan tucui tutamanda cuna cangui. Chai aceiteca jacuhuan chapungapami canga. Chaitaca, Mandaj Dios Ñucaman cushpa, causaita causaicaman pactachina mandashcami canga.

15Tucui tutamandami maltun llamatapash, granocunatapash, aceitetapash, Mandaj Dios Ñucaman cushpa rupachinajunalla canguichi” nircami.

16Mandaj Diosca cutinmi cashna nihuarca: “Maijan mandajpash, paipaj churicunaman, alpataca asha asha chaupishpa cujpica, chai alpaca taita carashpa paipaj churicunapaj cachun cushcami canga.

17Ashtahuangarin chai mandaj paipajta rurajcunaman cushpaca, chai alpaca, Israelcuna alpata tigrachina huatacamanllami canga. Chai huatapica, paita mandajmanmi tigrachinga. Chai alpataca, mandajpaj churicunami japinga.

18Mandajca, chai llactapi causajcunapaj alpacunataca na quichunachu. Paipaj churicunamambash, paipaj alpatallami cunga. Ñuca agllashca gentecunaca, na alpa illaj saquiringachu. Shujllapash paicunapaj llactamandaca, na llujshishpa ringachu” nijurcami.

19Chai jipami Ñucataca, yaicuna pungupi tiyajuj sacerdotecunapaj shicanyachishca ucucunaman pushamuhuarca. Chai ucucunaca, janajmanmi yaicuna punguta charirca. Chaipimi, ashtahuan huashaman indi huashajunaman tiyajuj ucuta ricurcani.

20Chaipimi, cashna nihuarca: “Cai jatun ucupimi, sacerdotecunaca juchamanda Diosman imata cushcatapash, animal aichatapash yanunga. Chaicunataca, Ñucapajlla shicanyachishcacunata canlla patioman llujchipimi gentecuna ama ricuchunmi chashna ruranga” nihuarcami.

21Chai jipami, canllaman llujchihuarca. Chaipimi, chuscundi manñacunata ricuchihuarca. Chaipica, tucuilla manñapimi, shuj uchilla pambacuna tiyarca.

22Chai chuscundi manñapi pambataca tucuillatami, pircahuan jarcashca carca. Chai pambacunaca chuscundimi, ishcai chunga metro, pusaj chunga centímetro largo, chunga picha metro, sucta chunga picha centímetro anchomi carca.

23Chai pambacunataca, chuscunditami ali pircashca carca. Chai pirca muyundi ucupimi, tulpacuna tiyarca.

24Chaipimi, cashna nihuarca: “Diosman gentecuna imatalla ofrendashcataca, caipi yanushpa causajcunami yanunajunga” nihuarcami.