2 CRÓNICAS 31 - Quichua Imbabura 2016

1Tucui chaicunata ña rurashca jipami, chaipi tandanajushca tucui Israelcunaca, Judá llactapi tiyaj pueblocunaman rinajurca. Shina rishpami, rurashcalla dioscunatapash, Asera shuti huarmi diosman rijchajcunatapash, tucuillata faquishpa tucuchinajurca. Judá, Benjamín ayllu lomacunapi tiyaj altarcunatapashmi urmachinajurca. Efraín, Manasés ayllu llactacunapipashmi, tucuillata urmachinajurca. Chai jipami, Israelcunaca paicunapaj pueblocunaman, paicuna causanajuj alpacunaman tigranajurca.

Sacerdotecuna, levitacuna, Diospajta rurachun Ezequías cutin churashcamanda

2Chai jipami, Ezequías runaca sacerdotecunata, levitacunataca, paicuna imata rurana cashcapi, cati cati yaicushpa ruranajuchun churarca. Sacerdotecunata, levitacunataca, animalcunata Diosman cushpa tucuillata rupachinajuchun, Dioshuan ali cangapa apamushca ofrendacunata cunajuchun, Diospajta ruranajuchun, Diosta pashi nishpa, Mandaj Diospaj huasi patio punguman chayanapi alicachinajuchunmi mandarca.

3Tutamandapash, chishipash Diosman cushpa tucuillata rupachinajuchunga, jatun mandajllatami, paipaj alpamanda animalcunata cararca. Shinallata, samana punllacunapi, llullu luna punllacunapi, cushijui punllacunapi, Mandaj Dios mandashpa quilcachishcapi nijushcashna, animalcunata Diosman cushpa tucuillata rupachinajuchunmi cararca.

4Mandaj Dios mandashcata sacerdotecuna, levitacuna rurashpa catichunga, Jerusalenbi causajcunatami, sacerdotecunaman, levitacunaman cunata cuchun mandarca.

5Mandashpa quilcashcacunata tucuicunaman villajpimi, Israelcunaca pambacunapi punda fucushca granocunata, vinota, aceiteta, balun mishquita, pambacunapi fucushca tucui shuj granocunatapash ashtacatapacha cunajurca. Shinallata, tucui imalla tiyashcamandapashmi, chungamanda shujta shicanyachishpa ashtacatapacha apamunajurca.

6Israel llactapi causajcunapash, Judá llactapillata tiyaj shuj pueblocunapi causajcunapash, chashnallatami huarmi huagracunamanda, llamacunamandaca, chungamanda shujta cunajurca. Shinallata, chungamanda shujta cungapa Diosman shicanyachishcatapash, paicunata Mandaj Taita Diosman carashun nishcatapashmi apamushpa, mundunashpa saquinajurca.

7Huatapaj quimsa quillapi granocunata mundunai callarishpaca, huatapaj canchis quillapimi tucuchinajurca.

8Ezequías runapash, cati mandajcunapash shamushpa, chai grano mundungunata ricushpami, Mandaj Diostaca ninanda alichishpa, Dios agllashca Israelcunatapash bendicianajurca.

9Chai jipami Ezequías runaca, sacerdotecunatapash, levitacunatapash, chai granocunamanda tapurca.

10Pai tapushcataca, Sacerdote Sadocpaj mirai sacerdotecunata mandaj Azarías shuti runami, cashna nishpa tigrachirca: “Mandaj Diosman imagutapash carashpa, Paipaj huasiman apamui callarishcamandaca, ñucanchi japinata japishpaca, na ushajtami micupashcanchi. Chai jahuapash, ashtaca puchushcarami. Mandaj Diosmi, pai agllashcacunataca bendiciashca. Chaimandami, paicuna imatalla caramushcacunaca, ashtacapacha puchushca” nijurcami.

11Shinamandami, Ezequías runaca, Mandaj Diospaj huasipi ucucunata rurachun mandajpi, chai ucucunata ruranajurca.

12Chai ucucunapimi, punda fucushca granocunamanda cushcatapash, chungamanda shujta cushcatapash, Diosman shicanyachishpa cushcatapash, aligutapacha alichinajurca. Chaipi ricuchunga, Conanías shuti levitatami churanajurca. Paipaj cati ricujtaca, paipaj huauqui Simei shuti levitatami churanajurca.

13Jehiel, Azazías, Nahat, Asael, Jerimot, Jozabad, Eliel, Ismaquías, Mahat, Benaía shuti runacunaca, mayordomocunami carca. Paicunaca, Conanías shuti runa, paipaj huauqui Simei shuti runa mandashcatami ruranajurca. Jatun mandaj Ezequías runapash, Taita Diospaj huasipi mandaj Azarías runapash mandashcashnami ruranajurca.

14Indi llujshimujman shayajuj pungupica, Imna shuti levitapaj churi Coré shuti levitami ricujurca. Paica, gentecunapaj tucui munaihuan Taita Diosman carashcacunata, Mandaj Diosman shicanyachishcacunata, Diospajlla cachun shicanyachishcacunata ricujmi carca.

15Paitaca, Edén, Miniamín, Jesúa, Semaías, Amarías, Secanías shuti levitacunami yanapanajurca. Paicunaca, sacerdotecuna causanajuj pueblocunapi paicunapaj huauquicunaman chaupishpa cunataca, na cungashpami cunajurca. Paicunapaj huauquicuna mashnapi shicanyashca cashcashnami, paicunamanga, rucucunamambash, jipa viñaicunamambash chaupishpa ali ricushpa cunajurca.

16Miraicuna imashna cashcashnallata, quimsa huatamanda vichaiman shuticunata quilcachishca jaricunamambash, Diospajta rurangapa Mandaj Diospaj huasiman shamuna punllacunapi, paicuna imatalla ruranata yachashcashna, shican shican shamujcunamanga chashnallatami cunajurca.

17Shinallata, paicunapaj ñaupa taitacunapaj huasi ucupura sacerdotecuna mashna cashcata yupashpami, paicunamambash cunajurca. Shinallata levitacunamambashmi, paicuna imatalla rurana cajpipash, imashna shican shican tandanajushcapi cunajurca. Chaita rurachunga, ishcai chunga huatata charijmanda vichaimanmi chashna cunajurca.

18Tucuita pactachingapa Diospajlla tucushcamandami, paicunaca tucui huahuacunandi, ushicunandi, huarmicunandi shuticunata tucuilla quilcachishca carca.

19Paicunapaj pueblo muyundicunapi tiyaj michina pambacunapi causaj, Aaronbaj mirai sacerdotecunamambash, chashnallatami cunajurca. Shuticunata ña villashca runacunami, Sacerdotepuracunapi tiyaj tucui runacunamambash, levitacunapaj tucui miraicunamambash, paicuna japinataca chaupishpa cunajurca.

20Ezequías runaca, tucui Judá llactapimi, chashna rurarca. Paica, paita Mandaj Taita Diospaj ñaupajpica, aligutapacha, na pandashpami, aligutapacha rurashpa causajurca.

21Taita Diospaj huasipi tucui imatalla rurashpa callaringapa yarijushcataca, mandashca shimicunapi nijujshnami rurarca. Paipaj Taita Diosta mascashpa, tucui shunguhuan imagutapash rurashcamandami, tucuipi bendiciai tucurca.