1Mandaj Diosca, amonita gentecunamandaca, cashnami nin:
“Israelcunaca, ¿nachu huahuacunata charin?
Chai alpacunata japingapaca, ¿nachu pipash tiyanga?
¿Imashpata Milcom shuti rurashcalla diosta catijcunara, Gad shuti ayllupaj llactataca quichushca?
¿Imashpata chai gentecunara, cai pueblocunapi causanajun?” ninmi.
2Shinamandami Mandaj Diosca, cashnatapash nin:
“Amón llacta gentecunapaj Rabá shuti pueblopica, jatun macanajui callaringapa caparinajujta uyana punllacunami chayamujun.
Chai puebloca, tucuillami urmachi tucunga.
Chaipi tiyaj tucui caishuj pueblocunapash rupachi tucungami.
Israelcunaca, paicunata quichushca pueblocunataca, cutinmi japinajunga” ninmi Mandaj Diosca.
3“Hesbón shuti pueblopi causajcunalla, huacaichiyari.
Hai shuti puebloca, ñamari tucuchi tucushca.
Rabá shuti pueblopi causajcunalla, ninanda caparishpa huacaichiyari.
Cañamuta churajushpa, ninanda llaquirishpa huacashpa, pirca huashacunata muyuichiyari.
Cangunapaj Milcom shuti rurashcalla diosca,
paipaj sacerdotecunandi, paipaj mandajcunandimi, prezu apai tucushca.
4Shinlli shungu huarmishna causajcunalla,
¿Imashpata cangunaca juyailla pambacunata charishcahuan jariyanguichi?
Chai pambacunaca, tucuchi tucurcamari.
Canguna imatalla charishcatallami yariashpa causanguichi.
‘¿Pita ñucanchitaca, llaquichingapa shamungayari?’ ninajunguichimi” ninmi.
5Tucuita Mandaj, Jatun Diosca cashnatapashmi nin:
“Ñucami cangunapaj tucui muyundi llactacunaman ninan llaquicunata cachamugrini.
Shinamandami tigrashpapash, na ricushpa calpanguichi.
Shina purinajujta cutin tandachij runaca, pipash na tiyangachu.
6Ashtahuangarin chai jipaca, amón llacta gentecuna prezu apai tucushcataca, Ñucallatami tigrachimusha” ninmi Mandaj Diosca.
Edom llactata llaquichinamanda7Tucuita Mandaj Taita Diosca, Edom llactata llaquichinamandaca, cashnami nijun:
“Temán shuti llactapica, ima ali yachajunaca, ¿ñachu tiyan?
Alipacha yachajushcacuna, ali yuyaita cunapash, ¿ñachu tucurishca?
Paicuna imata yachajushcapash, ¿ñachu huaglishca?
8Dedán shuti pueblopi causajcunalla,
tigrashpa rishpa pacalla causagrichiyari.
Esaupaj miraicuna llaquichi tucuna punllapillatami, jatun llaquita cachamugrini.
9Uvacunata pallajcuna shamushpaca, ¿nachu asha pallajunata saquinman carca?
Shuhuacuna tuta shamushpapash, ¿nachu apai ushanatalla apanman carca?
10Ashtahuangarin Esaupaj miraicunataca, imapash illajtami saquisha.
Paicunaca maipi pacajunatapash na charingachu.
Maipi pacajuitapash na ushangachu.
Chashnami Esaupaj miraicunapash, paipaj huauquicunapash,
quimirialla causajcunapash, tucuchi tucunajunga.
Paicunaca tucuillami tucuringa.
11Taita mama illaj, huahuacunataca saquichilla, Ñucami viñachisha.
Cangunapaj sapalla huarmicunapash, Ñucatami yariajlla causanajunga” ninmi.
12Mandaj Diosca, cashnatapashmi nin: “Ñuca llaquichina copamandaca, llaquichi tucunacunaca ufiangapachami. Shina cashpaca, ¿canrachu napacha ufiana cangui? Ashtahuangarin na chashnachu. Canga ufianapachami cangui.
13Bosra shuti puebloca, llaquinayaita tucuchi tucushpami, napacha alicachi tucushpa, pipash na causajpi shitai tucushca canga. Shinallata, chaipi tucui pueblocunami, causaita causaicaman shitai tucushca saquiringa. Chaitaca Ñucallatami chashna nijuni” ninmi Mandaj Diosca.
14Mandaj Diosca, shuj llactacunapi villachunmi ñucataca cachahuarca. Paica cashnami nihuarca:
“Edom llactapi causajcunahuan macanajungapa tandanajushpa vichai shamuichi.
15Cangunataca uchilla llactacunamanda yali uchilla cachunmi ruragrini.
Tucui gentecuna na alicachijpimi causangui.
16Jaca rumi utujucunapi, lomacunapi causajcunalla,
Pitapash na cazushpa causashpami, pandarishcanguichi.
Cambaj munaita rurashpami, pandarishcanguichi.
Jatun angashna jahuacunapi tazinda rurashpa tiyajujpipash,
chaimandapash urmachishallami ninmi Mandaj Diosca” nishpa villajtami uyarcani.
17“Edom llactataca, tucuillami tucuchinga. Chashna llaquichi tucushcata ricushpami, na alicachishpa asishpa ricunajunga.
18Chai llactaca, Sodoma shuti, Gomorra shuti pueblocunata, chai muyundi pueblocunandi tucuchi tucushcashnami canga. Pipash na chaipica causangachu. Shuj runallapash na causangachu. Mandaj Dios Ñucami, chashna nini.
19Uyaichi, virayashca juyailla animalta japingapa, Jordán yacu manña sachamanda león llujshijshnami, paicunataca llaquichingapa vichai risha. Ñallami chaimandaca calpachisha. Ñuca agllashca runatami, chaipica mandachun churasha. ¿Pita Ñucashna ushaita charij tiyanga? Ñucahuanga, ¿pita chimbapurai ushangayari? Ñuca llaquichijujpica, ¿pita jarcai ushangayari?” ninmi.
20Shina cashcamanda Edom llactapi causajcunata, Temán shuti llactapi causajcunata, Mandaj Dios imashna llaquichingapa yarijushcata uyaichiyari: “Paicunapaj llamacunataca, uchilla llamacunatapash aisashpa apangapachami. Paicuna shayana pushtucunataca, paicunandimi tucuchinga.
21Edom llacta culunlla urmajpica, alpapash chujchungami. Ninanda caparinajushcapash, Puca Cuchacamanmi uyaringa.
22Bosra shuti pueblopi causajcunata llaquichingapaca, jatun anga shamujshnami, paita fiñajcunaca vichai shamunga. Chai punllapica, Edom llactapi causaj ninan shinlli runacunapaj shungupash, huahuata unguna nanaihuan huarmipaj shungushnami canga” ninmi.
Damasco pueblota llaquichinamanda23Damasco pueblopi causajcunamandaca, cashnami nijurca:
“Hamat shuti, Arfad shuti pueblocunapi causajcunaca,
paicunata jatun llaqui japigrijujpimi, imata ruraitapash na ushanajurca.
Yacu jatarishpa, caiman chaiman cuyunshnami cuyurca.
24Damasco pueblopi causajcunaca mishai tucushpami, calpangapa callarirca.
Paicunataca ninan manllaimi japirca.
Huahuata unguna huarmita nanai japinshnami llaqui japirca.
25¡Ninanda alicachi tucushca pueblopash shitai tucushcami!
¡Ñuca ninanda cushijuna pueblotaca chashnamari tucuchishca!
26Shinamandami, chai pueblocunapi causaj chairalla viñaicunapash, plazacunapi huañushca sirinajunga.
Macanajuj runacunapash, chai punllapimi tucuringa.
Tucuita Mandaj Dios Ñucami, chashna nini.
27Damasco shuti pueblo muyundi jatun pircapica, ninata japichinajuchunmi mandasha.
Ben-adad shuti runapaj huasicunapashmi rupashpa tucuringa” nijurcami.
Cedar shuti, Hazor shuti pueblocunata llaquichinamanda28Cedar shuti, Hazor shuti pueblocunata mandajcunatapash, Babilonia llactata jatun mandaj Nabucodonosor runami tucuchirca. Paicunamandami Mandaj Diosca, cashna nijurca:
“Cedar pueblopi causajcunahuan macanajungapa tandanajushpa vichai shamuichi.
Indi llujshimujman tiyanajuj llactapi causajcunata tucuchingapa shamuichi.
29Paicunapaj carpacunatapash, animalcunatapashmi quichunajunga.
Paicuna quilpana finducunatapash, tucui imalla tiyashcacunatapash,
camellocunatapashmi, quichushpa apanajunga.
Chaipimi tucuicuna ninanda manllarishpa caparinajunga” ninmi.
30Mandaj Diosca, cashnatapashmi nin:
“Hazor shuti pueblopi causajcunalla,
carucunapi pacajungapa rishpa, utujucunapi causagrichilla.
Babilonia llactata jatun mandaj Nabucodonosor runaca, cangunata llaquichinatami yarijushca.
Imashna llaquichishpa mishanatami, ali yarijushca.
31Imatapash na yashpa, cungashca causajcunataca llaquichigrichilla.
Paicunapaj, pungucunatapash na jarcashcami cungashca causanajun” ninmi Mandaj Diosca.
32Mandaj Diosca, cashnatapashmi nin:
“Paicunapaj camellocunata, ashtaca animalcunatapash quichushpa apanguichilla.
Paicunatapash, cai pacha manñacunamanmi, caita chaitami llujchishpa calpachisha.
Paicunata llaquichijcunataca, tucui muyundimandami cachamusha.
33Hazor shuti pueblopica, causaita causaicamanmi chulunlla pushtupi causaj chacal animalcunalla causanajunga.
Pillapash chaipica na causangachu” ninmi.
Elam shuti llactata llaquichinamanda34Judá llactata jatun mandaj Sedequías mandai callari huatapimi Mandaj Diosca, Elam shuti llactata llaquichinata villagrichun, profeta Jeremiasta cashna nishpa mandarca:
35“Tucuita Mandaj Diosca, cashnami nin:
‘Elam shuti llacta runacunapaj arcocunataca faquigrinimi.
Paicuna ashtahuan shinlliyashpa macanajuna arcotami faquigrini.
36Cai pacha chuscundi suyumanda, huairatami cachamugrini.
Jahua pacha chuscundi suyumandapashmi, huairata cachamugrini.
Elam shuti llactapi causajcunataca, chai huairahuanmi caita chaita cachasha.
Elam shuti llactapi causajcunaca, tucui llactacunamanmi pacajushpa calpanajunga’ ninmi.
37Mandaj Diosca, cashnatapashmi nin:
‘Elam llactapi causajcunataca, paicunata fiñajcunapaj maquipimi churagrini.
Paicunata huañuchingapa shuyanajuj gentecunapaj maquipimi saquigrini.
Ñuca ninanda fiñarishpami, paicunataca ninanda llaquichigrini.
Espadahuan huañuchishpa tucuillata tucuchinajuchunmi, paicunata fiñajcunata cachamugrini’ ninmi.
38Mandaj Diosca, cashnatapashmi nin:
‘Elam shuti llactapica, ñuca mandashpa tiyarinatami churagrini.
Chai llactapica jatun mandajtapash, cati mandajcunatapashmi tucuchigrini.
39Ashtahuangarin tucuri punllacunapica, cashnami tucunga:
Elam shuti llactamanda prezu apai tucushcacunataca, cutinmi tigrachisha’ ninmi Mandaj Diosca” nishpa villachunmi mandarca.
Who We AreWhat We EelieveWhat We Do
2025 by iamachristian.org,Inc All rights reserved.
